ەلوردا تورىندە ۇلتتىق ۇلان باس قولباسشىسىنىڭ جۇلدەسى ۇشىن ۇيىمداستىرىلعان «شىعىس» وڭىرلىك قولباسشىلىعىنىڭ اسكەري وركەسترى بيىل دا سول بيىكتەن كورىنىپ, گران-پري جۇلدەسىن يەلەندى. قازاقستان رەسپۋبليكاسى ىشكى ىستەر ورگاندارىنىڭ 25 جىلدىعىنا وراي وسىمەن التىنشى جىل قاتارىنان جالاۋى جەلبىرەگەن بايقاۋعا رەسەيدىڭ ۇلتتىق ۇلانى اسكەرى ورال وكرۋگى شتابىنىڭ اسكەري وركەسترى مەن قىتاي حالىق رەسپۋبليكاسى حالىقتىق قارۋلى پوليتسياسىنىڭ وركەسترى دە قاتىسىپ, ونەر دوداسىنىڭ كوركىن قىزدىردى.
"قازىلار القاسى بايقاۋعا قاتىسۋشىلاردىڭ ونەرىن ۇجىمدىق اۋىزبىرشىلىگى, كومپوزيتسيالار رەپەرتۋارى, اكتەرلىك شەبەرلىگى, رەگلامەنتتى ساقتاۋى, ساپتىق ءجۇرىسى سىندى كريتەريلەر بويىنشا باعالادى. فەستيۆالگە مەملەكەتتىك كۇزەت قىزمەتىنىڭ (پرەزيدەنتتىك وركەستر) اسكەري وركەسترى مەن قۇرمەت قاراۋىل روتاسى, ۇقك شەكارا قىزمەتىنىڭ بىرلەسكەن وركەسترى جانە قورعانىس مينيسترلىگىنىڭ ورتالىق وركەسترى دە قاتىستى. وتانسۇيگىشتىك پەن ۇرپاقتار ساباقتاستىعى رۋحىندا ورىلگەن پلاتس-كونتسەرت ەكسپو حالىقارالىق كورمەسى ءىس-شارالارى اياسىندا وتكىزىلىپ, كلاسسيكالىق, حالىقتىق جانە ەسترادالىق مۋزىكالىق تۋىندىلار مەن جاۋىنگەرلىك پاراد-دەفيلە, اسكەري-قىزمەتشىلەردىڭ قارۋ-جاراقپەن كورسەتىلگەن تانىمدىق كورسەتىلىمدەرى قالا جۇرتشىلىعىن ەرەكشە اسەرگە بولەدى», - دەيدى ۇلتتىق ۇلاننىڭ «شىعىس» وڭىرلىك قولباسشىلىعىنىڭ باسپاسوز قىزمەتىنىڭ جەتەكشىسى باعدات امانگەلدى.
ازامات قاسىم,
«ەگەمەن قازاقستان»
وسكەمەن
