مارك لي قازىر اتالعان كوللەدجدە ساباق بەرەتىن ۇستازى, وڭىرگە بەلگىلى كۇيشى مۇرات حاميتوۆتەن ءدارىس الادى. ءبىلىم ورداسىندا 15 جىلدان بەرى ۇستازدىق ەتىپ كەلە جاتقان تاجىريبەلى ۇستاز شاكىرتتەرىنىڭ ءبىرازى بۇگىندە قۇرمانعازى اتىنداعى كونسەرۆاتوريادا وقيدى. كەيبىر شاكىرتتەرى سول كونسەرۆاتوريادا قالىپ, جۇمىس ىستەپ جاتىر.
«ماركتىڭ كۇيگە دەگەن ىقىلاسىنىڭ ەرەكشە ەكەنى بىردەن بايقالدى. قازىر ورىنداۋشىلىق تەحنيكاسى ابدەن قالىپتاستى. ەندى ءار تۋىندىنىڭ ىشكى ءمان-ماعىناسىنا ءۇڭىلىپ, ءتۇسىنىپ ورىنداۋعا تىرىسىپ ءجۇر. كۇردەلى كۇيلەردىڭ تەرەڭ يىرىمدەرىن جەتەر جەرىنە جەتكىزىپ تىرىلتە ويناعاندا مارقايىپ قالاسىڭ», دەيدى م.حاميتوۆ.
قازىر ماركتىڭ كۇي قورجىنىندا ماحامبەتتىڭ «جورىق», «قايران نارىن», «جاۋعا شاپقان», «جۇمىر قىلىش» كۇيلەرى بار.
«باتىر بابامىزدىڭ كۇيلەرى وتە رۋحتى. ادامنىڭ بويىنا قايرات, جىگەر بەرەدى. سوندىقتان جانىما وتە جاقىن. كۇيدى ۇيرەنبەس بۇرىن, ونىڭ شىعۋ تاريحىنا بويلاپ, ابدەن ءتۇسىنىپ وقىپ, ءبىلىپ الۋ كەرەك. كەز كەلگەن كۇي جايدان-جاي شىعا سالمايدى. كۇيدىڭ شىعۋىنا بەلگىلى ءبىر تاريحي وقيعالار, اۆتوردىڭ باسىنان وتكەن جاعدايلار تۇرتكى بولادى. سوندىقتان الدىمەن شىعارمانىڭ ءمان-ماعىناسىن ءتۇسىنىپ بارىپ ورىنداۋ كەرەك», دەيدى جاس ونەرپاز.
قوستاناي وبلىسى
