اعىنىنا شىداس بەرمەس ءومىر تاسقىنى تۇتاس ءبىر ەلدەردىڭ بەتالىسىنا وزگەرىس ەنگىزىپ جاتقان زاماندا قاراپايىم پەندە شوپاق قۇرلى بولسىن با؟! ەلىمىزدەگى جۇرگىزىلىپ جاتقان رەفورمالارعا سايكەس ايەلدەردىڭ زەينەت جاسىنا وزگەرتۋ ەنگىزىلەدى, ايەلدەر ەندى ەرلەرمەن تەڭەسىپ, زەينەتكە بىردەي شىعاتىن بولىپتى دەگەلى ايەل قاۋىمىندا مازا جوق. ءبىر شوعىر: «نەگىزىندە دۇرىس, 58 جاستا زەينەتكە شىعۋ ەرتە, بويىمىزدا جيعان مول تاجىريبە, بىلىمىمىزبەن, بىلىگىمىزبەن ءالى دە قوعامعا پايدامىزدى تيگىزسەك, جاستارمەن بولىسسەك», دەيدى. ال زەينەتكە شىعۋدا اي ساناپ ەمەس-اۋ, كۇن ساناپ, ساعات ساناپ كۇتىپ جۇرگەندەر, ايتەۋىر, زەينەتكە شىقساق كورگەن بەينەتىمىز كورگەن تۇستەي بولىپ كوپ جىلعى بالاعا دا, ۇيگە دە جوندەپ زەر سالا الماعان كەمتىگىمىزدى تولتىرىپ, اجە بولىپ, نەمەرە-شوبەرەنىڭ ورتاسىندا وتىراتىن مامىراجاي تىرلىك قاشان كەشەر ەكەنبىز دەپ الىستاي تۇسكەن زەينەتكەرلىگىنە كۇن سالىپ قاراپ, جاقىنداي تۇسسە ەكەن دەگەن تىلەك ۇستىندە. «بىرەۋ تويىپ, بىرەۋ توڭىپ سەكىرەدى» دەگەننىڭ كەبى.
راس, الەم بويىنشا زەينەتكەرلەر سانىنىڭ ارتۋى مەن ەڭبەك جاسىنداعى ادامداردان تۇسكەن سالىقتان جينالعان قاراجاتپەن زەينەتكەرلەردىڭ جىلدان جىلعا كوبەيۋىنىڭ الشاقتىعى الپاۋىت مەملەكەتتەردىڭ دە ۇيقىسىن بۇزۋدا. ەكونوميكاداعى تەڭگەرىمدىلىك اۋىتقىپ, زەينەتاقىمەن قامتاماسىز ەتۋ اۋىر جۇككە اينالىپ, ءار ەل وزىنە ءتيىمدى جولىن ىزدەنۋدە. بولگاريا, چەحيا, رۋمىنيا سىندى ەلدەردەن بولەك, اۆستريا, گەرمانيا, دانيا, يسپانيا, نيدەرلاند, يتاليا, يرلانديا, ۇلىبريتانيا سياقتى الپاۋىتتاردا داعدارىس پەن قۇلدىراۋ جاعدايىندا زەينەت جاسىن ارتتىرۋدى وڭتايلى دەپ تاپتى.
ەلىمىزدە زەينەتاقى تولەۋدەگى قاراجاتتىڭ بولجامدى تاپشىلىعىن جانە زەينەتكەرلەردىڭ 70 پايىزىن ايەلدەر قۇرايتىن كورىنەدى. سول تۇرعىدان ايەلدەردىڭ زەينەت جاسىن ارتتىرماسا, زەينەتاقى تولەۋگە جۇمسالاتىن بيۋدجەت شىعىستارى 2014-2024 جىلدارى پالەنباي تريلليون تەڭگەگە ءوسىپ كەتەدى دەسەدى. قاجەت قادام ەكەنىنە داۋ جوق. بىراق, نەگە بارلىعىنا ءبىر ولشەم بولۋى ءتيىس؟ نەلىكتەن زەينەت جاسىنا ديففەرەنتسيالدى تۇرعىدان كەلمەسكە؟
ماسەلەن, قالادا تۇرىپ, ءومىر بويى اۋىر جۇمىس اتقارماعان, نەگىزىنەن وي ەڭبەگىمەن شۇعىلدانعان, بالاسىنىڭ سانى دا از, كىر قوڭى مەن ىدىس-اياعىنا دەيىن ماشينا جۋاتىن ايەلدەر زەينەتكەرلىك جاسىنا شارشاماي جەتەدى. ال كوپ بالانىڭ بەينەتىنە قوسا, اۋىر جۇمىس اتقارىپ, بەلى جازىلماي, تاۋقىمەت كورەتىن اۋىل ايەلدەرى ءۇشىن زەينەتكە شىعۋدىڭ ماڭىزى وتە جوعارى. اۋىلداعى وقىعانداردىڭ ساناتىنداعى مۇعالىمدەر مەن دارىگەرلەردىڭ ءوزى ارەڭ شىداپ ءجۇر. كۇندەلىكتى جۇمىستارىنا قوسا ۇيدەگى تۇرمىستىق قيىندىقتار, وت جاعۋ, سۋ تاسۋ, مال-جاندى باعۋ سىندى مويىندارىنداعى كوپ تاۋقىمەت ولاردى زەينەت جاسىنا تەزىرەك جەتۋگە قۇمبىل قىلادى. ۋربانيزاتسيالانعان قاۋىم جەتكەن يگىلىكتەر اۋىل تۇرعىندارىنان تىم الىستا جاتىر.
قالادا دا دەنساۋلىققا قاتەرى مول ونەركاسىپ ورىندارىندا نەمەسە بەتتەرىن كۇن مەن جەل قاعىپ دالادا جۇمىس اتقاراتىن, تەڭ-تەڭ جۇك كوتەرىپ, بازارعا شىعىپ, وتباسىما تارشىلىق كورسەتپەيمىن دەپ بەلىن شارت بۋعان ايەل قانشاما؟.. تىپتەن ەر ادامنىڭ بىلەك كۇشىن قاجەت ەتەتىندەي اۋىر جۇمىستاردى ىستەيتىن ايەلدەر بار.
تابيعاتىنىڭ وزىندە ايەل مەن ەر اراسىنداعى ايىرما ايقىن. بيولوگيالىق تۇرعىدا, جاراتىلىسىندا وزگەشەلىك بولسا, ءدىني رەتتەن دە ەركەكتىڭ ءبىر قابىرعاسىنان جاراتىلعان دەيتىن ايەل زاتىن قانشا شىدامدى, ءومىر قيىندىعىنا بەيىم, قاجەت تۇسىندا قايرالىپ شىعار ءور, ءومىر ءسۇرۋ ۇزاقتىعى دا ەرلەرگە قاراعاندا, جوعارى دەگەنمەن, ايەلدىڭ اتى – ايەل.
دەمەك, ايەلدەردىڭ زەينەتكە شىعۋ جاسىن ەرلەرمەن تەڭەستىرۋدە وزگەشە ولشەمدەردىڭ قاجەتتىگى ايقىن. بىرەۋ ءۇشىن, زەينەتكەرلىككە جەتۋ زەرىگۋدىڭ باسى بولسا, ەندى بىرەۋ ءۇشىن, زارىعا جەتەتىن اسىل كۇن. سوندىقتان ايەلدەردىڭ زەينەت جاسىنىڭ شەگىن انىقتاۋدا ماماندىعىن, جۇمىسىنىڭ زيياندىلىعىن, دەنساۋلىعىنا تيگىزەر اسەرىن تاعى دا تولىپ جاتقان ولشەمدەرمەن ايقىنداپ, زەرتتەۋ كەرەك سياقتى.
