ۆەلوسپورت
«Astana Pro Team» كلۋبىنىڭ ۆەلوشابوندوزى جاندوس بيجىگىتوۆ ۆەلوسپورتتان الماتىدا ءوتىپ جاتقان قازاقستان چەمپيوناتىنىڭ جەكەلەي سىنىندا چەمپيون اتاندى. 50 شاقىرىم قاشىقتىقتى ول ءبىر ساعات, ءبىر مينۋت 59 سەكۋندتا ءجۇرىپ وتكەن. بۇل جاندوس بيجىگىتوۆتىڭ قازاقستان بىرىنشىلىگىندەگى العاشقى جەڭىسى.
سونىمەن قاتار, جاندوس بيجىگىتوۆتەن 11 جانە 34 سەكۋند كەيىن كەلگەن نيكيتا ستالنوۆ پەن ارتەم زاحاروۆ چەمپيوناتتىڭ كۇمىس جانە قولا مەدالىن يەلەندى.
قازاق كۇرەسى
2 شىلدە كۇنى استاناداعى «بارىس ارەنا» سپورت كەشەنىندە قازاقستان پرەزيدەنتى جۇلدەسى ءۇشىن وتەتىن «قازاقستان بارىسى-2017» فينالىندا كورەرمەندەر اراسىندا بيىل دا كولىك ويناتىلماق.
بۇل تۋرنيردە جارىسقا قاتىساتىن بالۋاندار عانا ەمەس, كورەرمەندەر مەن جانكۇيەرلەر دە سىيلىقسىز قالمايدى. «قازاقستان بارىسىنىڭ» فينالدىق باسەكەسىندە كىرۋ بيلەتتەرى بويىنشا «Renault Logan» ماركالى اۆتوكولىك ويناتىلادى. بيلەتتەر باعاسى 500 تەڭگە مەن 5 مىڭ تەڭگە ارالىعىندا.
بوكس
اقش-تىڭ لاس-ۆەگاس قالاسىنداعى گولوۆكين-الۆارەس جەكپە-جەگى قازاقستان ۋاقىتى بويىنشا 17 قىركۇيەكتە وتەدى. Golden Boy پروموۋتەرلىك كومپانياسىنىڭ باسشىسى وسكار دە لا حويا گەننادي گولوۆكين – ساۋل الۆارەس جەكپە-جەگىنىڭ باستالۋ ۋاقىتىن اتادى.
ونىڭ ايتۋىنشا, كەشتىڭ نەگىزگى كەزدەسۋى اقش ۋاقىتىمەن كەشكى ساعات 23:00-دەن كەشىكپەي باستالادى. ال قازاقستاندىق كورەرمەندەر بۇل جەكپە-جەكتى 17 قىركۇيەك, ياعني, جەكسەنبى كۇنى تاڭعى ساعات 09:00-دەن باستاپ كورە الادى.
ازىرلەگەن
ءالي بيتورە,
«ەگەمەن قازاقستان»
