رەناتا تەبالدي اتىنداعى بايقاۋدىڭ نەگىزىن قالاۋشى ءارى ديرەكتورى, لۋچانو ءپاۆاروتتيدىڭ ارىپتەسى, ماەسترو اۋگۋستو چياۆاتتا, سونداي-اق, لا سكالا تەاترىنىڭ ايگىلى ۆيولونچەل شەبەرى كلاۋديو كازادەي ءتارىزدى تالعامى بيىك ادىلقازىلار القاسىن ءوز ونەرىمەن ءسۇيسىنتىپ قايتقان قازاق بالاسىنىڭ بۇل ءبىر عانا جەتىستىگى ەمەس. وسى جىلدىڭ ءساۋىر ايىندا رەسەيدىڭ سانكت-پەتەربۋرگ قالاسىنداعى ورىستىڭ اتاقتى وپەرا ءانشىسى ەلەنا وبرازتسوۆا زالىندا جەكە وپەرالىق كونتسەرتىن وتكىزگەن قۋات باعىسبەك تەك شەتەل كومپوزيتورلارىنىڭ تۋىندىلارىن عانا ەمەس, قازاق حالىق اندەرىن دە ورىنداپ, كورەرمەندەردىڭ ىستىق ىقىلاسىنا بولەنگەن. ايرىقشا داۋىستى جاس تالانتتىڭ جوعارعى دەڭگەيدە وتكەن كەشىن رف ەڭبەك سىڭىرگەن ءارتىسى ماريا رومانوۆا جۇرگىزسە, رەسەيلىك تانىمال پيانيست دميتري ميانچين مۋزىكالىق سۇيەمەلدەۋشى بولعان.
بالا كەزدەن رەسپۋبليكالىق جانە الىس-جاقىن شەتەلدەردەگى ءان بايقاۋلارىنا قاتىسىپ, جەڭىمپاز اتانىپ جۇرگەن قۇرمانعازى اتىنداعى قازاق ۇلتتىق كونسەرۆاتورياسىنىڭ تۇلەگى سونداي-اق, لوندوندا جەكە كونتسەرتىن دە وتكىزىپ ۇلگەرىپتى. قر تاۋەلسىزدىگىنىڭ 25 جىلدىعىنا ارناپ الماتىدا دا جەكە كونتسەرتىن وتكىزگەن تەنور داۋىستى دارىندى ءانشى قۋات باعىسبەكتىڭ الەم ساحنالارىندا تەك وپەرا عانا ەمەس, اريالاردى, كلاسسيكالىق اندەردى دە شىرقاپ, ەلدەر اراسىنداعى مادەني الماسۋلار باعىتىنداعى شارالارعا اتسالىسىپ جۇرگەنىن ايتا كەتكەن ءجون.
يتالياداعى بايقاۋدان العان جۇلدەسىن الدىمەن «ەگەمەن قازاقستان» رەداكتسياسىنا كورسەتىپ, ءسۇيىنشى سۇراعان ءانشىنىڭ ءوزى: «مۇنداي حالىقارالىق بايقاۋلارعا قاتىسۋ ءۇشىن ۇلكەن ىرىكتەۋلەردەن, ءتۇرلى سىننان سۇرىنبەي ءوتۋ قاجەت... ەندى الداعى ۋاقىتتا جارتى جىل شەتەلدە ءبىلىمىمدى شىڭداسام دەگەن جوسپارىم بار», – دەپ, ءوز قۋانىشىمەن ءبولىستى. انگليا, گرەكيا, گەرمانيا, وڭتۇستىك كورەيا, تۇركيا, ليتۆا, رەسەيدىڭ ۇلكەن ساحنالارىندا وپەرا, كلاسسيكالىق كروسسوۆەر, پوپ-مۋزىكا مەن فولكلور سىندى ءتۇرلى جانردا, ءتۇرلى ءداۋىردىڭ ءتۇرلى مانەرىندە ءان شىرقاپ جۇرگەن, الەمدىك مۋزىكا قازىناسىنىڭ ساناتىنا ەنگەن قازاق حالىق اندەرىن ناسيحاتتاۋدى ماقسات ەتكەن قۋاتتىڭ دا قۋاتتى داۋىسپەن ءالى تالاي شىڭدى باعىندىرىپ, ەلىمىزدىڭ اتىن اسقاقتاتارى انىق.
ميرا بايبەك,
«ەگەمەن قازاقستان»
