KTK ارناسىنىڭ جازۋىنشا, اسىرەسە سارىاعاش اۋدانىنىڭ شارۋالارى قيىن جاعدايعا تاپ بولعان. اۋداندا ەكى مىڭعا جۋىق شارۋاشىلىق 400 گەكتار اۋماقتا جىلىجاي قىزاناعىن وسىرەدى. الايدا فەرمەرلەر ونىمدەرىن وتكىزە الماي, شىعىنعا ۇشىراپ وتىرعاندارىن ايتادى.
ديقان نۇرسۇلتان قۋانىشباەۆتىڭ ايتۋىنشا, قويمادا 15 توننا قىزاناق جينالىپ قالعان. ەگەر ءبىر اپتا ىشىندە ساتىلماسا, ءونىم جارامسىز بولىپ, شارۋاشىلىق تولىق شىعىنعا باتۋى مۇمكىن. ونىڭ سوزىنشە, قازىرگى شىعىن كولەمى 25 ميلليون تەڭگەگە جاقىنداعان.
قازىر شىمكەنت بازارلارىندا قىتايلىق قىزاناقتىڭ كەلىسى 350 تەڭگەدەن ساتىلىپ جاتىر. ال جەرگىلىكتى ءونىمنىڭ باعاسى شامامەن 550 تەڭگە. ديقانداردىڭ پىكىرىنشە, ساتىپ الۋشىلار ءدال وسى 200 تەڭگەلىك ايىرماشىلىققا بايلانىستى يمپورتتىق ءونىمدى تاڭدايدى.
جىلىجاي يەلەرى ءوندىرىس شىعىنىنىڭ وتە جوعارى ەكەنىن ايتادى. ءبىر گەكتار جىلىجايدى ۇستاۋعا شامامەن 500 توننا كومىر جۇمسالادى. بۇدان بولەك جۇمىسشىلاردىڭ جالاقىسى, ەلەكتر ەنەرگياسى, تىڭايتقىش پەن كوشەت شىعىندارى بار. سونىڭ سالدارىنان وتاندىق قىزاناقتىڭ وزىندىك قۇنى ءبىر كەلىگە 450-460 تەڭگەگە دەيىن جەتەدى.
فەرمەرلەر يمپورتتىق ونىمدەردىڭ ساپاسى مەن ءدامى تومەن ەكەنىن دە العا تارتتى. سونىمەن قاتار ولار شەكاراداعى فيتوسانيتارلىق باقىلاۋعا قاتىستى كۇمان تۋدىرادى. جىلىجاي فەرمەرلەرى قاۋىمداستىعىنىڭ وكىلدەرى سىرتتان اۋرۋ جۇقتىرعان كوكونىستەر كەلۋى مۇمكىن ەكەنىن ايتىپ, بىرنەشە رەت ماسەلە كوتەرگەندەرىن جەتكىزدى.
ال ساۋدا جانە ينتەگراتسيا مينيسترلىگى باعا ەڭ الدىمەن تۇتىنۋشى ءۇشىن قولجەتىمدى بولۋى ءتيىس ەكەنىن مالىمدەدى. ۆەدومستۆو دەرەگىنشە, يمپورتتىق قىزاناق ەل نارىعىنىڭ تەك 7 پايىزىن عانا قامتيدى. سونىمەن بىرگە مينيسترلىك جەرگىلىكتى فەرمەرلەر ەلدى تولىق قامتاماسىز ەتۋگە جانە تۇراقتى باعا ۇسىنۋعا كەپىلدىك بەرسە, ۇسىنىستاردى قاراستىرۋعا دايىن ەكەنىن ايتتى.
قازىر ديقاندار قارىزدارىن جابۋ ءۇشىن ونىمدەرىن كەم دەگەندە وزىندىك قۇنىمەن ساتۋعا تىرىسىپ جاتىر. ولاردىڭ ايتۋىنشا, جاعداي وزگەرمەسە, كەلەسى ماۋسىمدا كوپتەگەن جىلىجاي شارۋاشىلىقتارى جۇمىسىن توقتاتۋى مۇمكىن.
ايتا كەتەيىك, تۇركىستان وبلىسىنىڭ جەتىساي اۋدانىنداعى شارۋالار بيىلعى العاشقى قاۋىن ءونىمىن جيناي باستادى.
فەرمەرلەرگە بورداقىلاۋ الاڭدارىن دامىتۋ ءۇشىن جىلدىق 5%-بەن جەڭىلدەتىلگەن نەسيە بەرۋ باستالدى.
