وبلىس اكىمى قۇمار اقساقالوۆ سپورت سارايىن ارالاۋ كەزىندە قر پرەمەر-ءمينيسترى باقىتجان ساعىنتاەۆقا مەملەكەتتىك-جەكەشەلىك ارىپتەستىك اياسىندا سپورت سارايىنا اكەلەتىن جامبىل كوشەسىن قايتا جوندەۋ جۇمىستارى تۋرالى, ءمجا تەتىكتەرىن قولدانۋ ارقىلى وقۋشىلار سارايى مەن تەننيس ورتالىعىنىڭ قۇرىلىسىن جۇرگىزۋ بارىسى جايىندا باياندادى.
پەتروپاۆلدا 2017 جىلى بارلىعى 1 000-نان استام پاتەردى وتكىزۋ كوزدەلىپ وتىر. قۇرىلىس سالىناتىن نەگىزگى ورىن رەتىندە «جاس وركەن» شاعىن اۋدانى تاڭدالدى, ول جەردە 500-دەن استام نىسان - ەسكى ۇيلەر مەن وزگە دە قۇرىلىستار جويىلادى. بۇل جەردە ەكى جىلدىڭ ىشىندە 2 500 پاتەرلى 11 كوپ پاتەرلى تۇرعىن ءۇي, وقۋشىلار سارايى مەن تەننيس ورتالىعى تۇرعىزىلادى.
اۋەجاي پەررونىن كەڭەيتۋ, جولدارعا كۇردەلى جوندەۋ جۇمىستارىن جۇرگىزۋ, كوشە شامدارىنىڭ جەلىسىن رەكونسترۋكتسيالاۋ بويىنشا كولەمدى جۇمىستار اتقارىلۋى ءتيىس. ەكى جىلدىڭ ىشىندە 28 كوشە مەن 400 اۋلا اۋماعى جوندەلەدى.
بۇدان وزگە, قر پرەمەر-ءمينيسترى باقىتجان ساعىنتاەۆ وبلىس ورتالىعىنداعى الەۋمەتتىك-مادەني نىساندار, مەيمانحانالار مەن ساۋدا ورتالىقتارى بار ويىن-ساۋىق ورتالىقتارى مەن مادەني ساۋىقتىرۋ كەشەندەرىنىڭ قۇرىلىس جوبالارىمەن تانىستى.
