بيىلعى فينالدا چەمپيون اتانۋ ءۇشىن ەكى كوماندا ساقاداي-ساي. اسىرەسە, كۋبالىق بوكسشىلاردىڭ قارقىنى قاتتى. ويتكەنى, فينالدىق باسەكەگە «قابىلاندار» ءار جىلداعى ءۇش وليمپيادا چەمپيونىن الىپ كەلگەن. ولار: 2008 جىلعى بەيجىڭ وليمپياداسىنىڭ 64 كيلوداعى چەمپيونى – رونەل يگلەسياس سوتولونگو (ول قازىر 69 كيلودا جۇدىرىقتاسادى) جانە 2016 جىلعى ريو وليمپياداسىنىڭ چەمپيوندارى ارلەن لوپەس (75 كگ) پەن حۋليو سەسار لا كرۋس (81 كگ). سونداي-اق, يوحانۋس ارگيلاگوس (49 كگ), لازارو الۆارەس (60 كگ) جانە ەريسلاندي ساۆون (91 كگ) بىلتىرعى وليمپيادانىڭ قول جۇلدەگەرلەرى. ال «ارلاندار» ساپىندا وليمپيادا چەمپيونى بولماسا دا, وليمپيا ويىندارىندا 52 كيلودا جۇدىرىقتاسقان ءىلياس سۇلەيمەنوۆ ء(ى2012) پەن ولجاس ساتتىباەۆ (2016) بار.
سونىمەن, WSB جوباسىنىڭ فينالىنا شىققان قازاق-كۋبا بوكسشىلارىنىڭ الەۋەتىن, جارىس جەڭىمپازى اتانۋعا قانشالىقتى مۇمكىندىكتەرى بارىن سارالاپ, ساراپتاپ شىعۋدى ءجون كوردىك.
49 كيلو – تەمىرتاس ءجۇسىپوۆ - يوحانۋس ارگيلاگوس
بۇل جۇپتا تەمىرتاس ءجۇسىپوۆ قارسىلاسىنان جاس جاعىنان دا تاجىريبە جاعىنان دا باسىم. تەمىرتاس بيىلعى ماۋسىمدا بەس كەزدەسۋ وتكىزگەن. ەكى جەكپە-جەكتە جەڭىسكە جەتسە, ۇشەۋىندە ۇتىلىپ قالعان. ال ارگيلاگوس ءۇش كەزدەسۋ وتكىزىپ, ءبىر رەت جەڭىپ, ەكى رەت جەڭىلگەن. ايتپاقشى, ەكى بوكسشى 2015 جىلعى فينالدا جولىعىپ, ءجۇسىپوۆتىڭ جەڭىسىمەن اياقتالعان بولاتىن. ستاتيستيكاعا سۇيەنسەك, تەمىرتاس ەرتەڭگى كەزدەسۋدە دە جەڭىسكە جەتۋى ءتيىس.
52 كگ – ولجاس ساتتىباەۆ - يوسباني ۆەيتيا
ولجاس ساتتىباەۆ پەن يوسباني ۆەيتياتىڭ ناتيجەلەرى مەن مۇمكىندىكتەرى بىردەي. ەكى بوكسشى دا بىلتىرعى ريو وليمپياداسىنىڭ قاتىسۋشىلارى. دەگەنمەن, ەكەۋى دە جۇلدەگە ىلىگە الماعان بولاتىن. سونداي-اق, وسى ماۋسىمدا ساتتىباەۆ پەن ۆەيتيا ءتورت كەزدەسۋدەن وتكىزىپ, بارلىعىندا جەڭىسكە جەتكەن. سونىمەن قاتار, ولار 2015 جىلعى فينالدا جولىعىپ, ولجاس ساتتىباەۆ جەڭىسكە جەتكەن. ولجاستىڭ ءوزى ەكى جىل بۇرىنعى جەڭىسىن قايتالايتىنىنا سەنىمدى.
56 كيلو – ءىلياس سۇلەيمەنوۆ - حاۆەر يبانەس
ءىلياستىڭ بۇل جولعى قارسىلاسى قازاق بوكس جانكۇيەرلەرىنە ەسىمى اسا تانىمال ەمەس جاس بوكسشى. نەبارى 20 جاستاعى حاۆەر يبانەس بىلتىر كۋبا قۇراماسى ساپىنا الىنعان. ول بيىل WSB جوباسىندا 5 جەكپە-جەك وتكىزىپ, ءۇش رەت جەڭىپ, ەكى رەت جەڭىلگەن. ال حالىقارالىق دارەجەدەگى بوكس شەبەرى ءىلياس سۇلەيمەنوۆ بەس كەزدەسۋدىڭ تورتەۋىندە جەڭىسكە جەتكەن.اتالعان جەكپە-جەكتە سۇلەيمەنوۆتىڭ جەڭىسىنە كۋا بولۋىمىز مۇمكىن. دەگەنمەن, قارسىلاسقا دا قۇرمەتپەن قاراعان دۇرىس.
60 كيلو – زاكىر سافيۋللين - لازارو الۆارەس
بۇل كەزدەسۋ زاكىر ءۇشىن رەۆانش جەكپە-جەك بولماق. ويتكەنى, ول 2015 جىلعى فينالدا الۆارەستەن ۇتىلىپ قالعان ەدى. نەگىزى, ەكى بوكسشى تەڭ دارەجەدە جۇدىرىقتاسقان, بىراق تورەشىلەر جەڭىستى كۋبالىق بوكسشىعا بەرگەن بولاتىن. ەكەۋىنىڭ دە جەڭىسكە جەتۋگە مۇمكىندىكتەرى دە تاجىريبەلەرى دە جەتكىلىكتى. زاكىر - لازارو جەكپە-جەگىندە كىم جەڭەتىنىن ءدوپ باسىپ ايتۋ قيىن. سوندىقتان, جەڭىمپازدىڭ ەسىمىن تورەشىلەر مەن شارشى الاڭعا قالدىرايىق.
64 كيلو – ءدىلمۇرات ميجيتوۆ - ەندي كرۋز
بىلتىر 56 كيلودا وسى جوبا ارقىلى ريو وليمپياداسىنا جولداما الىپ, ءتورت جىلدىقتىڭ باستى باسەكەسىنە قاتىسا الماي قالعان ەندي كرۋز بيىلدان باستاپ 64 كيلودا سىنعا ءتۇسىپ ءجۇر. ناتيجەسى دە جامان ەمەس. بەس كەزدەسۋدىڭ بارلىعىندا جەڭىسكە جەتكەن. ال جوبانىڭ دەبيۋتانتى ءدىلمۇرات ميجيتوۆ جاس بولسا دا بوكسشىلارعا لايىقتى قارسىلاس اتانىپ ءجۇر. بۇل كەزدەسۋدىڭ دە ناتيجەسىن شارشى الاڭعا قالدىرايىق.
69 كيلو – اسلانبەك شىمبەرگەنوۆ - رونەل يگلەسياس سوتولونگو
اسلانبەك شىمبەرگەنوۆ كۋبالىق بوكسشىمەن 2015 جىلعى فينالدا كەزدەسىپ, جەڭىسكە جەتكەن. سونداي-اق, 2014 جىلعى «چەمپيوندار كەزدەسۋىندە» سوتولونگو تاعى ءبىر «ارلان» ماديار اشكەەۆتەن جەڭىلگەن. جالپى, رونەلگە قازاق بوكسشىلارىمەن جۇدىرىقتاسۋ ىڭعايسىز. ەكى بوكسشى دا بيىل جەڭىلىپ كورمەگەن. اسلانبەكتىڭ سوڭعى جەكپە-جەكتەرى كوڭىل قۋانتارلىق. ەگەر, ەرتەڭگى كەزدەسۋدە شىمبەرگەنوۆتىڭ بابى مەن باعى كەلىسسە ەكى جىل بۇرىنعى جەڭىستى قايتالاۋى مۇمكىن.
75 كيلو – امانقۇل ءابىلحان - ارلەن لوپەس
امانقۇل ءابىلحان ۇلتتىق قۇرامادان «ارلاندارعا» كومەكتەسۋگە كەلگەن جالعىز بوكسشى. قولىنىڭ جاراقاتىنا قاراماستان ول لوپەسكە قارسى جەكپە-جەك وتكىزۋگە دايىن. جاس پەن تاجىريبە بويىنشا كۋبا بوكسشىسىنىڭ ءباسى جوعارى. دەگەنمەن, جاس بوكسشىمىز كۋبانىڭ «ارداگەر» بوكسشىسىنا قاۋقارى جەتەتىنىنە سەنىمدىمىز. تەك جاراقاتى سىر بەرمەسە بولعانى.
81 كيلو – ارمان رىسبەك - حۋليو سەزار لا كرۋس
بوكس ماماندارى مەن جانكۇيەرلەرىنىڭ پىكىرىنشە, بۇل كەزدەسۋدىڭ ءفاۆوريتى رەتىندە كۋبالىق بوكسشى سانالۋدا. ونىڭ سەبەبى دە جوق ەمەس. ويتكەنى, لا كرۋس ءوزى بارعان جارىستىڭ بارىندە قارسىلاستارىن جەڭىپ قانا قويماي, التىن مەدالىن الىپ قايتادى. WSB جوباسىندا دا سونداي. جەڭىلىس نە ەكەنىن بىلمەي كەلەدى. بىراق, بۇل كەزدەسۋدە نۇرلان اقۇرپەكوۆ شاكىرتىنىڭ جەڭىسكە جەتەتىنىنە سەنىمدى. كۋبالىق بوكسشىعا قارسى جوسپار قۇرىپ قويعانىن, ەگەر ارمان جوسپاردى ورىنداسا, جەڭىسكە جەتەتىنىن ايتادى.
91 كيلو – انتون پينچۋ - ەريسلاندي ساۆون
اۋەلدە «ارلاندار» ساپىنان بۇل كيلودا فينالدىق كەزدەسۋگە ۆاسيلي لەۆيت شىعۋى كەرەك بولعان. الايدا, ول بايقاۋسىزدا قولىن جاراقاتتاپ الىپ, رينگكە شىعا المايتىن بولدى. ال انتوننىڭ ساۆونعا قانشالىقتى قاۋقار كورسەتە الاتىنىن ەرتەڭ شارشى الاڭدا كورەتىن بولامىز. دەگەنمەن, ەريسلاندي ساۆوندى وليمپيادانىڭ ءۇش دۇركىن چەمپيونى, اتاقتى بوكسشى فەليكس ساۆوننىڭ جيەنى دەمەسەڭىز, ناعاشىسى سەكىلدى اسا ءبىر مىقتى بوكسشى ەمەس. بۇل بوكسشىلاردىڭ جەڭىسكە جەتۋگە دەگەن مۇمكىندىكتەرىن 50 دە 50 دەپ قالدىرايىق.
+91 كيلو – ولجاس بوقاەۆ - يواندي تويراك
ولجاستىڭ كۋبالىق بوكسشى يواندي تويراكقا قاراعاندا حالىقارالىق ارەناداعى مەن وسى جوباداعى تاجىريبەسى ازداۋ. ولجاس بيىل ەكى كەزدەسۋ وتكىزىپ, ءبىر رەت جەڭسە, ءبىر رەت ۇتىلعان. يواندي دا بيىلعى جوبادا كوپ رينگكە شىعا قويماعان, بىراق تاجىريبە ءوز ءسوزىن ايتۋى كەرەك. دەسە دە, ولجاس بوقاەۆقا الداعى كەزدەسۋدە ساتتىلىك پەن جەڭىس تىلەيمىز.
سونداي-اق, ەگەر نەگىزگى 10 جەكپە-جەكتەن سوڭ كەزدەسۋ 5-5 ەسەبىمەن اياقتالىپ جاتسا, 52 كيلودا قوسىمشا كەزدەسۋ وتكىزىپ, جەڭىمپاز كلۋبتىڭ ەسىمى انىقتالاتىن بولادى. قوسىمشا كەزدەسۋدە «ارلاندار ساپىنان ولجاس باينيازوۆ شىقسا, «كۋبا قابىلاندارى» ساپىنان فرانك زالديۆار سىنعا تۇسەدى.
ءالي بيتورە,
«ەگەمەن قازاقستان»
