جيىندا ۇلتتىق كومپانيانىڭ باسقارما توراعاسى ماقسات قاباشەۆ ەسەپتى مەرزىم ىشىندە شەتەلدىك ينۆەستورلارمەن بيزنەس-جوبالاردى اشۋ بويىنشا 90 كەزدەسۋ ۇيىمداستىرىلعانىن مالىمدەدى. «كەزدەسۋلەردىڭ دەنى قازاقستان ەكونوميكاسىنىڭ ماشينا جاساۋ, فارماتسەۆتيكا, حيميا, مۇناي-حيميا, اگروونەركاسىپ, مەتاللۋرگيا, وڭدەۋ ونەركاسىبى سياقتى باسىم سالالارىنا ينۆەستيتسيا تارتۋعا باعىتتالدى. شەتەلدىك كومپانيالارمەن 22 ىنتىماقتاستىق تۋرالى كەلىسىمگە قول قويىلدى. امەريكالىق, بريتانيالىق, نەمىس, يسپان, قىتاي جانە تۇرىك ينۆەستورلارى قازاقستاندا ءوز بيزنەستەرىن جۇرگىزۋگە قىزىعۋشىلىق ءبىلدىردى», دەيدى ول. م.قاباشەۆتىڭ ايتۋىنشا, 2017-2018 جىلدارى قۇنى 7,7 ملرد اقش دوللارىن قۇرايتىن 16 ينۆەستيتسيالىق جوبانى ىسكە اسىرۋ جوسپارلانىپ وتىر. سونداي-اق, شەتەلدىك ينۆەستورلاردى تارتۋ عانا ەمەس, وڭىرلەردەگى ينۆەستورلاردى قولداۋ بويىنشا دا جۇمىستار اتقارىلعان.
كومپانيانىڭ شەتەلدىك وكىلدەرى اقش, قىتاي, تۇركيا, كانادا, برازيليا, مەكسيكا سىندى مەملەكەتتەردىڭ الەۋەتتى ينۆەستورلارىمەن 160-تان استام كەزدەسۋلەر مەن كەلىسسوزدەر جۇرگىزگەن. قازاقستانعا امەريكالىق, تۇرىك جانە قىتاي ترانسۇلتتىق كومپانيالارى وكىلدەرىنىڭ ساپارلارى ۇيىمداستىرىلعان. «سولاردىڭ ءبىر ناتيجەسى, جاقىندا قازاقستاندا تۇرىك بيزنەسى جوبالارىنىڭ ىسكە قوسىلۋى جوسپارلانۋدا. مۇندا تارتىلاتىن ينۆەستيتسيالاردىڭ كولەمى شامامەن 36 ملن دوللاردى قۇراسا, بولاشاقتا 300-گە جۋىق جۇمىس ورنى اشىلادى», دەدى «Kazakh Invest» وكىلى. ول جىل سوڭىنا دەيىن 6 رەينۆەستيتسيالىق جوبالار ىسكە قوسىلاتىنىن ايتىپ, وڭىرلەردە دە ينۆەستورلاردى قولداۋ بويىنشا ايتارلىقتاي جۇمىستار اتقارىلعانىن جەتكىزدى. 1 ءساۋىر مەن 11 شىلدە ارالىعىندا كومپانيانىڭ وڭىرلىك بولىمىمەن 115 كەزدەسۋ ءوتىپ, ينۆەستورلاردىڭ 74 ماسەلەسى قارالعان. ونىڭ ىشىندە ۆيزالىق قولداۋ, ليتسەنزيالار الۋ مەرزىمدەرىن وڭتايلاندىرۋ, سەرتيفيكات رەسىمدەۋ, شجك تارتۋ, ءونىمدى وتكىزۋ, كەدەندىك پرەفەرەنتسيالار, جەر تەلىمىن رەسىمدەۋ, گازداندىرۋ, ينفراقۇرىلىم سياقتى 22 ماسەلە وڭ شەشىمىن تاۋىپتى. قازىرگى تاڭدا تاعى 52 ماسەلە جۇمىس ۇستىندە كورىنەدى.
«قازاقستاندىق ەكسپورتتى سۇيەمەلدەۋ, ىلگەرىلەتۋ جانە دامىتۋ سالاسىندا قازاقستاندىق بيزنەستىڭ قاتىسۋىمەن 146 جەرگىلىكتى, 600 شەتەلدىك كومپانيا-
نى قامتيتىن 10 ەلدە 16 ەكسپورتتىق شارا ءوتتى. قول قويىلعان ەكسپورتتىق كەلىسىمشارتتار قۇنى 95,4 ملن دوللارىن قۇرادى», دەدى م.قاباشەۆ.
«ادال ادامدار ەلىنىڭ» مەرەكەسى
ەكسپو-2017 قالاشىعىنداعى ۇلتتىق مەرەكەلەر لەگى جالعاسۋدا. كۇنى كەشە افريكاداعى بۋركينا-فاسو مەملەكەتى ءتول كۇندەرىن اتاپ ءوتتى. وزدەرىن «ادال ادامدار ەلى» دەپ اسپەتتەيتىن ولاردىڭ مەرەكەسىندە ەكى ەلدىڭ تۋى كوتەرىلىپ, ءانۇرانى شىرقالدى.
حالىقارالىق كورمەگە كەلۋشىلەر افريكا پلازا پاۆيلونىن ارالاپ, بۋركينا-فاسو ەلىندە قولدانىلاتىن بالامالى قۋات كوزدەرىمەن تانىستى. سونداي-اق, پاۆيلون الدىنا جيىلعان كورەرمەن-قاۋىم افريكالىق ونەرپازداردىڭ كونتسەرتىن تاماشالادى.
مەملەكەتتەن كەلگەن دەلەگاتسيانىڭ جەتەكشىسى يسسا بەندجامين باگۋيان شارانىڭ رەسمي بولىمىندە ءسوز سويلەپ, قازاقستان باسشىلىعىنا شەكسىز العىسىن جەتكىزدى. «وسىنداي اۋقىمدى حالىقارالىق كورمەگە قاتىسىپ جاتقان بۋركينا-فاسو ەلى ءۇشىن بۇل – ۇلكەن مۇمكىندىك. بالامالى قۋات كوزدەرىنەن ءبىز كۇن ەنەرگياسىن ءجيى پايدالانامىز. 2030 جىلعا دەيىن ەلدەگى كۇن ستانسالارىن كوبەيتۋدى جوسپارلاپ وتىرمىز. وعان تەحنيكالىق جوبالار دا دايىن. ينۆەستيتسيا تارتۋ ماقساتىندا ەلدە كاسىپ جۇرگىزۋ جاعدايىن جەڭىلدەتتىك», دەدى ول.
بۋركينا-فاسو ەلىندە بالامالى قۋات كوزدەرى قاتارىندا كۇن ەنەرگياسى مەن بيوماسسا قالدىقتارى ءجيى قولدانىلادى. افريكانىڭ باتىسىندا ورنالاسقان مەملەكەت قازاقستانعا گەوگرافيالىق ورنالاسۋ جانە حالقىنىڭ سانى جاعىنان ۇقساس بولىپ كەلەدى. بۇرىن جوعارى ۆولتا رەسپۋبليكاسى اتانعان ەل 1984 جىلى اتاۋىن بۋركينا-فاسو دەپ وزگەرتكەن. پاۆيلوندا ماقتانىڭ كوپ كەزدەسۋى بۇل ەلدىڭ افريكا قۇرلىعىندا ماقتا وندىرۋدەن العاشقى ورىندا ەكەنىنەن حابار بەرەدى.
حالقىنىڭ 90 پايىزى اۋىل شارۋاشىلىعىمەن اينالىساتىن بۋركينا-فاسو ەلىنىڭ پاۆيلونىنا قىزىعۋشىلىق تانىتىپ, سول ەلدەن اكەلىنگەن بازارلىقتاردى ساتىپ الىپ جاتقاندار جەتەرلىك. شارا كەزىندە وسى ەلدەن كەلگەن ونەرپازدار جينالعان جۇرتتى وزگەشە ونەرلەرىمەن ءتانتى ەتتى.
توپتامانى دايىنداعان
اسحات رايقۇل,
«ەگەمەن قازاقستان»
سۋرەتتەردى تۇسىرگەن
ەرلان وماروۆ,
«ەگەمەن قازاقستان»
