سامبو
سامبو سپورتىنان قازاقستان ۇلتتىق قۇراماسى ەرلەر مەن ايەلدەر اراسىنداعى سپورتتىق جانە اسكەري سامبو بويىنشا قازاقستان رەسپۋبليكاسى پرەزيدەنتىنىڭ جۇلدەسىنە ارنالعان الەم كۋبوگىندا توپ جاردى.
جارىستى ەكسپو-2017 كورمەسى اياسىندا حالىقارالىق سامبو فەدەراتسياسى ۇيىمداستىردى. پرەزيدەنت كۋبوگىنا الەمنىڭ 16 ەلىنەن 200-دەن استام سپورتشى قاتىسقان. جالپى, كوماندالىق ەسەپتە 13 التىن, 12 كۇمىس, 29 قولا مەدالمەن قازاقستان ۇلتتىق قۇراماسى ءبىرىنشى ورىن الىپ, كۋبوك يەگەرى اتاندى. ەكىنشى ورىندى گرۋزيا يەلەنسە, رەسەي قۇراماسى ۇزدىك ۇشتىكتى قورىتىندىلادى.
تەننيس
قازاقستاندىق تەننيسشىلەر لوندوندا ءوتىپ جاتقان ۋيمبلدون-2017 «ۇلكەن دۋلىعا» تۋرنيرىندەگى جورىعىن اياقتادى. قىزدار اراسىندا قازاقستاننىڭ ءۇشىنشى ءنومىرلى تەننيسشىسى زارينا دياس ءۇشىنشى اينالىمعا دەيىن جەتسە, ەلىمىزدىڭ ءبىرىنشى راكەتكاسى يۋليا پۋتينتسەۆا لاتۆيالىق اناستاسيا سەۆاستوۆادان ءبىرىنشى اينالىمدا-اق ۇتىلىپ قالعان بولاتىن.
ەرلەر اراسىنداعى باسەكەدە ميحايل كۋكۋشكين العاش جاپونيالىق تەننيسشى دانيەليا تارومەن ءتورت سەت ويناپ, 4:6, 6:4, 7:6, 6:2 ناتيجەسىمەن جەڭىسكە جەتسە, ەكىنشى اينالىمدا الەمنىڭ ءنومىرى 30-راكەتكاسى گەرمانيالىق ميشا زۆەرەۆتەن ۇتىلىپ قالدى. ال الەكساندر بۋبليك ءتۋرنيردىڭ ءبىرىنشى اينالىمىندا الەمنىڭ ءبىرىنشى راكەتكاسى بريتانيالىق ەندي ماررەيدەن ۇتىلىپ, جارىستى ەرتە اياقتاعان ەدى.
كۇرەس
قازاقستاندىق بالۋاندار كۇرەس تۇرلەرىنەن پولشادا وتكەن حالىقارالىق تۋرنيردەن جۇلدەلى ورالدى. ەركىن كۇرەستەن 57 كيلودا كۇرەسكەن بالۋان نۇريسلام ساناەۆ ءتۋرنيردىڭ چەمپيونى اتاندى. اتالعان جارىستا ساناەۆتىڭ بىرىڭعاي قازاقستاندىق پالۋاندارمەن بەلدەسۋىنە تۋرا كەلدى. ولار: عابيت تولەپباي, ەرنۇر قاباتاەۆ, جاندوس ىسمايىلوۆ. ناتيجەسىندە, 57 كگ سالماقتا كۇمىس جۇلدەنى جاندوس ىسمايىلوۆ يەلەنسە, عابيت تولەپبايعا قولا جۇلدە بۇيىردى. سونداي-اق, ازامات داۋلەتبەكوۆ (86 كگ) پەن ەرمۇحامەد ىڭكار (125 كگ) قولا جۇلدەگە يە بولدى.
ءالي بيتورە,
«ەگەمەن قازاقستان»
