ءسوز باسىندا تۇساۋى جاڭا كەسىلگەن ءفيلمنىڭ سيۋجەتتىك جەلىسى تۋرالى از-كەم باياندايتىن بولساق, نەگىزگى وقيعالار استانادا جانە ەلورداعا جاقىن اۋىلداردىڭ بىرىندە وتەدى. استانادا تۇراتىن قالتالى ازاماتتاردىڭ ءبىرى جاڭا ءۇي ساتىپ الادى. سۇيىكتى جارى, بويجەتكەن قىزى بار وتاعاسى قازاقتىڭ ءجون-جورالعىسىن ساقتاپ, قونىستويعا اۋىلداعى تۋعان-تۋىس, قۇربى-قۇرداستارىن شاقىرادى. بىراق ولار اۋىلداعى اعايىندار استاناعا تايلى-تۇياعى قالماي, شۇبىرىپ كەلەدى دەپ كۇتپەسە كەرەك؟! قىسقاسى, قالا مەن اۋىل حالقىنىڭ تۇرمىس-سالتى, مەنتاليتەتى توعىسقان تۇستاعى قايشىلىققا تولى قىزىقتى وقيعالار, قۋانىشتى ساتتەر فيلم ستسەناريىنە ارقاۋ بولىپتى. اۋىل مەن قالا جاستارىنىڭ اراسىندا تۇتانعان سەزىم ارقىلى ماحاببات تاقىرىبى قامتىلعان. بۇل ءبىر قاراعاندا تاپتاۋرىن سيۋجەت, جاتتاندى ستسەناري بولىپ كورىنۋى مۇمكىن. الايدا ءوزىمىز كۇندە كۋا بولىپ جۇرگەن جايتتاردى, پروبلەمالاردى كينو تىلىمەن كۇلدىرە وتىرىپ سويلەتكەندە, ەرىكسىز ەزۋىمىزگە كۇلكى ءۇيىرىلدى. ونىڭ ۇستىنە, قازاق كينوسىنىڭ قورى كومەديالارعا باي دەپ تە ايتا الماسىمىز تاعى بار. بۇل ورايدا, ستسەناري اۆتورى نارعىز يرساليەۆانىڭ ەڭبەگىن اتاپ وتكەن ءجون.
فيلمدە باستى رولدەردى سومداعان قازاقستاننىڭ ەڭبەك سىڭىرگەن قايراتكەرى تۇيمەحان اتىمتاەۆا, م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ اكتەرلەرى اقىش ومار, مايرا ومار, گۇلبارشىن قىلىشباي, تاعى باسقالارى ءوز رولدەرىن شەبەر سومداپ شىقتى دەۋگە بولادى. ينابات ابەنوۆا, داستان بايبوسىنوۆ, جەڭىس ابدىعازين, ساعىندىق توقپاەۆ, ەرعۇلان جانپەيىسوۆ سىندى جاستار دا اعا بۋىننىڭ تاساسىندا قالماۋعا تىرىسىپ باققانى بايقالادى. ياعني, رەجيسسەرى ەلەنا شەستاكوۆا مەن باس پروديۋسەرى ەلەنا گومەردىڭ جاس اكتەرلەرگە ارتقان سەنىمى اقتالعان.
– ءبىز اقجارقىن مىنەزىمەن قالا تۇرعىندارىنىڭ جۇرەگىن جاۋلاپ, جان دۇنيەسىن باۋراپ العان اۋىل ادامدارىن كورسەتكىمىز كەلدى. مەن ءوزىم اقمولا وبلىسى, ساندىقتاۋ اۋدانى, بالقاش اۋىلىنىڭ تۋماسىمىن, بۇل ءوڭىر حالقىنىڭ مىنەز-قۇلقىن جاقسى بىلەمىن. بۇل جاقتىڭ تابيعاتى اسەم, ادامدارى باۋىرمال, شىنايى. جاڭا فيلم ارقىلى ءوزىم تۋىپ-وسكەن جەردىڭ نۋ ورمانىن, كوگىلدىر كولدەرىن كورەرمەنگە كورسەتىپ, قىزىقتىرۋعا تىرىستىم. كورەرمەندەردىڭ كورسەتىلىمنەن كەيىنگى كوتەرىڭكى كوڭىل-كۇيىنە قاراعاندا, ماقساتىمىزعا جەتكەن سيياقتىمىز,– دەيدى ەلەنا گومەر.
ءبىر ايتا كەتەرلىگى, ءفيلمنىڭ از ۋاقىت ىشىندە ساپالى تۇسىرىلۋىنە ساندىقتاۋ اۋدانى مەن بالقاش اۋىلىنىڭ اكىمدىكتەرى دە قولداۋ كورسەتىپتى. وسىلايشا, ساندىقتاۋدىڭ اكىمى اسىلبەك يسماعامبەتوۆ ءوزى باسقاراتىن اۋداننىڭ كورىكتى جەرلەرىن كينو ارقىلى حالىققا ناسيحاتتاپ, وڭىردە ءتۋريزمدى دامىتۋدى كوزدەگەن.
ءتۇسىرۋشى كوماندانىڭ جۇمىسىنا دا قول سوققان ءجون. اقپان ايىندا جۇمىسقا كىرىسكەن ولار باس-اياعى بىرنەشە ايدا كارتينانى تولىق اياقتاپ ۇلگەرىپتى. ءسويتىپ, كينو ماۋسىمى قىزاتىن, ۇلكەن پرەمەرالار ۇلكەن ەكرانعا جول تارتاتىن تۇستا كورەرمەن نازارىنا ۇسىنىلىپ وتىر. پرەمەراسى ءساتتى وتكەن تۋىندىنىڭ كورەرمەندەرى كوپ بولادى دەگەن سەنىم مول.
ارنۇر اسقار,
«ەگەمەن قازاقستان»
