ءيا, الدىمەن سۋرەتتىڭ شەتكى جيەكتەرىن ۇستارانىڭ جۇزىندەي لىپىپ تۇرعان كونكيدىڭ ۇشىمەن سالىپ شىقتى. سودان سوڭ عانا سۋرەتتىڭ ىشكى بولىگىنە قۇتىداعى ءتۇرلى ءتۇستى اەروزول سىرلارمەن وزگەشە ءبىر ءوڭ بەردى. تۇكتى كىلەمنىڭ بەتىنە سالىنعان تاماشا سۋرەتتىڭ استىنا «وسى تاريحي ءساتتى ەلىمىز ءۇشىن ماڭگىلىككە بەينەلەپ قالدىردىم!» دەپ جازبا جازدى. ونى ول ءوزىنىڭ ينستاگرام پاراقشاسىنا جۇكتەدى. بىلە بىلگەن جانعا وسىنىڭ ءوزى ۇلكەن ونەر عوي. قايبىر جىلدارى بوكس قولباعىن كيىپ الىپ تا, تاماشا تۋىندى جاساپ شىققاندىعىن جۇرتشىلىق ۇمىتا قويماسا كەرەك. ال گەننادي گولوۆكيننىڭ پورترەتىن استاناداعى رينگ تورىندە سالىپ شىققانىن كوپشىلىك قاۋىم بىلە بەرمەس.
2021 جىلى ديماشتىڭ سۋرەتىن سالىپ باستاعان ول كەيىننەن ابايدىڭ, باتىرحان شۇكەنوۆتىڭ, جانار دوعالوۆانىڭ, سكريپتونيتتىڭ سۋرەتتەرىن سالدى. ودان بولەك ەننيو مورريكونەنىڭ, مەسسيدىڭ دە پورترەتتەرىن جاساپ شىقتى. ال دجەكي چان, دجەننيفەر لوپەستىڭ بەينەسىن كىلەمگە بەدەرلەپ, ونى وزدەرىنە سىيلىق رەتىندە سىيلاپ تا ۇلگەردى. ءاربىر سۋرەتىنە اسەر بەرۋگە اۋەس اسەلدىڭ بۇل كۇندە الماتى شاھارىندا جەكە سۋرەت ستۋدياسى بار. وندا ول سوڭىنان ەرگەن تالانتتى شاكىرتتەرىن بەينەلەۋ ونەرىنە باۋلۋ ىسىمەن شىنداپ اينالىسادى.
