شىلدە – جازدىڭ ەڭ ىستىق ايى. ادەتتە, كۇن ىستىقتا اق ەشكىنىڭ اجەم تۇتكەن تۇبىتىندەي اقشا بۇلتتار اسپاندا قالقىر ەدى. كۇن ساۋلەسىمەن شاعىلىسىپ, كەيدە قاقتالعان اق كۇمىس جۇزگەندەي اسەر دە بەرەتىن. بيىلعى جازدا قوستانايلىقتار ءدال سونداي اقشا بۇلتتى كوپ بايقاماعانى راس. جوڭكىگەن قورعاسىنداي اۋىر بۇلتتار شىلدەنى ەمەس, كۇزدى ەسكە سالادى. شىلدە ايى تۋعاندا وبلىستىڭ وڭتۇستىگىندەگى اۋليەكول اۋدانىنا قاراستى ديەۆ اۋىلىنىڭ ۇستىنە ۇيىرىلگەن بۇلتتى اۋىل تۇرعىنى پاۆەل گروموۆ ۇيالى تەلەفونىنا ءتۇسىرىپ العان ەكەن. ول الەۋمەتتىك جەلىلەردى دۇرىلدەتتى.
– قورقىنىشتى, قويۋ بۇلت قۇيىن سەكىلدى اۋىلدى وراپ الاتىنداي كورىندى. مەن تۇسىرگەن سوڭ ارتىنشا تاسىرلاتىپ بۇرشاق جاۋدى, – دەيدى پ.گروموۆ. شىلدەنىڭ باس كەزىندە اسپان جارىلىپ, جەرگە تۇسكەندەي كۇركىرەپ, قاتتى نايزاعاي ويناعان جاڭبىرلى كۇندەر از بولمادى. ونى «كازگيدرومەت» اۋا رايىن بولجاۋ ورتالىعى وبلىستىق فيليالىنىڭ ماماندارى ىلعالدىڭ مولدىعىنان دەپ وتىر.
– اسپاندا بۇلتتاردىڭ باۋىرلاپ جوڭكۋى – ادەتتە مۇحيتتارعا جاقىن تەڭىز كليماتىنا ءتان قۇبىلىس. سوڭعى ۋاقىتتا اتلانت مۇحيتىنان سوققان قۋاتتى تسيكلوندار ىلعالى مول بۇلتتاردى ايداپ كەلدى. شىلدەنىڭ «شىرقىن بۇزعان» «كۇزگى» جانە «قۇيىن» بۇلتتارعا كوزىمىز ۇيرەنبەي جاتقانى وسىدان, – دەيدى «كازگيدرومەت» اۋا رايىن بولجاۋ ورتالىعى وبلىستىق فيليالىنىڭ ينجەنەر-سينوپتيگى ۆالەنتينا زاگرەبينا.
اۋا رايىن بولجاۋشىلاردىڭ ايتۋىنا قاراعاندا, توبىل وڭىرىندە شىلدە ايىنىڭ اياعىنا دەيىن شىلىڭگىر ەمەس, جاڭبىرلى بولايىن دەپ تۇر.
ءنازيرا جارىمبەتوۆا,
«ەگەمەن قازاقستان»
قوستاناي
