الاڭدا القىنباي ايقاستى

ەلىمىز چەمپيوندارى مەن جۇلدەگەرلەرى انىقتالدى. بىلعارى قولعاپ شەبەرلەرىن الدا جاڭا اسۋلار كۇتۋدە. وتكەن سەنبى كۇنى استانا جان­كۇيەرلەرىن وزىنە ىنتىقتىرعان بوكس­تان كەزەكتى مارتە وتكەن قازاقستان چەمپيوناتى مارەسىنە جەتتى. ءسويتىپ, ءبىر اپتا بويى “داۋلەت” سپورت كە­شە­نىندە كەرىلگەن شارشى الاڭدا ەلىمىزدىڭ تۇكپىر-تۇكپىرىنەن كەلىپ, 11 سالماق دارەجەسى بويىنشا كۇش سى­ناسقان بوكسشىلار اراسىنداعى باسەكە مىناداي ناتيجەلەرمەن اياقتالدى. داستان كەنجالين. ەڭ جەڭىل, ياعني 48 كيلو سال­ماقتا استانالىق ءىلياس سۇلەيمەنوۆ چەمپيون اتاندى. ول وسى سالماق بويىنشا ءتۇرلى حالىقارالىق تۋرنيرلەر مەن جارىستارعا قاتىسىپ جۇرگەن ءبىرجان جاقىپتى 6:4 ەسە­بىمەن ۇتتى. بۇل كەزدەسۋدە تورە­شىلەر بىرجانعا قىساستىق جاسادى دەپ ايتا المايمىز. ويتكەنى, قارسىلاسىن ابدەن جەتىك زەرتتەگەن ءىلياس ءۇش راۋند بويى قارسىلاسىنا ەش مۇمكىندىك بەرمەي, دەر كەزىندە جا­ساعان سوققىلارى ارقىلى ۇپاي سانىن تۇگەندەپ, جەڭىسكە جەتتى. ەندى بىزگە ەلىشىلىك جارىستاردا بىرجان­مەن يىق تەڭەستىرىپ ايقاسا الاتىن بوكسشىلاردىڭ بار ەكەنىن ايتۋعا بولادى. كەلەسى, 51 كيلو سالماقتا وتكەن اقتىق سىندا ميراس جاقىپوۆ (شقو) حابيبوللا يسمايل-احۋ­نوۆتى (الماتى قالاسى) تازا جەڭدى. بۇل جەكپە-جەكتە شىعىسقازاق­ستان­دىق بوكسشى مۇنىڭ الدىنداعى كەزدەسۋدە تورەشىلەردىڭ كەسىرىنەن جەڭىلۋگە ءماجبۇر بولعان جامبىل­دىق ولجاس ساتتىباەۆتىڭ ەسەسىن قاي­تاردى دەسە بولادى. بيىلعى چەمپيوناتتا 54 كيلو سالماقتاعى سىندار قىزىقتى جانە تارتىستى ءوتتى دەۋگە بولادى. مۇندا اۋەلى ءتۇرلى جارىستاردا ەل نامىسىن قورعاپ جۇرگەن قانات ءابۋتالىپوۆ (استانا) جەڭىلىپ قالعان بولاتىن. ول شيرەك فينالدىق كەز­دەسۋدە باپكەرى ۆلاديمير كاماشوۆ­تىڭ ءۇمىتىن اقتاي الماعان سوڭ, بىزگە ەندى تاجىريبەلى ءمىرجان راقىم­جا­نوۆتىڭ (شقو) عانا چەمپيون اتانۋعا مۇمكىندىگى كوپ سياقتى بولىپ كورىنگەن ەدى. الايدا, ول دا ءابۋتالىپوۆتىڭ جولىن قايتالاپ, اقتىق جەكپە-جەكتە ەلوردالىق دانيار تولەگەنوۆتەن ۇتىلۋعا ءماج­بۇر بولدى. ەسەپ – 1:5. دەگەنمەن, ءمىرجان وزگەلەردەن جاسى ۇلكەن بولعانىمەن, چەمپيوناتتاعى بۇدان باسقا ايقاستارىنىڭ ءبارىن ايقىن باسىمدىقپەن جەڭىپ, وسى سال­ماقتاعى ۇزدىك بوكسشىلاردىڭ ءبىرى ەكەنىن دالەلدەپ بەردى. مۇنان كەيىنگى 57 كيلو سالماقتا قوستانايلىق سپورت شەبەرى اسلان مۇقانوۆتىڭ مەرەيى ۇستەم بولدى. ول الماتى وبلىسىنىڭ اتىنان سىنعا تۇسكەن جاندوس مومىنوۆتى 2:1 ەسەبىمەن ۇتتى. 60 كيلو سالماقتا ءبىز افينا وليمپياداسىنىڭ قولا جۇلدەگەرى سەرىك ەلەۋوۆ پەن بەيجىڭ وليم­پياداسىنا قاتىسۋشى مەرەي اقشالوۆتىڭ ورنىن جوقتاتپاۋعا تىرىسىپ جۇرگەن بىلعارى قولعاپ شەبەرلەرى بار ەكەنىن كورە الدىق. مۇندا چەمپيونات باستالىسىمەن جامبىلدىق عاني جايلاۋوۆ, قوستا­نايلىق سامات باشەنوۆ سەكىلدى بوكسشىلار وزدەرىن جاقسى جاعىنان كورسەتە ءبىلدى. دەسەك تە, ايتۋلى سىن­داردا جالعىز عانا ساڭلاقتىڭ مىسى باسىم بولىپ تۇراتىنى بەل­گىلى. بۇل باسەكەدە ايدار امىرزا­قوۆ­تىڭ وزگەلەرگە قاراعاندا شەبەرلىگى باسىم بولىپ, اقىرى ول اقتىق ايقاستا سامات باشەنوۆتى ۇتىپ, چەمپيون اتاندى. كەلەسى, 64 كيلو سالماقتاعى جەكپە-جەكتەر دە جانكۇيەرلەردى جەلپىنتىپ, قىزىقتى ءوتتى. جالپى, وسى كەزدەسۋلەردىڭ بارىندە بىرنەشە بوكسشىنىڭ قۇرمەت تۇعىرىنىڭ ەڭ بيىك ساتىسىنا كوتەرىلۋگە مۇمكىن­دىگى بار ەدى. ماسەلەن, ايدار شارى­باەۆ (الماتى وبلىسى), ادىلەت ەگى­زەكوۆ (شقو) سەكىلدى بىلعارى قولعاپ يەلەرى سوڭعى ايقاستارىنا دەيىن التىن مەدالگە ۇمىتتىلەردىڭ ءبىرى بولىپ سانالعان بولاتىن. الايدا, چەمپيوناتتا ەكەۋىنىڭ دە ال­دىن استانالىق جاس تالانت دا­نيار ەلەۋسىنوۆ وراپ كەتتى. ءسويتىپ, ول باپكەر اكەسىنىڭ ايتقان اقىل-كەڭەسىمەن, ءوزىنىڭ دە قايسار مى­نەزىمەن, بارلىق جەكپە-جەكتەرىن جيناقى دا جىگەرلى, ساۋاتتى وتكىزىپ, بيىلعى باسەكەنىڭ باس جۇلدەسىن جەڭىپ الدى. 69 كيلو سالماقتاعى اقتىق سىن مانات ومىرزاقوۆ (شقو) پەن جارتىلاي فينالدا سەرىك ساپيەۆتى ۇتقان قىزىلوردالىق رۇستەم سىباەۆتىڭ اراسىندا ءوتتى. بۇل جەكپە-جەكتە مانات قارسىلاسىنىڭ ساپيەۆكە قولدانعان تاكتيكاسىن, ياعني قورعانا ءجۇرىپ, كەرەك كەزىندە سوققى جاسايتىن ءادىسىن وزىنە قارسى قولدانىپ, جەڭىسكە جەتتى. قىسقاسى, وسى سالماقتاعى باسەكەلەردىڭ ءبارى الەمنىڭ ەكى دۇركىن چەمپيونىنا قاي كەزدە بولسىن قارسى تۇرا الاتىن بوكسشىلاردىڭ بار ەكەنىن كورسەتىپ بەردى. ولاردىڭ قاتارىنا چەمپيون اتانعان مانات ومىرزاقوۆتى, ودان ۇتىلعان رۇستەم سىباەۆتى جانە باقىتجان قوجابەكوۆ پەن ماقسات الىمباەۆتى جاتقىزۋعا بولادى. 75 كيلو سالماقتاعى فينالدا دانابەك سۋجانوۆ (شقو) ءبىرىنشى ورىندى جەڭىپ الدى. ول الماتى وبلىسىنىڭ وكىلى نۇرداۋلەت جار­مانوۆتى 5:4 ەسەبىمەن ۇتتى. جەكپە-جەك دانابەككە وڭاي بولعان جوق. دە­گەنمەن, ول وتكەن جىلعى قازاق­ستان چەمپيونى اتاعىن قورعاپ قال­دى. ال نۇرداۋلەتكە كەلەر بولساق, ايقاس­تارىنا قاراپ ونى بولاشاعى بار بوكسشى دەۋگە بولادى. ال 81 كيلو سالماقتاعى سىندا قاراعاندىلىق المات سەرىموۆ وزىنە لايىقتى قارسىلىق تانىتا بىلگەن مارات ءىلياسوۆتى (الماتى قالاسى) جەڭىپ, چەمپيون اتاندى. بۇل جەكپە-جەكتە بىلتىرعى عالىم جارىل­عاپوۆ اتىنداعى ءتۋرنيردىڭ جەڭىم­پازىنىڭ قارسىلاسىن جارتىلاي فينالدىق كەزدەسۋدە ازامات بەل­گىباەۆتى نوكاۋتقا جىبەرەتىنى سەكىلدى جەڭەتىنىنە ەشكىم كۇماندانباعان بولاتىن. بىراق, ايقاستىڭ سوڭى نوكاۋتقا بارماي, ەسەپ 11:6 بولىپ اياقتالدى. 91 كيلو سالماقتا سوڭعى كەزدەسۋ جان كوسوبۋتسكي (قوستاناي وب­لىسى) مەن ۆاسيلي لەۆيت (استانا قالاسى) اراسىندا قىزىقتى دا تار­تىمدى ءوتتى. بۇل باسەكەدە كوسوب­ۋ­تسكي قارسىلاسىنا ەش مۇمكىندىك بەرمەي, 11:1 ەسەبىمەن تازا جەڭدى. ال فينالدىق ايقاس اياقتالعاندا ول ۇلتى ۋكراين بولسا دا مەملەكەتتىك تىلدە ەركىن سويلەي الاتىن بوكسشى ەكەنىن كورسەتتى. وندا ونىڭ شەشەسى قازاق ەكەنىن بىلگەن جانكۇيەرلەر جەڭىسىمەن قۇتتىقتاۋ ءۇشىن جاننىڭ جانىنا كەلگەندە, بوكسشىنىڭ قاۋ­مالاعان جۇرتپەن تازا قازاق تىلىندە سويلەسكەنىن اتاپ وتكەنىمىز ءجون. ال اسا اۋىر سالماق دارەجەسىندە يۆان دىچكو مەن دوسجان وسپانوۆ اراسىندا وتكەن اقتىق ايقاستا العاشقىسى قارسىلاسىن قينالماي ۇتتى. مۇنىڭ الدىندا دىچكو رۇس­تەم ىرگەباەۆپەن, ال وسپانوۆ رۋس­لان مىرساتاەۆپەن كەزدەسۋ وتكىزگەن بولاتىن. وسى جەكپە-جەكتەردە تورەشىلەر ەكەۋىن دە قولداعانىمەن, ولار جانكۇيەرلەر تاراپىنان ءادىل باعاسىن العان جوق ەدى. سوندىقتان بولار, فينالدىق سىندا جانكۇيەر­لەردىڭ كەيبىرى, قايسىسىنىڭ چەم­پيون اتاناتىنىن الدىن الا بىل­گەندەي, ەكەۋىنىڭ دە ايقاسىنا نەم­قۇرايلى قاراپ وتىرسا, قالعاندارى كەز­دەسۋدىڭ سوڭىن كۇتپەي ورىندا­رى­نان تۇرىپ كەتتى. ال چەمپيو­نات­تىڭ وسىنداي كورىنىسپەن اياقتالعان سوڭعى جەكپە-جەگى 5:0 ەسەبىمەن دىچكونىڭ پايداسىنا شەشىلدى. P.S. ءسويتىپ, استانا تورىندە ءبىر جۇماعا سوزىلعان بوكس باسەكەسى اياقتالدى. ونىڭ قورىتىندىسى بويىنشا, شىعىس قازاقستان وبلىسى – 4 التىن, 2 كۇمىس جانە 1 قولا مەدال يەلەنىپ, جالپى­كوماندالىق ەسەپتە ءبىرىنشى ورىندى جەڭىپ السا, استانالىق بوكسشىلار 3 التىن, 1 كۇمىس, 2 قولا جۇلدە الىپ, ەكىنشى ورىندى يەلەندى. ال 3 التىن مەن 1 كۇمىس مەدالدى ەنشىلەگەن قوستاناي وبلىسىنىڭ كومانداسى ءۇشىنشى ورىندى قاناعات تۇتتى. سونداي-اق, بيىلعى چەمپيو­ناتتا قاراعاندى وبلىسى – 1 التىن, 1 قولا, الماتى قا­لاسى – 2 كۇمىس, 4 قولا مەدال, وڭ­تۇستىك قازاقستان وبلىسى – 2 كۇمىس, 1 قولا مەدال جەڭىپ السا, اق­مولا وبلىسى – 2 كۇمىس, قى­زىل­وردا وبلىسى – 1 كۇمىس, جامبىل وبلىسى – 5 قولا, ماڭعىستاۋ وب­لى­سى – 2 قولا جانە اقتوبە مەن پاۆ­لودار وڭىرلەرى ءبىر-ءبىر قولا مە­دال­دەردى يەلەنگەنىن اتاپ وتكەنىمىز ءجون. ۇلتتىق قۇرامانىڭ باس باپكەرى مىرزاعالي ايتجانوۆ: “جاستار جاعى ءۇمىتتى اقتادى” – ەڭ اۋەلى مىنانى ايتىڭىزشى. وسى چەمپيو­ناتتا جاس بوكسشىلاردىڭ جەكپە-جەكتەرى كوڭىلىڭىزدەن شىقتى ما؟ – جاستار مامانداردى, جانكۇيەرلەردى قۋانتتى دەپ ويلايمىن. ءوزىمنىڭ دە كوڭىلىمنەن شىقتى. قازىر بىزدە ۇلتتىق قۇراما الەم چەمپيوناتىنان كەيىن 70 پايىزعا وزگەردى. كوبى 1990-1991 جىلعى جاستار. ارينە, جاس بولعان سوڭ, تاجىريبەنىڭ ازدىعى كورىنىپ تۇرادى. ماسەلەن, ولاردىڭ قولدا تۇرعان جەڭىستى جىبەرىپ العاندارىن, سوققى جاساۋعا ءساتى كەلگەندە تارتىنىپ قالعان كەزدەرىن جاسىرا المايمىن. ال, جالپى العاندا, جاستار بيىلعى چەمپيوناتتا وزدەرىن لايىقتى دەڭگەيدە كورسەتە الدى دەپ ويلايمىن. بولاشاقتا ءبىز ولاردى ەندى حالىقارالىق الاڭداردا ەل نامىسىن قورعاي الاتىنداي ەتىپ دايىندايتىن بولامىز. بۇل – ءبىزدىڭ باستى ماقساتىمىز. – جاقسى دەلىك, ال تورەشىلەرگە قانداي باعا بەرەر ەدىڭىز؟ – ەندى بوكسشىسى ۇتىلعاننان كەيىن, جانكۇيەر­لەردىڭ دە, باپكەرلەردىڭ دە ءبارىن تورەشىلەردەن كو­رەتىن ادەتى بار عوي. ال ءوزىم, مىسالى, وسى باسەكە­لەر بۇرىنعىلارعا قاراعاندا, ءادىل ءوتتى دەپ ەسەپتەيمىن. ارينە, كەيبىر سالماقتار بويىنشا تورەشىلەرمەن تالاسۋعا بولاتىن تۇستار بار. بىراق تا, جالپى العاندا, چەمپيونات بوكسشىلارعا كوپ قىسىم جاساماي ءوتتى دەۋگە بولادى. – دەگەنمەن, “اتتەگەن-ايلارى” دا بولدى ەمەس پە؟ ونى مويىنداماۋ مۇمكىن ەمەس قوي. – ارينە, ءسىز ايتقانداي, “اتتەگەن-ايلار” بارلىق جارىستاردا بولىپ تۇرادى. بيىلعى باسەكەدە تاجىري­بەسى از تورەشىلەر بولدى. سولاردىڭ كەسىرىنەن كەيبىر بوكسشىلار ۇتىلىپ, كەلەسى اينالىمعا شىعا المادى. ماسەلەن, كەيبىر سالماقتاردا تورەشىلەر جەڭىستى الاڭدا ارتيستىك قيمىل جاساپ جۇرگەن بوكسشىلارعا ەمەس اق تەر, كوك تەر بولىپ جۇرگەن قارسىلاستارىنا بەرۋلەرى كەرەك ەدى. ولاي بولعان جوق. سونداي ەسكەرتۋلەردىڭ نەگە جاسالماعانىن ءتۇسىنۋ قيىن. – ال چەمپيوناتتا قاي بوكسشى جاقسى ونەر كورسەتتى دەپ ويلايسىز؟ – بىزدە قازىر ەكى مىقتى بوكسشى بار. ولار – كوسوبۋتسكي مەن لەۆيت. باسقا جاقسى شەبەرلەرىمىز بار, ارينە. بىراق ولاردىڭ دايىندىقتارى جارىسقا عانا بايلانىستى بولىپ ءجۇر. دەگەنمەن, چەمپيون اتان­عان بوكسشىلاردىڭ ءبارى ۇلتتىق قۇراماعا الىنادى دەپ ايتا المايمىن. كىمنىڭ الداعى جارىستاردا ەلىمىزدىڭ باس كومانداسىنىڭ جەيدەسىن كيەتىنىن ۋاقىت كورسەتەدى. ەندى الداعى 16 – 21 اقپان كۇندەرى بول­گاريادا وتەتىن تۋرنيرگە قاتىساتىن بولامىز. سوعان دەيىن بوكسشىلاردىڭ بابىن تاعى دا بايقاپ كورەمىز. ال جالپى كوماندا بويىنشا ايتسام, بيىلعى سىنعا شىعىس قازاقستان, قوستاناي وبلىستارى مەن استانا قالاسىنىڭ بوكسشىلارى جاقسى دايىندالعانى كورىنىپ تۇر. سوڭعى كەزدەرى تەك وڭتۇستىك وڭىردە عانا ەمەس, ەلىمىزدىڭ وزگە وبلىستارىندا بوكس جاقسى دامىپ كەلەدى. بۇرىندارى وڭتۇستىك قازاقستان, جامبىل وبلىستارى مەن الماتى قالاسى الدىڭعى ورىنداردان كورىنىپ جۇرسە, قازىر شىعىس قازاقستان, قوستاناي, اقمولا, قىزىلوردا, اقتوبە, ماڭعىستاۋ, پاۆلودار سىندى سولتۇستىك, باتىس وبلىستاردىڭ بوكسشىلارى جۇلدەلى ورىنداردى يەلەنىپ ءجۇر. وسى جەردە استانا قالاسىندا دا بوكس ءتيىستى جولعا قويىلىپ وتىرعانىن اتاپ وتكىم كەلەدى. اڭگىمەلەسكەن  داستان كەنجالين. دارىندى بوكسشىلار ءوسىپ كەلەدى نۇرتاي سابيليانوۆ, پارلامەنت ءماجىلىسىنىڭ  دەپۋتاتى. بوكستان بيىلعى قازاقستان چەمپيو­ناتى جوعارى دەڭگەيدە ءوتتى. جىگىتتەر جاقسى دايىندالىپتى. اسىرەسە, شىعىس قازاقستان وبلىسىنىڭ بىلعارى قولعاپ شەبەرلەرى بۇل سىنعا وتە جوعارى ازىر­لىكپەن كەلگەنىن دالەلدەپ بەردى. 4 التىن, 2 كۇمىس, 1 قولا جۇلدەگە يە بولىپ, جالپى­كوماندالىق ەسەپتە ءبىرىنشى ورىندى جەڭىپ الدى. اتاپ ايتار بولسام, شىعىس قازاق­ستان, قوستاناي وبلىستارى مەن استانا قالاسىنان سايىسقا تۇسكەندەردىڭ ىشىندە ءالى تاجى­ري­بەسى وتە مول بولماعانمەن, جەڭىسكە جىگەرى بار, جۇرەگى بار جىگىتتەر شارشى الاڭدا قارسىلاستارىن جەڭىپ, بيىك تۇعىرعا كوتەرىلدى. دەگەنمەن, باسەكەلەردە ورىن العان كەمشىلىكتەر دە بولدى. كەيبىر كەزدەسۋ­لەردە بوكسشىلاردىڭ سوققىسى ەسەپتەلمەي قالعان ساتتەرىن بايقادىق. قارسىلاسىن قايتا-قايتا قۇشاقتاپ, ۋاقىت سوزىپ جۇرگەن سپورتشىعا ەسكەرتۋ بەرىلۋى ءتيىس. كەيدە وسى جاعى ەسكەرۋسىز قالىپ جاتتى. مىسالى, جارتىلاي فينالدا اسا اۋىر سالماقتاعى رۇستەم ىرگەباەۆ پەن يۆان دىچكو كەزدەسۋى 3:4 ناتيجەسىمەن اياقتالدى. جەڭىس سوڭعىسىنا بەرىلدى. الايدا, دىچكو ەكىنشى جانە ءۇشىنشى راۋند بويى ىرگەباەۆتى ۇستاۋمەن ءجۇردى. وعان تورەشى ەسكەرتۋ جاساپ, ۇپايىن كەمىتۋى كەرەك ەدى. بىراق, ولاي بولعان جوق. جانە دە ر.ىرگەباەۆتىڭ ەكى-ءۇش سوققىسى ەسەپكە الىنباعان كەزدە جانكۇيەرلەر شۋ كوتەردى. وسى سالماقتاعى جاقسى ونەر كورسەتكەن رۋسلان مىرساتاەۆ تا قازىلار القاسى تاراپىنان دۇرىس باعاسىن العان جوق. وسىنداي كەمشىلىكتەر ورىن الدى. بولاشاقتا مۇنداي ولقىلىقتارعا جول بەرىلمەيدى دەپ ويلايمىن. بوكس بۇگىنگى تاڭدا قازاق سپورتىنىڭ بەتكە ۇستار تۇرىنە اينالىپ وتىر. ءبارىمىز جانكۇيەر رەتىندە قولداۋ كورسەتىپ, ەل ىشىنەن تۋ ۇستايتىن جىگىتتەردىڭ ءوسىپ-جەتى­لۋىنە قولداۋ جاساۋىمىز قاجەت. ءبىز بوكس ونەرىن ورگە باستىرىپ, الەمدىك, حالىق­ارا­لىق جارىستاردا جەڭىپ شىعىپ, ءانۇرا­نى­مىزدى شىرقاتىپ جۇرگەن سپورتشىلا­رى­مىزعا ءاردايىم تىلەۋلەسپىز. وسى چەم­پيوناتتىڭ باستى ەرەكشەلىگى دارىندى جاستار ءوسىپ كەلە جاتقانىن كورسەتتى. جاس ۇرپاقتىڭ سالاماتتى ءومىر سالتىن ۇستانىپ, ونىڭ سىرتىندا بەلگىلى ءبىر سپورت تۇرىمەن اينالىسىپ, ەل نامىسىن قورعاپ ءجۇرۋى ۇلكەن ازاماتتىق ءىس دەپ بىلەمىن. وسىنداي ازاماتتاردىڭ وتانعا, حالقىنا دەگەن سۇيىسپەنشىلىگىن جاستارعا تاربيە رەتىندە ۇسىنۋىمىز قاجەت. پاتريوتتىق تاربيە وتانعا, حالىققا قىزمەت ىستەسەم دەگەن ىزگى نيەتتەن, ناقتى قادامنان باستاۋ الادى. ەل بىرىنشىلىگى جاقسى ۇيىمداستىرىل­دى. سوڭعى جىلدارى بوكسشىلارعا ناقتى قامقورلىق جاسالىپ, سپورتپەن اينالى­سۋىنا تولىق مۇمكىندىك بەرىلگەن. بۇگىن سونىڭ ناتيجەسىن كورىپ وتىرمىز. بۇرىن بوكس فەدەراتسياسىنىڭ وبلىستارداعى فيليالدارى ءوز دەڭگەيىندە جۇمىس ىستەي الماۋشى ەدى. وسى كەمشىلىك قازىر جويىل­عان. وڭىرلەردە بوكس سالاسىنا قاجەتتى قارجى جانە ۇيىمداستىرۋ شارالارىن جۇزەگە اسىرۋ جولعا قويىلعان. بۇگىن جارقىلداپ رينگكە شىعىپ, ەل ىقىلاسىنا بولەنگەن جىگىتتەر 2012 جىلى لوندون وليمپياداسىندا قازاق ەلىن الەمگە تانىتادى دەگەن سەنىمىمىز بار. وسى ورايدا ءبارىمىز دە سپورتشىلارىمىزدىڭ بابىندا بولىپ, جەڭىسكە جەتۋىنە بارلىق جاعدايدى جاساۋىمىز كەرەك. بىزدەن دە ءبىر تىلەك نۇرعالي سابىرباي ۇلى, سپورت جانكۇيەرى, استانا قالاسى: – وتكەن جىلدارى بوكسشىلاردىڭ ۇپايىن كورسەتىپ تۇراتىن ەسەپتەۋىش الىپ تاستالىنادى دەلىنگەن بولاتىن. جانكۇيەر ءۇشىن ۇپاي سانى شىعىپ تۇرعانى جاقسى. ال باپكەرلەر ونى كورمەۋى كەرەك. ويتكەنى, باپكەرلەرى تالىمگەرىنە ءار راۋند سايىن: “سەن وسىنشا ۇپاي جينادىڭ, ەندى سوقتىرماي قاشىپ ءجۇرىپ, ۋاقىت وتكىزۋىڭە بولادى”, دەگەندەي كەڭەس بەرىپ وتىرادى. ەكى بوكسشى كىم ۇتىپ جاتقانىن بىلمەۋى ءتيىس. سوندا سپورتشىلار جاقسى ونەر كورسەتەدى. الاڭعا شىقتىڭ با, سوڭعى سەكۋندقا دەيىن ايقاسۋىڭ كەرەك! ايتپەسە, قوس قولىمەن جاۋىپ الىپ, قورعانىسقا تۇرادى دا, ءبىرىن-ءبىرى ۇرماي, وگىزدەر سەكىلدى سۇزىسەدى دە جۇرەدى. بۇل قانداي بوكس؟! بوكس – شارشى الاڭداعى تاماشا ونەر. كەزىندە بوكستى سەرىك قوناقباەۆ ونەرگە اينالدىرعان ەدى عوي. سەرىكتە تەحنيكا قانداي, قولىنىڭ ادەمى سوققىلارى, اياعىنىڭ ەركىن قيمىلى كورگەن ادامدى ءسۇيسىنتۋشى ەدى! رينگتىڭ ءتورت بۇرىشىندا ويناپ ءجۇرىپ ونەر كورسەتەتىن-ءدى. قازىر ونداي بوكس جوق. وسى قازاقستان چەمپيوناتىندا جاستاردىڭ قاۋلاپ ءوسىپ كەلە جاتقانى بايقالدى. بىراق جاستار جەڭىسكە جەتەدى دەپ, ولاردى قازىردەن اۋىر سىنعا سالا بەرمەۋ كەرەك. ەكى-ءۇش جىلدان كەيىن جاستاردىڭ دا كۇش-جى­گە­رى تاۋسىلادى. ادامنىڭ ەنەرگياسى شەكسىز ەمەس. وسى جولى 18, 19 جاسار جىگىتتەر جەڭىمپاز اتاندى. ولار­دى ەندى اۋىر جارىستارعا سالۋدا ساق بولۋىمىز قاجەت.