راسىمگە جينالعان جۇرتقا قوشەمەت بىلدىرگەن دۇنيەجۇزى قازاقتارىنىڭ قاۋىمداستىعى توراعاسىنىڭ ءبىرىنشى ورىنباسارى تالعات ماماشەۆ مىرزا, الىستان ات تەرلەتىپ كەلگەن قوناقتارعا ىستىق ىقىلاسىن بىلدىرە وتىرىپ, اتاۋلى شارا قۇرىلتايعا قوش كەلۋىمەن قۇتتىقتادى.
ودان كەيىن ارنايى ازىرلەنگەن كولىككە وتىرعان قوناقتار قالا شەتىندە ورنالاسقان «ەتنواۋىلعا» ات باسىن بۇردى. بۇندا اقمولا وبلىسىنىڭ مادەني كۇندەرى ءوتىپ جاتىر ەكەن. كۇمبىرلەگەن كۇيدىڭ ۇنىمەن ءھام شىرقاپ سالعان ءاننىڭ ءسانىن كەلتىرىپ قادىرلى مەيمانداردى قارسى العان وبلىس ونەرپازدارى كوپشىلىككە قازاقتىڭ سالت-داستۇرلىك ءراسىمى «قۇدا ءتۇسۋ», «قىز ۇزاتۋ», «كەلىن ءتۇسىرۋ», «بەت اشۋ» سياقتى جورالعىلاردى كورسەتتى.
«ەتنواۋىلدىڭ» ءسانى اقشاڭقان بوز ۇيلەردىڭ اربىرىنە باس سۇققان اعايىندار ۇلتتىق قولدانبالى ونەر تۇرلەرىن تاماشالاپ, اق كۇمىستى قاقتاي زەرلەگەن القا-سىرعا, كون بىلعارىدان ويمىشتاپ جاساعان سابا-تورسىق, ءتىرى ءجۇندى ءپىسىرىپ ورمەكشەلەپ ويۋ سالعان كىلەمشەلەردى جاعالاي كورىپ شىقتى. ۇيدە قالعان تۋىس-جۇراعاتقا تابارىك بولسىن دەپ ءۇزىپ-ج ۇلىپ الىپ جاتقاندار بارشىلىق.
مىنا ءبىر شەتتە تۇلەكتە وتىرعان قوڭىر بۇركىتىن كوتەرىپ قۇسبەگىلەر ساياتشىلىقتىڭ ءسانىن كورسەتسە, ورتاداعى كىلەمدە جاس بالۋاندار بەلسەندى بەلدەسۋدىڭ ورەن ۇلگىسىن كورسەتتى.
وسىلاي اتام قازاقتىڭ بايىرعى كوشپەندى ءومىرىنىڭ ونەگەسىن كورگەن شەتەلدىك قازاقتار ءبىرى باسىن شايقاپ, تاڭدايىن قاقسا, ەكىنشىلەرى, مۇنداي ەل بەرگەن, ونىڭ ەرتەڭى نۇرلى, بولاشاعى باياندى بولارىنا سەنگەن ريزا كەيىپپەن باتىستان جەلپي سوققان سامال جەلدىڭ وتىنە كەۋدەسىن كەرىپ, الشاڭ باسىپ بارا جاتتى...
وسى القالى جيىننىڭ بەل ورتاسىنان قازاقجاندى اپامىز اسىلى وسماندى جولىقتىرىپ: − بۇگىنگى مەرەيلى مەرەكە جايلى نە ايتاسىز؟ – دەپ ەدىك, اپامىز كوسىلىپ قويا بەردى:
– دۇنيەجۇزى قازاقتارى قۇرىلتايىنىڭ ءمانى دە, ءجونى دە باسقا. ويتكەنى, ادام بالاسى ءۇشىن ساعىنىش تا ءبىر باقىت. سول ساعىنىشىن قۇس قاناتىنا ارقالاپ ەلىنە جەتكەن قانداستارىمىز ۇياداي ەلىندە ۇرپاق ءوسىرىپ وتىرعان ءسىز بەن ءبىزدى كورىپ, كوڭىلى مارقايىپ, سەنىمى نىعايماي ما؟! اللا قازاقتى وسى باقىتىنان ايىرماسا ەكەن. قازاققا دارقاندىق دالاسىنان دارىعان, ءسويتىپ بۇل حالىق تەكتىلىككە جارىعان. مىنا اينالاڭدا سامالاداي سامساپ, شامشىراقتاي شالقىپ تۇرعان بوز ۇيلەرگە قارامايسىز با, قانداي كوركەم ۇيلەسىم. اقىل-ەسى ساۋ ادام قۋانىشقا قۋانا ءبىلۋى كەرەك قوي. وسىنى سىرتتان كەلىپ كورگەن قازاق ءوزىنىڭ قازاق بولىپ تۋعانىنا قۋانباي ما؟! اللا ەلىمدى دالاسىمەن, حالقىمدى نازارباەۆ سياقتى داناسىمەن, ءسابيدى اناسىمەن, ازاماتتاردى ويلى ساناسىمەن ساقتاعاي, – دەپ اقجارما ءسوزىن قايىردى.
كۇن ەڭكەيگەندە «ەتنواۋىلدان» قايتقان قوناقتار كەشكە «استانا وپەرا» تەاترىنا بارىپ «قىز جىبەك» قويىلىمىن تاماشالادى. ۇلى تويدىڭ جالعاسى, ياعني قۇرىلتايدىڭ اشىلۋ سالتاناتى بۇگىن ءوتىپ, سەنبى كۇنى جوسپارلى ءىس-شارالار جالعاسىن تابادى.
بەكەن قايرات ۇلى,
ۇلاربەك نۇرعالىم,
سۋرەتتى تۇسىرگەن ورىنباي بالمۇرات
«ەگەمەن قازاقستان»
