– سۇڭعات, جۋىردا استانادان جۇلدەمەن ورالعانىڭدى جاقسى بىلەمىز. جەڭىس قۇتتى بولسىن!
– راحمەت! ەلوردادا حالىقارالىق ەكىنشى BI Marathon ۇيىمداستىرىلدى. بۇل – قايىرىمدىلىق مارافونى. بەس مىڭداي ادام قاتىستى. ءۇش مىڭعا جۋىعى – «BI Group» كومپانياسىنىڭ قىزمەتكەرلەرى. ۇمىتكەرلەردىڭ ەڭ ەگدەسى – 74 جاستا, ەڭ كىشىسى – سەگىز جاستا. قاتىسۋشىلار 5, 10, 21 جانە 42,2 شاقىرىمدارعا جۇگىردى. مەن 42,2 شاقىرىمدىق قاشىقتىققا جۇگىرگەن 30-39 جاس ارالىعىنداعى سپورتشىلار باسەكەسىندە مارە سىزىعىن ءبىرىنشى بولىپ كەستىم. كورسەتكىشىم – 2 ساعات 40:43 مينۋت. ءبىزدىڭ توپتا جۇزگە جۋىق ادام ونەر كورسەتتى. بۇل – مەنىڭ 10-ىنشى مارافونىم. كلاسسيكالىق مارافوننان العاش رەت جۇلدە الدىم. كەزەكتى ءبىر بيىكتىكتى باعىندىرعانىما قۋانىشتىمىن. ايتپەسە, 6, 12 جانە 24 ساعاتتىق سۋپەرمارافونداردا باق سىناپ, تالاي مارتە ولجالى بولعانمىن.
– مارافونمەن قاشاننان بەرى اۋەستەنىپ ءجۇرسىڭ؟
– مەنى كوبى بالۋان رەتىندە تانيدى. ەركىن كۇرەسپەن اينالىسقانمىن. مارافون – بالا كۇنگى ارمانىم. 2013 جىلدان باستاپ اڭسارىم ەرەكشە اۋىپ, العاشقى مارافونىما قاتىستىم. قاتتى ۇنادى. سودان بەرى جارىستارعا قاتىسىپ ءجۇرمىن. قازىر مارافون ءومىرىمنىڭ مانىنە اينالدى.
مارافون – قاشىقتىقتى جۇگىرىپ وتكەن قاتىسۋشىنىڭ بارلىعىنا ەستەلىك مەدال بەرىلەتىن جالعىز سپورت ءتۇرى. ول ادامدى ءوزىن-ءوزى تاربيەلەۋگە, سالاماتتى ءومىر سالتىن ۇستانۋعا ۇيرەتەدى. سونداي-اق, مارافون ارقىلى الەمنىڭ كوپتەگەن ەلىن ارالاۋعا مۇمكىندىك بار. جۇگىرۋ – ەڭ ءتيىمدى سپورت ءتۇرى. بۇعان ارنايى اياق كيىمىڭ مەن نيەت بولسا جەتكىلىكتى. جۇگىرۋمەن كەز كەلگەن ۋاقىتتا, كەز كەلگەن مەرزىمدە, كەز كەلگەن جەردە اينالىسۋعا بولادى جانە ول جاس تالعامايدى. مارافونمەن اينالىسۋعا وسىنىڭ ءبارى اسەر ەتكەن شىعار دەپ ويلايمىن.
– العاشقى مارافونىڭدى قاي جەردە جۇگىردىڭ؟
– ونى ۇمىتۋ مۇمكىن ەمەس. العاش رەت رەسەي فەدەراتسياسىنىڭ ومبى قالاسىندا ۇيىمداستىرىلعان مارافوندا باق سىنادىم. 42,2 شاقىرىمدى ەش قيىندىقسىز جۇگىرىپ ءوتتىم. ماقساتىم جۇلدە الۋ ەمەس, مارەگە جەتۋ ەدى. سول ويىمدى جۇزەگە اسىردىم. ال ودان كەيىنگى ءار مارافونىم قيىنعا ءتۇستى. سەبەبى, ناتيجەنى جاقسارتۋ ءۇشىن كۇش-قۋاتىڭدى سارقا جۇمساۋعا ءتيىسسىڭ. بۇگىنگە دەيىن 10 مارافوندا, توعىز جارتىلاي مارافوندا باق سىنادىم. جەڭىپ العان جۇلدەم دە جەتەرلىك.
– كۇن سايىن جاتتىعاسىڭ با؟
– ءيا. كۇنىنە 15-20 شاقىرىم جۇگىرەمىن. جۇمىستان كەيىنگى اينالىسار ءىسىم – جۇگىرۋ.
– شاكىرتتەرىڭ بار ما؟
– ەكى شاكىرتىم بار. اباي اتىنداعى ورتا مەكتەپتىڭ وقۋشىلارى ءالىمحان قۇرمانعاليەۆ پەن جانار تولەۋدى دايىنداپ ءجۇرمىن. ەكەۋىنىڭ دە اياق الىسى جاقسى. ءالى 18 جاسقا تولعان جوق. سوندىقتان, ءىرى مارافوندارعا قاتىسا المايدى. دەسە دە, وسى جىلدىڭ 23 ساۋىرىندە VI الماتى مارافونىندا ونەر كورسەتتى. 10 شاقىرىمدى باعىندىردى. وسى جىلدىڭ تامىز ايىندا رەسەيدىڭ ومبى قالاسىندا ۇيىمداستىرىلاتىن مارافونعا وزىممەن بىرگە ءالىمحاندى دا الا كەتپەكپىن.
– ايگىلى مارات جىلانباەۆ سەكىلدى گيننەستىڭ رەكوردتار كىتابىنا ەنەرلىكتەي تاۋەكەلدەرگە بارۋ ويدا جوق پا؟
– جوق. ول ءۇشىن قىرۋار قارجى مەن موتيۆاتسيا كەرەك قوي. بىراق, ءبىر ارمانىم بار. مارافوننىڭ تاريحي وتانى – گرەكيادا جۇگىرگىم كەلەدى.
– الدا قانداي جارىستار بار؟
– شىلدە ايىندا استانادا قازاقستان چەمپيوناتى وتەدى. ازىرشە كۇنى ناقتىلانعان جوق. سونداي-اق, تامىزدا رەسەيدىڭ ومبى قالاسىنداعى مارافونعا قاتىسۋدى جوسپارلاپ وتىرمىن. وسى ەكى جارىسقا دايىندالۋدامىن.
– اڭگىمەڭە راحمەت. ساتتىلىك سەرىك بولسىن!
اڭگىمەلەسكەن
فارحات امىرەنوۆ,
جۋرناليست
پاۆلودار وبلىسى,
اقتوعاي اۋدانى
