تاريح عىلىمدارىنىڭ دوكتورى, ل.ن.گۋميلەۆ اتىنداعى ەۇۋ ارحەولوگيا جانە ەتنولوگيا كافەدراسىنىڭ پروفەسسورى ايمان دوسىمباەۆانىڭ ايتۋىنشا, اقمولا وبلىسى اۋماعىنداعى قاسيەتتى ورىنداردىڭ ءبىرتۇتاس جەلىسىن قۇرۋ ءوڭىر تاريحىن تولىقتاي تۇسىنۋگە مۇمكىندىك تۋعىزىپ, تۋريستىك كلاستەردىڭ دامۋىنا وزىندىك سەرپىن بەرەتىن بولادى. «قازىر بىزگە قاسيەتتى ەسكەرتكىشتەردىڭ ءبىرتۇتاس جەلىسىن قۇرۋ جۇمىستارىن قانداي وڭتايلى جولمەن باستاۋدى زەرتتەپ الۋىمىز قاجەت. وبلىستىڭ تاريحي-مادەني قۇندىلىقتارىن, ءوڭىردىڭ عانا ەمەس, بۇكىل قازاقستاننىڭ قاسيەتتى ورىندارىن جاستايىنان بىلۋگە باۋلۋ ءۇشىن مەكتەپكە دەيىنگى جانە مەكتەپتەگى بىلىمگە ەرەكشە كوڭىل ءبولىنۋى قاجەت», دەدى ساۋلە بۇرباەۆا ءوز سوزىندە.
رەتى كەلگەندە قازىر اقمولا وبلىسى اۋماعىندا 1793 تاريحي-مادەني نىسان بار ەكەندىگىن ايتا كەتەيىك. ارحەولوگيالىق جادىگەرلەر ساناتىنداعى 1375 ەسكەرتكىش زەرەندى, ەرەيمەنتاۋ, بۋراباي, قورعالجىن جانە اتباسار اۋداندارىنىڭ اۋماعىندا ورنالاسقان. مادەنيەت باسقارماسى باسشىسىنىڭ ايتۋىنشا, قاسيەتتى ەسكەرتكىشتەر كارتوگرافيالانىپ, عىلىمي جۇيەگە تۇسىرىلگەنىمەن, ولاردى تەرەڭ زەرتتەپ, جالپىۇلتتىق تاريحي-مادەني قۇندىلىقتار نىساندارىنىڭ ءتىزىمىن جاساۋ ورىندى بولماق. وسىعان وراي مادەنيەت باسقارماسى جانىنان قۇرامىندا ۆەدومستۆو قىزمەتكەرلەرىنەن وزگە مۇراجاي قىزمەتكەرلەرى, ولكەتانۋشىلار, عالىمدار مەن تاريحشىلار بار جۇمىس توبى جەرگىلىكتى جانە رەسپۋبليكالىق ماڭىزى بار نىسانداردى رۋحاني نىساندار كارتاسىنا ەنگىزۋ بويىنشا جۇمىس جۇرگىزۋدە.
اسقار تۇراپباي ۇلى,
«ەگەمەن قازاقستان»
اقمولا وبلىسى
