پولشانىڭ قورعانىس ءمينيسترى بوگدان كليحا رەسمي تۇردە اقش-تىڭ ءوز ەلىندە “پاتريوت” زەنيت-زىمىراندىق كەشەنىن ورنالاستىرماق جوسپارىن راستادى. جانە ول بۇرىن كەلىسكەندەي, ۆارشاۆا ماڭىندا ەمەس, رەسەيدىڭ كالينينگراد انكلاۆ-وبلىسىنىڭ شەكاراسىنان 100 شاقىرىم جەرگە ورنالاسپاق. وعان تۇسىنىكتەمە بەرگەن رەسەيدىڭ ناتو-داعى تۇراقتى وكىلى دميتري روگوزيننىڭ بۇل كەشەن وبلىس-انكلاۆتى تولىق اتقىلاي الادى دەگەنى نەگىزسىزدەۋ. ويتكەنى “پاتريوت” زىمىراندارى بار-جوعى 80-100 شاقىرىمعا عانا جەتەدى. ول وسىنداي قاشىقتىققا جاقىنداعان نىساندى عانا اتا الادى. ونىڭ سيپاتى – قورعانىستىق.
ءدىن ارازدىعى جامان
نيگەريانىڭ سولتۇستىگىندە مۇسىلماندار مەن حريستياندار اراسىنداعى قاقتىعىستان 149 ادام قازا تاۋىپ, 300-دەي ادام جاراقات الىپتى. قاقتىعىس توقتادى دەگەنمەن, ونىڭ قايتا بۇرق ەتە قالۋ قاۋپى بار كورىنەدى. ال بۇل ەلدە مۇنداي قاقتىعىسقا ايتارلىقتاي نەگىز بار. تەك افريكادا عانا ەمەس, بۇكىل الەمدەگى حالقى كوپ ەلدەردىڭ ءبىرى سانالاتىن (130 ميلليونداي ادام, الەمدە توعىزىنشى ورىندا) نيگەريا حالقىنىڭ 40 پايىزى – حريستياندار, 40 پايىزى – مۇسىلماندار. اركەز ءدىني نەگىزدە قاقتىعىستار بولىپ تۇرادى. ارانداتۋشىلار تابىلسا, وكىنىشكە قاراي وندايلار جەتكىلىكتى, بەيبىت حالىقتىڭ دەلەبەسى قوزادى. ال ونىڭ ارتى – قانتوگىس.
بەرلۋسكونيدىڭ 36 ءتىسى بار
يتاليانىڭ پرەمەر-ءمينيسترى سيلۆيو بەرلۋسكوني اركەز ءبىر جاعدايعا ۇشىراپ جۇرەدى. بىردە ونىڭ بيزنەسىنەن شي شىعىپ جاتادى, بىردە ايەلدەرمەن بايلانىسى ءسوز بولادى, تاعى بىردە... بىلتىر ءبىر كەڭكەلەس ونىڭ تۇمسىعىن بۇزىپ, ءبىراز ءتىسىن قيراتقانى بار. سوعان بايلانىستى ول جاقىندا مالىمدەمە جاساپ, دارىگەرلەردىڭ ءوزىنىڭ ءبىر ءتىسىن الىپ تاستاعانىن, ءالى دە 35 ءتىسى بارلىعىن حابارلادى. ادەتتە ادامدا 32 ءتىس بولار ەدى. ال بەرلۋسكونيدىڭ 4 ءتىسى ارتىق كورىنەدى.
الداپ الىسقا بارمايسىڭ
بولگاريانىڭ سىرتقى ىستەر ءمينيسترى رۋميانا جەلەۆا ەۋروكوميسسيانىڭ حالىقارالىق ىنتىماقتاستىق جانە قايىرىمدىلىق كومەك جونىندەگى ەۋروكوميسسارى قىزمەتىنە بارۋدان باس تارتتى, سونداي-اق ءوزىنىڭ مينيسترلىك قىزمەتىنەن دە كەتەتىنىن مالىمدەدى. بۇعان ول ماجبۇرلىكپەن بارعان كورىنەدى. جاڭا قىزمەتتى بەكىتەتىن ەۋروپارلامەنتتە بولگاريادان سايلانعان ءبىراز دەپۋتاتتار ءمينيستردىڭ ءوز تابىستارىن جاسىرعانىن ايتىپتى. ءتىپتى ونىڭ كۇيەۋىنىڭ ۇيىمداسقان قىلمىسقا قاتىسى دا ءسوز بولعان. مۇنداي “مىنەزدەمەمەن” ەۋرووداقتىڭ تورىنە شىعۋ قيىن.
پرەزيدەنتتىڭ قىزى – ەلشى
وزبەكستان پرەزيدەنتى يسلام كاريموۆ ءوزىنىڭ ۇلكەن قىزى گۇلناردى ەلدىڭ يسپانياداعى ەلشىسى ەتىپ تاعايىنداعان بولاتىن. وتكەن اپتادا گ.كاريموۆا سەنىم گراموتاسىن تاپسىردى. ەل ىشىندە پرەزيدەنتتىڭ قىزى جايىندا اڭگىمە كوپ. ەسترادا ءانشىسى دە بولعان, بيزنەسپەن دە اينالىسقان, ونىڭ ىشىندە قىمبات اشەكەي بۇيىمدارمەن اينالىسۋعا اۋەس بولدى. ال ديپلوماتيالىق جۇمىستا دا ول توسىن ادام ەمەس. ماسكەۋدەگى ەل ەلشىلىگىندە كەڭەسشى, بۇۇ-نىڭ جەنەۆاداعى وكىلدىگىندە ءوز ەلىنىڭ مۇددەسىن قورعاسا, سىرتقى ىستەر ءمينيسترىنىڭ ورىنباسارى قىزمەتىن دە اتقاردى.
اركا ورنىنا – مونۋمەنت
تۇركىمەنستان پرەزيدەنتى گۋربانگۋلى بەردىمۇحامەدوۆ ەل استاناسىنىڭ ورتاسىنداعى بەيتاراپتىق (نەيتراليتەت) اركاسىن الىپ تاستاپ, ونىڭ ورنىنا قالانىڭ شەت جاعىنان بەيتاراپتىق مونۋمەنتىن تۇرعىزۋ جونىندە جارلىق شىعاردى. بۇرىنعى اركانىڭ بيىكتىگى 63 مەتر بولاتىن دا, ونىڭ ۇشار باسىنا ساپارمۋراد نيازوۆتىڭ 12 مەترلىك ەسكەرتكىشى ورناتىلعان ەدى. التىنمەن اپتالعان بۇل ەسكەرتكىش كۇنگە قاراي اينالىپ تۇراتىن. ەندى جاڭا بەيتاراپتىق مونۋمەنتىنىڭ بيىكتىگى بۇرىنعى اركادان دا اسىپ ءتۇسىپ, 95 مەتر بولماق.
ورىستاردىڭ تۇبىنە اراق جەتەدى
رەسەيدىڭ دەنساۋلىق ساقتاۋ ءمينيسترى تاتيانا گوليكوۆا ەل پرەزيدەنتى دميتري مەدۆەدەۆكە سوڭعى 14 جىلدان بەرى ەلدە العاش رەت حالىق سانى ازايماعانىن, قايتا بىلتىر 15-25 مىڭعا وسكەنىن حابارلاپتى. الىپ دەرجاۆا ءۇشىن بۇل ايتارلىقتاي ءوسىم ەمەس قوي, بىراق ازايعاننىڭ توقتاعانىنىڭ ءوزى قۋانىش. بۇل ءوسىم سىرتتان كەلگەندەردىڭ ەسەبىنەن ەكەن. ايتپەسە, بۇل ەلدە تۋعانداردان ولگەندەردىڭ سانى كوپ. 1992 جىلدان بەرى ەلدىڭ حالقى جەتى ميلليونعا كەمىپتى. الدا دا كەميتىن كورىنەدى. وسى عاسىردىڭ ورتاسىندا حالقى 30 پايىزعا ازايماق. دۇنيەجۇزىلىك دەنساۋلىق ساقتاۋ ۇيىمىنىڭ پايىمداۋىنشا, ونىڭ باستى سەبەبى – ىشكىلىك.
ازىرلەگەن ماماديار جاقىپ.
