الماتى قالاسى پوليتسيا دەپارتامەنتىندە ءىرى جەتكىزۋ قىزمەتتەرى اگرەگاتورلارىنىڭ وكىلدەرى, پروكۋراتۋرا, قالالىق قىزمەتتەر مەن جۇرتشىلىق وكىلدەرىنىڭ قاتىسۋىمەن كەڭەيتىلگەن كەڭەس ءوتتى. جيىندا تۇرعىنداردىڭ قاۋىپسىزدىگىن ارتتىرۋ, زاڭناما تالاپتارىنىڭ ساقتالۋىن قامتاماسىز ەتۋ جانە كۋرەرلىك قىزمەت سالاسىنداعى بيزنەستىڭ جاۋاپكەرشىلىگىن كۇشەيتۋ ماسەلەلەرى تالقىلاندى.
الماتى قالاسى پوليتسيا دەپارتامەنتىنىڭ باستىعى ايدىن كابدۋلدينوۆ جەتكىزۋ نارىعىنىڭ قارقىندى دامىپ كەلە جاتقانىن اتاپ ءوتىپ, سونىمەن قاتار ازاماتتاردىڭ قاۋىپسىزدىگى ءاردايىم باسىم باعىت بولۋى ءتيىس ەكەنىن ايتتى.
ء«اربىر كۋرەر تۇرعىن ۇيلەرگە كىرىپ, ازاماتتاردىڭ جەكە دەرەكتەرى مەن ولاردىڭ تۇرمىس-تىرشىلىگىنە قاتىستى مالىمەتتەرگە جاناما تۇردە قول جەتكىزەدى. سوندىقتان ءبىز كۋرەرلەردى جۇمىس پروتسەسىنىڭ بارلىق كەزەڭىندە بيومەتريالىق سايكەستەندىرۋدى ەنگىزۋدى, اككاۋنتتاردى ءۇشىنشى تۇلعالارعا بەرۋگە قاتاڭ تىيىم سالۋدى, شەتەلدىك جۇمىس كۇشىن تارتۋ ماسەلەسىن رەتتەۋدى جانە جول قوزعالىسى قاعيدالارىنىڭ ساقتالۋىن تۇراقتى باقىلاۋدا ۇستاۋدى تالاپ ەتەمىز», دەدى مەگاپوليس باسشىسى.
ءوز كەزەگىندە الماتى قالاسى پروكۋراتۋراسىنىڭ وكىلى جەتكىزۋ نارىعىنا قاتىسۋشىلاردىڭ بارلىعى زاڭ تالاپتارىن مۇلتىكسىز ورىنداۋى ءتيىس ەكەنىن اتاپ ءوتتى. ول اگرەگاتور كومپانيالاردىڭ قىزمەتىنىڭ زاڭدىلىعىن قامتاماسىز ەتۋ, مەملەكەتتىك ورگاندارمەن ءتيىمدى اقپارات الماسۋ تەتىكتەرىن جولعا قويۋ جانە تارتىلعان قىزمەتكەرلەردىڭ قۇقىقتىق مارتەبەسىن تەكسەرۋ ماسەلەلەرىنە نازار اۋداردى. پروكۋراتۋرا وكىلى مەملەكەت پەن بيزنەستىڭ بىرلەسكەن ءىس-قيمىلى ازاماتتاردىڭ قۇقىقتارى مەن زاڭدى مۇددەلەرىن قورعاۋدىڭ باستى كەپىلى ەكەنىن جەتكىزدى.
كەڭەس بارىسىندا پلاتفورمالاردىڭ ىشكى رەگلامەنتتەرىن قولدانىستاعى زاڭناماعا سايكەستەندىرۋ, كۋرەرلەرگە قاتىستى باقىلاۋدى كۇشەيتۋ, قاۋىپسىزدىككە نۇقسان كەلتىرۋى مۇمكىن شامادان تىس جەدەل جەتكىزۋدى ىنتالاندىرۋ تەتىكتەرىن قايتا قاراۋ جانە بارلىق قىزمەتكەرلەردىڭ زاڭدى مارتەبەسىن قامتاماسىز ەتۋ قاجەتتىگى ايتىلدى.
جيىندى قورىتىندىلاعان ايدىن كابدۋلدينوۆ جەتكىزۋ سەرۆيستەرىنىڭ قاۋىپسىز ءارى زاڭ اياسىندا جۇمىس ىستەۋى – بيزنەستىڭ جوعارى الەۋمەتتىك جاۋاپكەرشىلىك ايماعى ەكەنىنە تاعى دا توقتالدى.
الماتىدا كۋرەر مەن تاپسىرىس بەرۋشى اكىمشىلىك جاۋاپقا تارتىلدى
«ەگەر جۇيەلى وزگەرىستەر ەنگىزىلمەسە, پوليتسيا دەپارتامەنتى نورماتيۆتىك رەتتەۋدى كۇشەيتۋ جانە اگرەگاتورلاردىڭ جاۋاپكەرشىلىگىن ارتتىرۋ بويىنشا قوسىمشا شارالار قابىلداۋعا باستاماشىلىق ەتەدى. الماتى – ەلىمىزدىڭ ەڭ ءىرى مەگاپوليسى. سوندىقتان زاماناۋي سەرۆيستەردىڭ قاۋىپسىز قىزمەتىن قامتاماسىز ەتۋ – ورتاق مىندەت. تسيفرلىق ەكونوميكانىڭ دامۋى ازاماتتاردى قورعاۋ تەتىكتەرىنىڭ كۇشەيۋىمەن قاتار ءجۇرۋى ءتيىس», دەپ تۇيىندەدى ول.
الاياقتاردىڭ ايلاسى وزگەردى: ەندى اقشانى «كۋرەر» بولىپ الىپ كەتەدى
