الەمدىك دوداعا ەلىمىزدىڭ اتىنان سىنعا تۇسكەن ءسابينا دوپپەن جاتتىعۋ سايىسىندا 16.850 ۇپاي جيناپ, جارىستىڭ كۇمىس جۇلدەسىن يەلەندى. التىن مەدالدى رەسەيلىك ەكاتەرينا سەلەزنيوۆا – 17.450 ۇپاي كورسەتكىشىمەن جەڭىپ الدى. ال ۇزدىك ۇشتىكتى بەلارۋس قىزى گالكينا كاتەرينا قورىتىندىلادى. ونىڭ ناتيجەسى – 16.450 ۇپاي.
سونداي-اق, ءاليا يۋسۋپوۆانىڭ شاكىرتتەرى جاقىندا ەلورداداعى «داۋلەت» تەننيس ورتالىعىندا ۇيىمداستىرىلعان كوركەم گيمناستيكادان سەنورلار اراسىنداعى توعىزىنشى جانە ءجاسوسپىرىم قىزدار اراسىنداعى حV ازيا چەمپيوناتىنا قاتىسىپ, جالپى سانى 12 مەدال يەلەنگەن ەدى. ازيا بىرىنشىلىگىنە سارىقۇرلىقتىڭ 14 ەلىنەن كەلگەن 153 سپورتشى ءوز باقتارىن سىناعان بولاتىن.
چەمپيوناتتىڭ العاشقى كۇنىندەگى كوماندالىق جارىستا قازاقستان قۇراماسى ساپىنان ريو وليمپياداسىنا قاتىسقان ءسابينا اشىرباەۆا, سونداي-اق, ءالينا ءادىلحان, اننا افۋكسەنيدي جانە سەلينا جۇماتاەۆالار قاتىسىپ, ازيا چەمپيونى اتاندى.
ال جەكەلەي سىندا دوپپەن جانە شەڭبەرمەن جاتتىعۋ سايىسىندا ءسابينا اشىرباەۆا التىن مەدال يەلەنسە, شەڭبەرمەن جاتتىعۋدا ءالينا ءادىلحانوۆا مەن توپتىق باسەكەدە ەل نامىسىن قورعاعان رەگينا سۇلتانوۆا, دايانا جاقىپوۆا, انەل تالعاتبەك, كاميلا كوپتىلەۋ, ارۋجان قازبەكوۆا, دينارا ەرعاليەۆالار چەمپيوناتتىڭ قولا جۇلدەگەرى اتاندى.
سونىمەن قاتار, جاسوسپىرىمدەر اراسىنداعى كوماندالىق باسەكەدە قازاقستان قۇراماسى ساپىنان سىنعا تۇسكەن ءاديليا تىلەكەنوۆا, روزا ءابىتوۆا, دايانا ابدىربەكوۆالار ازيا چەمپيوناتىنىڭ التىن مەدالىن يەلەندى.
توپتىق كەزەڭدە جارىسقا تۇسكەن ساعينا مۇراتقىزى, ايزا رۇستەمقىزى, داريا شارافيدەنوۆا, ءدىلناز مۇسابەكوۆا, رايانا سۇلەيمەن جانە رەناتا جولدىنوۆالار كۇمىس جۇلدەگەر اتاندى. ءۇش كۇنگە سوزىلعان ازيا چەمپيوناتىندا قازاقستان ۇلتتىق قۇراماسى جالپى سانى 12 مەدال يەلەندى. ونىڭ التاۋى التىن, ەكەۋى كۇمىس جانە تورتەۋى قولا.
ايتا كەتەيىك, كوركەم گيمناستيكادان جىل سايىن وتەتىن ازيا چەمپيوناتى بيىل قازاقستاندا وسىمەن ءتورتىنشى رەت ۇيىمداستىرىلدى.
ءالي بيتورە,
"ەگەمەن قازاقستان"
