بىرنەشە جىل بۇرىن, ۇلى وتان سوعىسىنداعى جەڭىستىڭ 70 جىلدىعى قارساڭىندا ورال قالاسىنىڭ زيالى قاۋىم وكىلدەرى ۇرىس دالاسىندا قازاقتىڭ ۇلدارىمەن بىرگە ابىرويمەن ەلىن قورعاعان قاھارمان قىزدارىنا ەسكەرتكىش قويۋ ۇسىنىسى تۇسكەن ەدى. وسىعان وراي باتىس قازاقستان وبلىسى اكىمدىگى رەسپۋبليكالىق بايقاۋ جاريالاعان. مەملەكەتتىك كوميسسيانىڭ شەشىمىمەن 2015 جىلدىڭ 18 ناۋرىزىندا اشىق كونكۋرسقا ۇسىنىلعان 11 جوبانىڭ ىشىنەن ءمۇسىنشى نۇرلان دالبايدىڭ جوباسى تاڭداپ الىندى. بۇل اۆتور – ورال قالاسىنداعى اباي مەن سىرىم باتىر تۇلعاسىن, سونداي-اق اتىراۋداعى دينا نۇرپەيىسوۆانىڭ, استاناداعى كەنەسارى حاننىڭ, تاعى باسقا بەلگىلى مۇسىندەردى سومداعان تانىمال شەبەر.
ەسكەرتكىشتىڭ اشىلۋ شاراسىنا باتىس قازاقستان وبلىسى اكىمىنىڭ ءبىرىنشى ورىنباسارى ارمان وتەعۇلوۆ, قازاق كسر-ءنىڭ حالىق ءارتىسى, ءانشى, كومپوزيتور ەسكەندىر حاسانعاليەۆ جانە ۇلى وتان سوعىسىنىڭ ارداگەرلەرى حامزا سافين, مۇحتار اجىعۇلوۆ, يۆان گاپيچتەر قاتىستى. شارا بارىسىندا تەاترلاندىرىلعان كورىنىس قويىلىپ, پاتريوتتىق اندەر شىرقالدى. جينالعان جۇرت ەل باسىنا كۇن تۋعاندا اتقا قونعان ارۋ قىزدار ەسكەرتكىشىنە گۇل شوقتارىن قويدى.
– بىزگە بەيبىت كۇندى جاقىنداتقان مايدان ارداگەرلەرىنە ارقاشان باسىمىزدى يەمىز, - دەيدى سوۆەت وداعىنىڭ باتىرى مانشۇك مامەتوۆا مۋزەي-ءۇيىنىڭ ديرەكتورى سۆەتلانا بەكتەنوۆا. ورالداعى جاڭادان اشىلعان كومپوزيتسيادا ورتادا مانشۇك, ەكى جاعىندا ءاليا مەن حيۋاز بەينەلەنگەن. ەسكەرتكىشتىڭ بيىكتىگى 3,6 مەتر. ايتا كەتەيىك, ءدال وسى الاڭدا 1988 جىلدان بەرى سوۆەت وداعىنىڭ باتىرى مانشۇك مامەتوۆانىڭ پۋلەمەت لەنتاسىن قولىنا ۇستاعان ءمۇسىنى تۇرعان بولاتىن. ءمۇسىنشى حاكىمجان ناۋرىزباەۆتىڭ قولىنان شىققان بۇل تۋىندى رەستاۆراتسيادان وتكەن سوڭ بقو اۋداندارىنىڭ بىرىنە ورناتىلماق.
جاڭا ەسكەرتكىش – 1941-1945 جىلدارى ۇوس-ندا وشپەس ەرلىك كورسەتكەن قازاقتىڭ قاھارمان ءۇش قىزىنا ورناتىلعان تۇڭعىش ورتاق تۋىندى. بۇعان دەيىن الماتى قالاسىندا ءاليا مەن مانشۇككە ارنالعان كومپوزيتسيا تولە بي كوشەسىندە (استانا الاڭى الدىنداعى باق) ورناتىلعان. ول ەسكەرتكىشتىڭ اۆتورلارى شىعارماشىلىق ۇجىم جەتەكشىسى س.ق.بايماعامبەتوۆ, ءمۇسىنشى ق.ساتىبالدين, سəۋلەتشىلەر ت.ەراليەۆ, ۆ.سيدوروۆ, م.ە.ەركىنوۆ بولعان ەدى.
قازبەك قۇتتىمۇرات ۇلى,
"ەگەمەن قازاقستان"
ورال
سۋرەتتى تۇسىرگەن وكسانا كاتكوۆا
