ونىڭ قۇرامىندا وبلىستاعى بەلگىلى عالىمدار, ستۋدەنتتەر, ولكەتانۋشىلار بار. سەگىز ادام قوستاناي قالاسىنان اتتانادى, قالعانى امانكەلدى, جانكەلدى اۋداندارىنان قوسىلادى, بارلىعى 20 ادامدى قۇرايدى. «نۇر شاڭىراق» قوعامدىق قورى قولدايتىن ەكسپەديتسيانى فيلولوگيا عىلىمدارىنىڭ دوكتورى الماس ابسادىق باسقارادى. ەكسپەديتسيا مۇشەلەرى اتتانار الدىندا بۇقارالىق ءباسپاسوز قۇرالدارى وكىلدەرى ءۇشىن بريفينگ وتكىزدى.
«ەكسپەديتسيا ماقساتى–كەيكى باتىر تۋرالى ەل اۋزىندا قالعان, ءالى دە بەلگىسىز, ءبىز بىلمەيمىز-اۋ دەگەن اڭگىمەلەردى, اقپاراتتاردى جيناۋ بولىپ تابىلادى. ەل تاۋەلسىزدىگى ءۇشىن وتكەن عاسىردا بولعان ءىرى وقيعالاردىڭ بەل ورتاسىندا بولعان حالىق باتىرى تۋرالى ەل اراسىندا ايتىلاتىن اڭگىمەلەر ءالى دە بار دەپ ويلايمىز. باتىردىڭ باس سۇيەگى ەلگە الدىرىلىپ, ونىڭ بەت الپەتى قالپىنا كەلتىرىلىپ, كۇزدە تۋعان جەر قوينىنا تاپسىرىلايىن دەپ جاتقاندا, تۋعان جەرىندە قول قۋسىرىپ وتىرعانىمىز جاراسپاس دەگەن پاتۋامەن وسىلاي جولعا شىعۋعا بەل بۋدىق» دەدى الماس ابسادىق.
«كەيكى دالا باتىرلارىنىڭ ءبىرى عانا ەمەس, دالانىڭ سوڭعى كوكجالىنىڭ دا ءبىرى, تاعدىرى دا, ءولىمى دە وتە جۇمباق تۇلعا. ول تۋرالى قانشا ايتساق تا, جازساق تا, ىزدەستىرسەك تە ارتىق ەمەس. ال ەكسپەديتسيا ماقساتى–جاس ۇرپاقتىڭ ەلگە, جەرگە دەگەن پاتريوتتىق سەزىمىن وياتۋ, تاربيەلەۋ» دەدى ەكسپەديتسيا مۇشەسىنىڭ ءبىرى فيلوسوفيا عىلىمدارىنىڭ كانديداتى, پروفەسسور قالقامان جاقىپ.
ەكسپەديتسيا قۇرامىنا كىرگەن اقمارال ەرالينا وتكەن جىلى 100 جىلدىعى تويلانعان ۇلت ازاتتىق كوتەرىلىسىن زەرتتەگەن تاريحشىنىڭ, تورعاي تۋماسىنىڭ ءبىرى. ول جۋرناليستەرگە ەكسپەديتسيا كەيكى قاتىسقان قاقتىعىستار بولعان ورىنداردىڭ بارلىعىنا باراتىندىعىن ايتتى.
«تاۋەلسىزدىك, ەركىندىك رۋحى تورعايدان باستالدى, وندا كوپ قان توگىلدى. بۇگىندە تورعاي جەرىندە اتالار سۇيەگى قالعان جەردىڭ بارلىعى دا قاسيەتتى ورىندار دەپ اتالۋى ءتيىس. ەكسپەديتسيا سول ورىنداردىڭ بارلىعىن تاعى دا ارالايدى, جەرگىلىكتى تۇرعىندارمەن كەزدەسۋلەر وتكىزەدى, مۋزەيلەردى ارالايدى. ەكسپەديتسيا جۇمىسى رۋحاني, سانانى جاڭعىرتۋ جۇمىستارىنا ۇلەس بولىپ قوسىلادى» دەدى اقمارال.
12 شىلدەدە اتتانعان ەكسپەديتسيا 17 شىلدەدە قايتىپ ورالادى. وبلىستىق ىشكى ساياسات باسقارماسىنىڭ « ۇلى دالا تۇلعالارى» اتتى جوباسىنىڭ قۇرامىنا كىرەتىن ەكسپەديتسيا جۇمىسىنىڭ قورىتىندىسى بويىنشا دەرەكتى فيلم ءتۇسىرىلىپ, فوتوالبوم جاسالادى. كۇزدە كەيكى باتىر سۇيەگىن جەرلەۋدى راسىمدەۋ اياسىندا وتەتىن كونفەرەنتسيادا ونىڭ تۇساۋكەسەرى كوپشىلىك نازارىنا ۇسىنىلماق.
ءنازيرا جارىمبەتوۆا,
«ەگەمەن قازاقستان»
