ەكسپوزيتسيا قازاقستاننىڭ حالىق ءارتىسى, اكتەر ءارى وپەرا ءانشىسى كاۋكەن كەنجەتاەۆتىڭ 110 جىلدىعى مەن قازاقستاننىڭ ەڭبەك سىڭىرگەن ءارتىسى, كينواكتەر مەڭتاي وتەپبەرگەنوۆتىڭ 80 جىلدىعىنا ارنالدى.
كورمەگە قويىلعان جادىگەرلەر اراسىندا سيرەك كەزدەسەتىن قۇجاتتار مەن فوتوسۋرەتتەر, ساحنالىق كوستيۋمدەر مەن جەكە زاتتار, سونداي-اق حح عاسىردىڭ كينو كەڭىستىگىن ايعاقتايتىن قۇندى مۇرالار بار. اسىرەسە مەڭتاي وتەپبەرگەنوۆتىڭ جەكە كوللەكتسياسىنان ۇسىنىلعان 1931–1970 جىلدار ارالىعىندا جارىق كورگەن 200-گە جۋىق كينوافيشا, 1932–1990 جىلدارى شىعارىلعان بىرەگەي فوتوكامەرالار, اشىق حاتتار مەن كينو جۋرنالدارى كەلۋشىلەردىڭ ايرىقشا قىزىعۋشىلىعىن تۋدىردى. بۇل جادىگەرلەر قازاق كينوسىنىڭ قالىپتاسۋ كەزەڭىنەن باستاپ, كەڭەستىك كەزەڭدەگى شىعارماشىلىق ىزدەنىستەرگە دەيىنگى ارالىقتى قامتىپ, تۇتاس ءبىر ءداۋىردىڭ تىنىسىن سەزىندىرەدى.
سونىمەن قاتار اتاۋلى ءىس-شارا اياسىندا «كاۋكەن كەنجەتاەۆ» اتتى كىتاپتىڭ تۇساۋى كەسىلدى. ارحيۆتىك دەرەكتەرگە سۇيەنە وتىرىپ جازىلعان بۇل ەڭبەك ونەر يەسىنىڭ شىعارماشىلىق جولىن, ساحنا مەن ەكرانداعى جارقىن بەينەلەرىن, ۇلتتىق مادەنيەتكە قوسقان ولشەۋسىز ۇلەسىن تەرەڭىنەن تارقاتادى.
تاعىلىمدى جيىندا اباي اتىنداعى قازاق ۇلتتىق وپەرا جانە بالەت تەاترى ارتىستەرى ونەر كورسەتىپ, كاۋكەن كەنجەتاەۆ ورىنداعان پارتيالاردان ۇزىندىلەر شىرقالدى. بۇل كورەرمەنگە وتكەن عاسىردىڭ ساحنالىق رۋحىن قايتا سەزىندىرگەن اسەرلى ساتتەردىڭ ءبىرى بولدى. كەش سوڭىندا كاۋكەن كەنجەتاەۆتىڭ قاتىسۋىمەن تۇسىرىلگەن «گاۋھارتاس» ءفيلمىنىڭ وڭدەۋدەن وتكەن, جاڭارتىلعان نۇسقاسى العاش رەت كورەرمەنگە جول تارتتى. كينوتۋىندىنىڭ جاڭا ساپادا كورسەتىلۋى – ۇلتتىق كينو مۇراسىن ساقتاۋ مەن جاڭعىرتۋ جولىنداعى ماڭىزدى قادام. سونداي-اق مەڭتاي وتەپبەرگەنوۆ باستى ءرولدى سومداعان «ستراننىي مير جەلاني ي نادەجد» ءفيلمىنىڭ كورسەتىلىمى بولدى.
« ۇلى مۇرا – ۇرپاققا وسيەت» كورمەسى – مەرەيتويلىق شارا عانا ەمەس, ۇلتتىق كينو ونەرىنىڭ تاريحىنا تاعزىم, ۇرپاقتار ساباقتاستىعىن ايشىقتايتىن رۋحاني كوپىر. كينو ونەرىنە قاتىستى سيرەك دەرەكتەر مەن ارحيۆتىك قازىنالار ارقىلى كورەرمەن قازاق مادەنيەتىنىڭ باي مۇراسىمەن قايتا قاۋىشتى.
