قالالىق پوليتسيا ءبولىمىنىڭ باس پوليتسەيى, پودپولكوۆنيك مەيرام بازارباەۆ بۇل جاڭالىق وندىرىسكە قر باس پروكۋراتۋراسى مەن ىشكى ىستەر مينيسترلىگىنىڭ باستاماسىمەن ەنگىزىلگەندىگىن ايتتى. «ازاماتتاردىڭ مۇددەسى ءۇشىن قىلمىستىق پروتسەستى وڭتايلاندىرۋ» بىرىككەن پيلوتتىق جوباسىن جەرگىلىكتى اتقارۋ ورگاندارى دا قۇپتادى. بۇل كابينەت پوليتسيا جۇمىسىنىڭ ناقتىلىعىن, تەرگەۋ كەزىندە ازاپتاۋعا, شىندىقتى ايتقىزۋدىڭ باسقا دا زاڭسىز تاسىلدەرىنە جول بەرمەۋدى قامتاسىز ەتەدى.
«قالالىق باسقارمانىڭ ءبىرىنشى قاباتىندا ەكى اشىق كابينەت اشىلدى, 21 تەرگەۋشى كابينەتىنە باقىلاۋ كامەرالارىن ورناتتىق. كامەرا ءتۇسىرىپ تۇرعان جۇمىس ۇدەرىسىنىڭ بارلىعى ونلاين رەجىمىمەن پوليتسيا عيماراتىنداعى حوللدا ورنالاسقان كەڭ فورماتتى تەلەديداردان كورىنىپ تۇرادى. كۇدىكتىنىڭ جاقىندارى, كەلۋشىلەر, پروكۋراتۋرا قىزمەتكەرى مونيتور ارقىلى بارلىق تەرگەۋ جۇمىسىن كورە الادى», دەدى مەيرام بازارباەۆ.
تاۋلىك بويى ۆيدەوجازبا ىقتيمال سىبايلاستىقتىڭ الدىن الادى. اشىق كابينەتتەردىڭ ەنگىزىلۋىنەن كەيىن پوليتسەيلەر مەن پروكۋرورلار قىلمىستىق ىستەردىڭ تەرگەلۋ مەرزىمى قىسقارادى جانە ارىز-شاعىم ازايادى دەپ كۇتىپ وتىر.
ءنازيرا جارىمبەتوۆا,
«ەگەمەن قازاقستان»
قوستاناي
