بۇل بايقاۋعا وتىزدان استام قىسقامەتراجدى كوركەم فيلمدەردىڭ ستسەناريلەرى تۇسسە, ولاردىڭ ىشىنەن بەس جۇمىس ىرىكتەلىپ الىندى. سونىمەن, شىعارماشىلىق-وندىرىستىك بىرلەستىك تاڭداۋى ۆەنەرا قايىرجانوۆانىڭ «تىعىلماق», ارمان بايمۇراتوۆتىڭ «تاقيا», الەن راحمەتاليەۆتىڭ ء«توزىم», بەرىك جاحانوۆتىڭ «كەشىرىم», سونداي-اق, ارداق جىلىسباەۆانىڭ «جۇت» اتتى ستسەناريلەرىنە توقتادى.
شارت بويىنشا بايقاۋعا جاس اۆتورلارمەن قاتار, ءوز ءىسىنىڭ كاسىبي ماماندارى دا قاتىسا الاتىن. بايقاۋعا قاتىسۋشىلاردىڭ ىشىندە كەنجەبەك شايقاقوۆ, عازيز ناسىروۆ, ارداق جىلىسباەۆا جانە تيمۋر ماقاجانوۆ سياقتى بايىرعى تاجىريبەلى اۆتورلار دا بولدى.
«قازاقفيلم» اق ساراپشىلار كەڭەسىنىڭ تەڭ توراعاسى بەكبولات شەكەروۆ بايقاۋ قاعيداسى تۋرالى:
– بىزگە جىبەرىلگەن ستسەناريلەردىڭ ىشىنەن بەسەۋىن ىرىكتەپ الدىق. ولاردىڭ بارلىعى بيىل وندىرىسكە جىبەرىلەدى. ءتورت تۋىندىعا اۆتورلاردىڭ وزدەرى رەجيسسەرلىك ەتەدى. ال «جۇتتىڭ» ستسەناريىن جاندوس ەسپەنبەتوۆ ەسىمدى جاس رەجيسسەرگە بەرۋدى ءجون سانادىق. مۇنداي تاجىريبە «دەبيۋتتىڭ» تاجىريبەسىندە كوپتەن بەرى بولماعان ەدى, – دەدى.
ال «قازاقفيلم» قىسقامەتراجدى كوركەم كارتينالاردى 1959 جىلدان بەرى ءتۇسىرىپ كەلەدى. بەرتىندە كينوستۋديادا «دەبيۋت» شىعارماشىلىق-وندىرىستىك بىرلەستىگى قۇرىلىپ, بۇگىندە ونى انار قاشاعانوۆا باسقارادى. ءبىراز جىلداردان بەرى «دەبيۋت» شىعارماشىلىق-وندىرىستىك بىرلەستىگى بىرقاتار ستسەناريستەردىڭ باعىن اشىپ, جاس كينەماتوگرافيستەردىڭ تانىلۋىنا مۇمكىندىك بەرىپ كەلەدى. بىرلەستىكتىڭ دە باستى ماقساتى – جاس كينەماتوگرافيستەردى ستسەناري جازۋدان باستاپ, پوست-پروداكشنعا دەيىنگى كينو ءوندىرىسىنىڭ ۇدەرىسىمەن تانىستىرۋ.
ايناش ەسالي,
«ەگەمەن قازاقستان»
الماتى
