«ۇركەر» جۋرنالىنىڭ باس رەداكتورى, حالىقارالىق «الاش», «سوروس-قازاقستان» سىيلىقتارىنىڭ لاۋرەاتى قۋاندىق تۇمەنباي ءوز سوزىندە قىزىلجاردىڭ قۇيقالى توپىراعىنان ماعجان, ءسابيت, عابيت, يۆان شۋحوۆ, سافۋان شايمەردەنوۆ سەكىلدى قارىمدى قالامگەردىڭ ءوسىپ-ونگەنىن, ولاردىڭ كەلەر ۇرپاققا اماناتتاعان مول مۇرالارى قۇندىلىعىن ەشقاشان جوعالتپايتىنىن ايتا كەلىپ, پرەزيدەنتتىڭ «ماقساتقا جەتۋ ءۇشىن ءبىزدىڭ سانامىز ىسىمىزدەن وزىپ ءجۇرۋى, ياعني ودان بۇرىن جاڭعىرىپ وتىرۋى ءتيىس» دەنەن پايىمدارىنا جۇرتشىلىق نازارىن اۋداردى.
«رۋحاني جاڭعىرۋ بۇگىن باستالىپ, ەرتەڭ اياقتالاتىن جۇمىس ەمەس. ونى ساياسي, ەكونوميكالىق دامۋىمىزبەن ساباقتاستىرۋ ءۇشىن,ەڭ الدىمەن, ءار قازاقستاندىقتىڭ بويىندا ءبىرتۇتاس ۇلت بولۋ يدەياسىن قالىپتاستىرۋىمىز كەرەك. بۇل ورايدا, جاس بۋىن تاربيەسى ەرەكشە ورىن الادى. ماقالادا «جاستارىمىز باسىمدىق بەرەتىن مەجەلەردىڭ قاتارىندا ءبىلىم ءاردايىم ءبىرىنشى ورىندا تۇرۋى شارات. سەبەبى, قۇندىلىقتار جۇيەسىندە ءبىلىمدى بارىنەن بيىك قوياتىن ۇلت قانا تابىسقا جەتەدى» دەلىنگەن. سانا-سەزىمىمىز بەن دۇنيەتانامىمىزعا ابدەن ءسىڭىپ قالعان تاۋتاۋرىن قاعيدالاردان ارىلۋدىڭ بىردەن-ءبىر جولى–ساناداعى سىلكىنىس. ول وزدىگىنەن كەلمەيدى. زامان اعىمىنا يكەمدەلە وتىرىپ, جاڭا ءداۋىردىڭ جاعىمدى جاقتارىن بويعا سىڭىرۋ–الداعى باستى مىندەت وسى», دەدى بەلگىلى جازۋشى.
«پروستور» جۋرنالى باس رەداكتورىنىڭ ورىنباسارى, اۋدارماشى ليۋبوۆ شاشكوۆا ساناداعى سىلكىنىستى يدەلوگيالىق جاعىنان قامتاماسىز ەتۋ, ۇلتتىق بولمىستىڭ وزەگىن ساقتاۋ, سالت-داستۇرلەردى, ۇلتتىق رۋحىمىزدى بايىتۋ ماسەلەلەرىن ءوز سوزىنە ارقاۋ ەتتى. «قازاقستانداعى 100 جاڭا ەسىم» جوباسىنىڭ ءمان-ماعىناسىن اشىپ كورسەتىپ, دايەكتى مىسالدار كەلتىردى. تاۋەلسىزدىك جىلناماسى ناقتى ادامداردان, سان قيلى تاعدىرلاردان, جاسامپاز ەڭبەكتەن قۇرالادى. ونداي تۇلعالار ەلىمىزدە از ەمەس. وىڭ وڭىرلىك نۇسقالارى دا جاسالى جاتسا, جاستارىمىزعا ۇلگى بولار ەدى,دەدى ول.
جيىندا وبلىستىق قازاقستان حالقى اسسامبلەياسىنىڭ حاتشىلىق مەڭگەرۋشىسى نايل ساليموۆ, «لاد» سلاۆيان قوعامىنىڭ جەتەكشىسى الەساندر كۋرلەنيا, قازاقستان جازۋشىلار وداعىنىڭ مۇشەسى, جۋرناليست-پۋبليتسيست زەينوللا اكىمجانوۆ, جەرگىلىكتى اقىن ۆاسيلي كونوپلەۆ, تاعى باسقالارى ەلباسى ۇسىنعان باعدارلامالار مەن جوبالار جۇرتشىلىق كوڭىلىنەن شىققانىن, ەندىگى ماقسات جاڭا جاعدايداعى رۋحاني جاڭعىرۋ يدەيالارىن دامۋىمىزدىڭ باستى قاعيداسىنا اينالدىرۋ تيىستىلىگىن اتاپ كورسەتتى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
