سارسەنبى كۇنى قازاقستاننىڭ جەرگىلىكتى باسىلىمدارىندا جاريالانعان ەل ۇكىمەتىنىڭ قاۋلىسىنا ساي, قازاقستان استاناسىنداعى حالىقارالىق اۋەجايدىڭ اتى وزگەرتىلىپ, قازىرگى مەملەكەت باسشىسى نۇرسۇلتان نازارباەۆتىڭ اتىمەن اتالاتىن بولدى.
ەل پرەزيدەنتى مەملەكەتتىڭ قالىپتاسۋى مەن دامۋىندا ەرەكشە رولگە يە. جەرگىلىكتى باسىلىمداردىڭ حابارلاۋىنشا, قازاقستاننىڭ قوعام جانە مەملەكەت قايراتكەرلەرى اتالعان شەشىمدى قۇپتاپ وتىر. پارلامەنت دەپۋتاتتارىنىڭ پىكىرىنشە, ۇكىمەتتىڭ بۇل قاۋلىسى رەسمي قۇجات تۇرىندە شىققانىمەن, حالىقتىڭ ۇسىنىسى رەتىندە قابىلدانۋدا.
ايتا كەتەيىك, بۇل اۋەجاي تاياۋدا عانا جاڭا تەرمينالمەن تولىعىپ, بيىل ەكسپو حالىقارالىق مامانداندىرىلعان كورمەسىن وتكىزۋ ۇستىندەگى استانا ءوڭىردىڭ ترانزيتتىك حابىنا اينالىپ وتىر.
ۇكىمەتتىڭ اۋەجاي اتىن پرەزيدەنتتىڭ ەسىمىمەن اتاۋ تۋرالى قاۋلىسىنان كەيىن ەلدىڭ قوعام قايراتكەرلەرى بۇل تۋرالى كوپشىلىكتىڭ اتىنان جەرگىلىكتى بۇقارالىق اقپارات قۇرالدارىنا پىكىر ءبىلدىردى. ولاردىڭ ايتۋىنشا, نىساننىڭ اتىن مەملەكەت باسىنداعى ادامنىڭ قۇرمەتىنە اتاۋ الەمنىڭ كوپتەگەن ەلىندە بار تاجىريبە. وعان قوسا, بۇرىنعى كەڭەستىك رەجىم كەزىندە «تسەلينوگراد» دەپ ورىسشا اتالعان قازىرگى استاناداعى اۋەجايدىڭ كودى ءالى كۇنگە سول ەسكى اتىمەن اتالىپ, ياعني TSE كودىمەن بەلگىلەنىپ ءجۇر. كوپشىلىكتىڭ پىكىرىنشە, جاڭا اتاۋدى پايدالانا وتىرىپ, ەسكى كود تا الىنىپ تاستالۋى ءتيىس. ءوز كەزەگىندە ۇكىمەتتەگىلەر بۇل پىكىرمەن كەلىسىپ وتىر. ازىرگە جاڭا كود ناقتى بەكىتىلمەگەنىمەن, قۇزىرەتتى مەكەمەلەر بىرنەشە نۇسقاسىن دايىنداپ قويعان.
ۇكىمەتتىڭ اۋەجاي اتىن اۋىستىرۋ تۋرالى قاۋلىسىنا جەرگىلىكتى حالىق قولداۋ ءبىلدىرىپ جاتىر. جالپى, قازاقستان پرەزيدەنتىنىڭ ءوزى ادەتتە مۇنداي باستامالاردى قولداي قويمايدى. ماسەلەن, وسىدان ءبىر جىل شاماسى بۇرىن ەل پارلامەنتىنىڭ دەپۋتاتتارى ەل استاناسىنىڭ اتىن «نۇرسۇلتان» نەمەسە «نازارباەۆ» دەپ اتاۋ تۋرالى ۇسىنىس بىلدىرگەن ەدى. دەگەنمەن, مەملەكەت باسشىسى مۇنى ورىنسىز دەپ تاۋىپ, كەلىسىمىن بەرمەگەن بولاتىن.
تاياۋدا عانا جاڭا تەرمينالمەن تولىققان بۇل اۋەجاي ەۋرازيا كەڭىستىگىندە جولاۋشىلار حابىنا اينالىپ وتىر. ۇكىمەتتىڭ ەلدى ترانزيتتىك مەملەكەت ەتۋ ماقساتىندا قولعا العان جۇمىستارى ناتيجەسىندە قازاقستان بىرنەشە ەلمەن ۆيزا رەجىمىن الىپ تاستاسا, استانا مەن الماتى اۋەجايلارى ەۋروپا مەن ازيانىڭ اراسىنداعى ترانزيتتىك كوپىر رەتىندە ءوز الەۋەتىن ارتتىرا تۇسۋدە.
دايىنداعان
باۋىرجان مۇقانوۆ,
«ەگەمەن قازاقستان»
