بۇل ماسەلەلەر وبلىس اكىمى نۇرالحان كوشەروۆتىڭ تۇركىستان قالاسى تۇرعىندارىمەن كەزدەسۋىندە كوتەرىلدى. قالا اكىمى ازىمبەك پازىلبەك ۇلىنىڭ مالىمدەۋىنشە, قۇرىلىس جۇمىستارىنىڭ كولەمى 275,4 ملرد تەڭگەنى قۇراپ, وتكەن جىلى جوسپار 112,5% دەڭگەيىندە ورىندالعان. پايدالانۋعا بەرىلگەن تۇرعىن ءۇي كولەمى 552,6 مىڭ شارشى مەتردى قۇراپ, جوسپار 102,2%-عا ورىندالىپتى. مىسالى, جاڭا قالا شاعىن اۋدانىندا كەيىنگى 3 جىلدا 67 كوپقاباتتى تۇرعىن ءۇي پايدالانۋعا بەرىلگەن.
دەگەنمەن تۇرعىن ءۇي ماسەلەسى وزەكتى كۇيىندە قالىپ وتىر. بۇل ورايدا وبلىس اكىمى الداعى جىلدارعا جوسپار قۇرۋدى تاپسىردى. جەر تەلىمىن الۋ كەزەگىندە تۇرعان تۇرعىنداردىڭ ماسەلەسىنە قاتىستى وبلىس اكىمدىگى ارنايى جوبا ازىرلەگەنى, وعان ساي 1 600-دەن اسا كەزەكتە تۇرعان ادامعا جەر بەرىلەتىنى ايتىلدى. وبلىس اكىمىنە كوكەيدە جۇرگەن ماسەلەسىن جەتكىزگەن تۇركىستاندىق ازامات تۇرعىن ءۇي كەزەگىنەن شىعارىلۋىنا بايلانىستى نارازىلىعىن ءبىلدىرىپ, قىزىنا مەملەكەت تاراپىنان بەرىلگەن پاتەردىڭ ساپاسىنا شاعىمداندى. ءوتىنىش يەسىنىڭ اتىندا ءۇي بولعاندىقتان, تۇرعىن ءۇي كەزەگىنەن شىعارىلعان. دەگەنمەن بۇل ماسەلە زەردەلەنىپ, زاڭ اياسىندا شەشىمىن تابادى.
قۇرىلىس ساپاسىنا قاتىستى مەردىگەرلەرگە كەمشىلىكتى قالپىنا كەلتىرۋگە ۋاقىت بەرىلدى. بۇدان بولەك, كوپقاباتتى تۇرعىن ۇيلەردى باسقارۋ كومپانياسىنىڭ ساپاسىز جۇمىسى, جوندەۋ جۇمىستارىنىڭ ساپاسى, بەينەباقىلاۋ كامەرالارىنىڭ ىستەن شىعۋى, تۇرعىن ءۇي اۋلالارىن اباتتاندىرۋ بويىنشا ماسەلەلەر ايتىلدى.
جەر تەلىمىن الۋعا قاتىستى تۇيتكىلدەر دە كوتەرىلدى. سونىمەن قاتار پسيحولوگيالىق-پەداگوگيكالىق تۇزەتۋ ورتالىعىن اشۋ قاجەتتىلىگى تۋرالى ۇسىنىس ءبىلدىرىلدى. جالپى, كەزدەسۋدە قالا تىرشىلىگىنە قاتىستى كوتەرىلگەن ماسەلە از بولمادى. بۇل ورايدا وبلىس اكىمى قالا باسشىسىنا كەيبىر قاجەتسىز جوبالاردى توقتاتىپ, حالىقتىڭ سۇرانىسىنا قاجەت دۇنيەلەردى شەشۋ كەرەكتىگىن ايتتى.
– قالا تۇرعىندارى ءوز ماسەلەلەرى بويىنشا قالا اكىمىنە كەلەدى. بىراق ولار ءسىزدىڭ جاۋابىڭىزعا قاناعاتتانباي, سوسىن وبلىس اكىمىنە ارىز-شاعىمىن جولدايدى. مىسالى, بىلتىردىڭ وزىندە 363 قالا تۇرعىنى وبلىس باسشىسىنىڭ جەكە قابىلداۋىنا جازىلدى. وسىلاردى تولىق ءارى جان-جاقتى زەردەلەپ, قالا دەڭگەيىندە شەشۋدى تاپسىرامىن, – دەدى نۇرالحان كوشەروۆ قالا اكىمى ازىمبەك پازىلبەك ۇلىنا.
بىلتىرعى جۇمىستار جونىندە بايانداما جاساعان قالا اكىمى جالپى وڭىرلىك ءونىم كولەمى 526,3 ملرد تەڭگەگە جەتىپ, 16,3%-عا ارتقانىن, ونەركاسىپ ءونىمىنىڭ كولەمى 45,9 ملرد تەڭگەنى قۇراپ, وڭدەۋ ونەركاسىبى 29 ملرد تەڭگەگە جەتكەنىن اتاپ ءوتتى. نەگىزگى كاپيتالعا تارتىلعان ينۆەستيتسيالار 502,7 ملرد تەڭگەگە دەيىن ۇلعايدى. سونداي-اق ساۋدا كولەمى 193,9 ملرد تەڭگەگە جەتىپ, جوسپار 161,9%-عا ارتىعىمەن ورىندالعان.
– قازىر قالانىڭ ەكولوگيالىق احۋالىن جاقسارتۋ, تۇرعىندارعا قوعامدىق جايلى ورتا قالىپتاستىرۋ ماقساتىندا جۇيەلى جۇمىس جۇرگىزىلىپ جاتىر. اتاپ ايتقاندا, وتكەن جىلى قالا اۋماعىندا 36 ساياباق, 80 گۇلزار مەن اللەيا, 168 كوشە, 16 جاسىل القاپ اۋماعىندا كوگالداندىرۋ جۇمىستارى جۇرگىزىلدى. جالپى العاندا, 1,4 ميلليوننان استام اعاش, 410 مىڭنان استام بۇتا وتىرعىزىلىپ, جاسىل جەلەك كولەمى ۇلعايتىلدى, – دەدى ازىمبەك پازىلبەك ۇلى.
ەسەپتىك كەزدەسۋدە تۇرعىندار تاراپىنان جەردى زاڭداستىرۋ, باسپانامەن قامتۋ, ينفراقۇرىلىم, قوعامدىق كولىك, تۇرعىن ۇيلەردەگى كەمشىلىكتەر, الەۋمەتتىك قولداۋ, تۇرعىن ءۇي-كوممۋنالدىق شارۋاشىلىق, جول ساپاسى, ءبىلىم, ءتۋريزمدى دامىتۋ, الەۋمەتتىك نىساندار قۇرىلىسى, وزگە دە ماسەلەلەر قوزعالدى.
– مەملەكەت باسشىسىنىڭ «حالىق ۇنىنە قۇلاق اساتىن مەملەكەت» تۇجىرىمداماسىنا سايكەس, وبلىس اكىمدەرىنە بارلىق اۋدان, قالالاردىڭ تۇرعىندارىمەن كەزدەسىپ, ماسەلەلەردى اشىق ديالوگ الاڭىندا شەشۋ مىندەتتەلگەن. بىلتىرعى كەزدەسۋدە تۇركىستان قالاسى بويىنشا 17 ماسەلە كوتەرىلگەن. ولاردىڭ 16-سى شەشىمىن تاپتى, 1 ماسەلە بيىل شەشىلەدى. تۇرعىندار تىلەگىنە وراي سپورت كەشەندەرىنىڭ قۇرىلىسى اياقتالىپ, قولدانىسقا بەرىلدى. ودان بولەك, 111 كوشەگە اسفالت توسەلدى. وسىنىڭ بارلىعى سىزدەردىڭ قالا تۇرعىنى رەتىندە بەلسەندى ۇستانىمدارىڭىز بەن جەرگىلىكتى اكىمدىكپەن بىرلەسە اتقارعان جۇمىستاردىڭ ناتيجەسىندە جۇزەگە استى, – دەدى ن.كوشەروۆ.
وبلىس اكىمى كەزدەسۋدەن سوڭ جەكە قابىلداۋ وتكىزدى. تۇرعىندار كوتەرگەن ماسەلەلەرگە قاتىستى ءتيىستى باسقارمالار مەن جاۋاپتى مەكەمەلەرگە زاڭ اياسىندا جان-جاقتى زەردەلەپ, ناقتى شەشىم قابىلداۋ جونىندە تاپسىرما بەرىلدى. بىرقاتار ماسەلە سول مەزەتتە شەشىمىن تاپتى. ءوڭىر باسشىسى حالىقپەن كەرى بايلانىستى كۇشەيتۋ, الەۋمەتتىك ماڭىزى بار ماسەلەلەردى كەزەڭ-كەزەڭىمەن شەشۋ جۇمىستارى جالعاساتىنىن ايتتى.
تۇركىستان وبلىسى
