مۇنداعى ماقسات – ءحىى عاسىردىڭ ورتاسىندا ۇلى دالادان بارىپ 20 جىل مىسىر مەن شام ەلىنە بيلىك جۇرگىزگەن بەيبارىس سۇلتانعا قاتىستى مۇرالارمەن كوپشىلىكتى تانىستىرۋ كورىنەدى. بەيبارىس بابامىز بيلىك قۇرعان مىسىر قۋاتتى مەملەكەتكە اينالدى: جاڭادان فلوتتار سالىنىپ, اسكەري قامال-بەكىنىستەر تۇرعىزىلدى, مەشىت-مەدرەسەلەر بوي كوتەرىپ, عىلىم-ءبىلىم دامىدى.
وسىنداي تاريحي تۇلعانى ۇلىقتاۋعا ارنالعان كورمەنىڭ اشىلۋ سالتاناتىندا ءسوز سويلەگەن مادەنيەت جانە سپورت ءمينيسترى ارىستانبەك مۇحامەدي ۇلى: «ەلىمىز تۇرعىندارى بۇعان دەيىن بابامىز بەيبارىس سۇلتان جايلى بولات مانسۇروۆتىڭ كوركەم ءفيلمى مەن ءار جەردە ساحنالانىپ جۇرگەن سپەكتاكلدەردى تاماشالاپ كەلسە, بۇگىن ەكى ەلدىڭ مادەني-تاريحي بايلانىسىنىڭ ارقاسىندا بابامىزدىڭ ءومىرى مەن تۇرمىسىنا قاتىسى بار سول ءداۋىردىڭ ارتەفاكتى بۇيىمدارى ەلورداعا اكەلىنىپ, كوپشىلىككە ۇسىنىلىپ وتىر, بۇل ءىس بولاشاقتا ءارى قاراي جالعاساتىن بولادى», دەدى.
سونىمەن قاتار, شارانىڭ قۇرمەتتى قوناعى ەگيپەت اراب رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى حايسام سالاح كامەل يبراگيم مىرزا اۋەلى قازاقستاندىقتاردى ەكسپو كورمەسىنىڭ اشىلۋىمەن قۇتتىقتاي وتىرىپ, بۇل جولعى كورمەگە ماملۇك بەيبارىس سۇلتانعا تيەسىلى دۇنيەلەردىڭ تولىق كەلمەگەنىن, كاير قالاسىندا ونىڭ قولدانعان زاتتارى مەن قارۋ-جاراعى تۇگەل ساقتالعان مۋزەي بارىن, بولاشاقتا سول ەكسپوناتتاردى تۇگەلدەي اكەلىپ, قازاقستاندىق اعايىنداردى بابا مۇراسىمەن قاۋىشتىرۋ جوسپارى بار ەكەنىن جەتكىزدى.
بۇل رەتكى كورمەگە قۇران اياتتارى بادىزدەلگەن توستاعان-تاباقتار, سول ءداۋىردىڭ تيىن-مونەتالارى, التى قىرلى اعاش ساندىق, قىمبات بۇيىمدار ساقتاۋعا ارنالىپ قولادان جاسالعان ق ۇلىپتى ساندىقشا قاتارلى 22 ەكسپونات قويىلىپتى.
بەكەن قايرات ۇلى,
«ەگەمەن قازاقستان»
