ليريكاعا تولى تەرەڭ مازمۇنىمەن تىڭداۋشىنى ءۇيىرىپ اكەتەتىن چايكوۆسكي مۋزىكالارى ادام ءومىرى, بوستاندىق, باقىت ءۇشىن كۇرەس جىرلانۋى سەبەپتى دە ۇلكەن قۇرمەتكە يە بولسا كەرەك. جىل وتكەن سايىن مۋزىكانت شىعارمالارىن ناسيحاتتاۋدا ەرەكشە مانگە يە فەستيۆال كوكجيەگى كەڭىپ, الەمدىك دەڭگەيدە بەدەلى كۇشەيىپ كەلەدى. دۇنيەنىڭ ءتورت تارابىنان سايىسقا قاتىسام دەگەن ۇمىتكەرلەردىڭ سانى كوبەيدى. بيىلعى بايگەدە 20 مەملەكەتتەن كەلگەن 120-دان استام تالانت يەلەرى باق سىنادى. ولاردىڭ بارلىعى ءوز ەلدەرىندە شاشاسىنا شاڭ جۇقتىرماعان جۇيرىك ورەندەر. كلاسسيكالىق مۋزىكاعا جان-تانىمەن بەرىلگەن تالانتتى جاس پيانيستەر, سكريپكاشىلار جانە ۆيولونچەليستەر ءۇشىن بۇل بايقاۋدىڭ ماڭىزى زور.
پ.ي.چايكوۆسكي اتىنداعى حالىقارالىق كونكۋرس لاۋرەاتتار قاۋىمداستىعىنىڭ باس ديرەكتورى اندرەي ششەرباك بايقاۋدىڭ كلاسسيكالىق مۋزىكا الەمىندە ايتۋلى ورنى بار ەكەنىن اتاپ ءوتتى.
– ونەرپاز جاس تالانتتارىمىز ءۇشىن وسىنداي سالتاناتتى كەش ۇيىمداستىرىلىپ وتىر. ۇمىتتەرىن ۇكىلەپ جۇگىرىپ جۇرگەن اتا-انالارعا, ۇستازدار قاۋىمىنا ەكى ەسە العىس ايتامىن. كونكۋرس شىن مانىندە وتە جوعارى دەڭگەيدە ءوتتى, – دەيدى اندرەي ميحايلوۆيچ.
«ۆيولونچەل» اتالىمى بويىنشا يو كيتامۋرا (جاپونيا), «سكريپكا» اتالىمى بويىنشا نەيكۋنگ كان (كورەيا), «فورتەپيانو» اتالىمى بويىنشا كايل حۋ (اقش) باس جۇلدەگە يە بولدى. لاۋرەاتتاردى قۇتتىقتاعان قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجاەۆا حالىقارالىق فەستيۆالدى زاماناۋي مادەنيەت كلاستەرلەرىن دامىتۋعا باعىتتالعان اۋقىمدى جوبا دەپ اتادى.
– قازىر ەلىمىزدە تورتكۇل دۇنيەنى تاڭقالدىرعان ەكسپو-2017 كورمەسى ءوتىپ جاتىر. بولاشاقتىڭ ەنەرگياسى دەگەن ول – ءبىزدىڭ وسى وتىرعان تالانتتى ۇل-قىزدارىمىز. ەكسپو كورمەسى اياسىندا قالانىڭ ەڭ كورىكتى جەرىندە مۋزىكا ءۇنىن اسقاقتاتىپ, مۋزىكا مەرەكەسىنە اينالدىرعاندارىڭىز ءۇشىن قۋانىشىم شەكسىز. ونەر – ماڭگىلىك. بىرگە قۋانىپ, بىرگە تولقىدىق, – دەيدى ايمان مۇساقوجاەۆا.
ايا ءومىرتاي
«ەگەمەن قازاقستان»
