ەلىمىزدەگى مەملەكەتتىك قىزمەتتىڭ قالىپتاسۋ جانە دامۋ كەزەڭدەرىن جۇيەلەپ, تاريحي مۇراسىن ساقتاۋ ءارى جاس بۋىنعا ۇلگى ەتۋ ماقساتىنداعى بۇل باستاما ۇرپاق ساباقتاستىعىن نىعايتىپ, مەملەكەتتىك قىزمەت قۇندىلىعىن كەڭىنەن ناسيحاتتاۋعا باعىتتالعان.
«مەملەكەتتىك قىزمەت ىستەرى اگەنتتىگى مەملەكەتتىك قىزمەتتىڭ ءيميدجىن ارتتىرۋعا ءارى حالىقتىڭ مەملەكەتتىك قىزمەتكە سەنىمىن نىعايتۋعا باعىتتالعان ماڭىزدى باستامالاردى جۇزەگە اسىرىپ كەلەدى. مەملەكەتتىك قىزمەتشىنىڭ ءپوزيتيۆتى ءيميدجىن قالىپتاستىرۋ جونىندەگى 2023–2025 جىلدارعا ارنالعان ءىس-شارالار جوسپارى اياسىندا اكادەميانىڭ فيليالدارى بازاسىندا ءار وبلىستا مۋزەي قۇرۋ كوزدەلگەن», دەدى مەملەكەتتىك قىزمەت ىستەرى اگەنتتىگىنىڭ وبلىستىق دەپارتامەنت باسشىسى توقتامىس جۇماعۇلوۆ.
مۋزەي ەلىمىزدەگى جانە ءوڭىردىڭ مەملەكەتتىك قىزمەت سالاسىنداعى جەتىستىكتەردى كورسەتە وتىرىپ, سالاداعى قىزمەتشىنىڭ وڭ ءيميدجىن قالىپتاستىرۋعا ىقپال ەتەتىن بولادى.
«مۋزەي مەملەكەتتىك قىزمەتتىڭ ماڭىزدىلىعىن ناسيحاتتاۋ ءۇشىن تاريح, يننوۆاتسيا جانە ءبىلىمدى بىرىكتىرەتىن بىرەگەي الاڭ بولادى. ناتيجەسىندە, اتالعان قىزمەتتى قوعام مەملەكەت دامۋىنىڭ نەگىزگى ەلەمەنتى رەتىندە قابىلداۋىن كۇشەيتەدى», دەدى پرەزيدەنت جانىنداعى مەملەكەتتىك باسقارۋ اكادەمياسى ماڭعىستاۋ وبلىستىق فيليالىنىڭ ديرەكتورى ايگۇل دەمەۋوۆا.
ماڭعىستاۋ وبلىسى
