«قازاقستان تەمىر جولى» ۇك» اق قاراماعىنداعى 14 تەمىر جول بولىمشەسىنىڭ بالالارى ەكى كۇندە تۇڭعىش پرەزيدەنت مۇراجايىن, ۇلتتىق مۇراجايدى, «دۋمان» ويىن-ساۋىق ورتالىعىن كورىپ, تانىسادى. «قتج-جۇك تاسىمالى» اق باسشىلىعى مەن كاسىپوداق ۇيىمىنىڭ باستاماسىمەن قولعا الىنعان بۇل شارا اياسىندا جەتكىنشەكتەر ەكسپو-2017 حالىقارالىق كورمەسىن توپ-توبىمەن تامىزدىڭ ورتاسىنا دەيىن تاماشالايدى.
«استاناعا قىدىرىپ كەلىپ, كوڭىل كوكجيەكتەرىن كەڭەيتىپ قايتۋ – بالالاردىڭ ەستەرىندە كوپكە دەيىن قالىپ قويادى. ولار ءوز كوزدەرىمەن الەم نازارىنداعى كورمەگە بارىپ, زاماناۋي دۇنيەلەردى كوزدەرىمەن كورەدى. «بولاشاقتىڭ ەنەرگياسى» تاقىرىبى بويىنشا تالاي قىزىقتى جوبالارمەن تانىسىپ, وي تۇيەدى. «قازاقستان تەمىر جولى» ەكسپوزيتسياسىمەن تانىسادى», دەيدى «قتج-جۇك تاسىمالى» كاسىپوداق فيليالىنىڭ توراعاسى ەرمەك تولەگەنوۆ.
سەمەيدەن كەلگەن جاس ءتۋريستىڭ ءبىرى بەكجان راقىمجانوۆ ساپار بارىسىنداعى جۇرەكجاردى لەبىزىمەن بىلاي ءبولىستى: «مەنىڭ اكەم – تەمىرجولشى – ۆاگون قاراۋشى. مەن تەمىر جول سالاسىنىڭ باسشىلىعىنا وسىنداي ساپارىمىزدى ۇيىمداستىرعاندارى ءۇشىن شەكسىز العىسىمدى بىلدىرگىم كەلەدى. استانانى, مۇنداي حالىقارالىق كورمەنى ءبىز تەلەديداردان كورىپ, ەستىپ قانا ءجۇر ەدىك. سونداي-اق, وتاندىق تەمىرجولدىڭ مۇراجايىندا بولۋ دا قىزىق. سالاعا ەڭبەك سىڭىرگەن ادامدار تۋرالى كوپ مالىمەتتەر بىلدىك», دەيدى جاس بالعىن.
توپتامانى ازىرلەگەن اسحات رايقۇل,
سۋرەتتەردى تۇسىرگەندەر ەرلان وماروۆ, ورىنباي بالمۇرات,
«ەگەمەن قازاقستان»
