زاڭ جوباسى ەلەكتر ەنەرگياسىن تۇتىنۋشىلاردىڭ قۇقىقتارىن قورعاۋعا جانە ەنەرگەتيكالىق كاسىپورىندار كورسەتەتىن قىزمەتتەردىڭ ساپاسىن قامتاماسىز ەتۋگە باعىتتالعان. جوبامەن ون ءبىر زاڭنامالىق اكتىگە, ونىڭ ىشىندە «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» كودەكسىنە (سالىق كودەكسى), اكىمشىلىك قۇقىق بۇزۋشىلىق تۋرالى, جەر, سۋ كودەكستەرىنە, سونداي-اق بىرقاتار زاڭدارعا تۇزەتۋلەر ەنگىزىلەدى.
قۇجاتتا يەسىز دەپ تانىلعان ەلەكتر جەلىلەرىن ەنەرگيا بەرۋشى ۇيىمدارعا بەرۋ جانە ولاردى كورپوراتيۆتىك تابىس سالىعىنان جانە م ۇلىك سالىعىنان بىرجولعا بوساتۋ ماسەلەلەرى رەتتەلەدى. ەلەكتر ەنەرگەتيكاسى سالاسىنداعى ۋاكىلەتتى ورگاننىڭ قۇزىرەتى ناقتىلانادى.
ەكسپورتتالاتىن ەلەكتر ەنەرگياسىن ءوندىرۋدىڭ وزىندىك قۇنىنان تومەن ەمەس باعا بويىنشا جانە ەلىمىزدىڭ ءبىرتۇتاس ەنەرگەتيكالىق جۇيەسىندە نەمەسە ونىڭ بولىكتەرىندە ەلەكتر ەنەرگياسىنىڭ ءپروفيتسيتى جاعدايىندا عانا قازاقستاننان تىس جەرلەرگە ساتىلاتىن ەلەكتر ەنەرگياسىنا شەكتەۋ بەلگىلەنەدى.
ەلەكتر ەنەرگەتيكاسى سالاسىنداعى قۇقىق بۇزۋشىلىقتاردىڭ ەلەكتر جانە جىلۋ جەلىلەرىنە قوسۋعا ارنالعان تەحنيكالىق شارتتاردى بەرۋگە قويىلاتىن تالاپتاردى بۇزۋ, سونداي-اق تەحنولوگيالىق بۇزۋشىلىقتار تۋرالى اقپاراتتى بەرۋ جونىندەگى تالاپتاردى بۇزۋ بولىگىندە جاڭا قۇرامى ەنگىزىلەدى.
سەناتورلار سونداي-اق «قازاقستان رەسپۋبليكاسى مەن قىرعىز رەسپۋبليكاسى اراسىنداعى تاريفتىك ساياسات نەگىزدەرىن قوسا العاندا, تەمىرجول كولىگى كورسەتەتىن قىزمەتتەرگە قول جەتكىزۋدى رەتتەۋ ءتارتىبىن قولدانۋ تۋرالى كەلىسىمدى راتيفيكاتسيالاۋ تۋرالى» زاڭ جوباسىن تالقىلادى.
قازاقستان مەن قىرعىزستان اراسىندا سانكت-پەتەربۋرگتە 2016 جىلعى 26 جەلتوقساندا قول قويىلعان كەلىسىم تاريفتىك ساياسات نەگىزدەرىمەن بىرگە تەمىرجول كولىگى كورسەتەتىن قىزمەتتەرگە قول جەتكىزۋدى رەتتەيدى. زاڭ جوباسىن قابىلداۋ تەمىرجول كولىگىمەن قىرعىزستانعا قاتىستى ترانزيتتىك جۇك تاسىمالىن قۇقىقتىق رەتتەۋدى قامتاماسىز ەتەدى.
زاڭ جوباسى پالاتانىڭ قاراۋىنا جىبەرىلدى.
