بەيبىتشىلىك جانە كەلىسىم سارايى مىسىر ومىرىنەن الىنعان وپەرا ءۇشىن تابيعي پيراميدا رەتىندە قولدانىلدى. ساحنا پيراميدانىڭ ءدال الدىنا ورناتىلىپ, الىپ باعانالار مەن تاس مۇسىندەردىڭ دەكوراتسياسى سپەكتاكلدىڭ كوركەمدىگىن اسىردى.
ايگىلى كومپوزيتور دجۋزەپپە ۆەرديدىڭ «ايدا» وپەراسى الەمدىك تانىمالدىققا يە تۋىندىلاردىڭ ءبىرى. مىسىر مەن ەفيوپيادا وتكەن تاريحي وقيعالاردى, ياعني سوعىستى ارقاۋ ەتكەن تۋىندىنىڭ نەگىزگى تاقىرىبى – ماحاببات. ەفيوپيا پاتشاسىنىڭ مىسىردا كۇڭدىكتە جۇرگەن قىزى ايداعا ساراي كۇزەتىنىڭ باسشىسى رادامەس عاشىق بولادى. ال رادامەسكە پەرعاۋىننىڭ قىزى امنەريستىڭ كوزى تۇسەدى. ەكى عاشىقتىڭ بىرگە بولۋىنا كەدەرگى كەلتىرەدى. وپەرادا باستى رولدەگى وسى ۇشتىكتەن باسقا پەرعاۋىننىڭ, ابىز ءرامفيستىڭ, ەفيوپيا پاتشاسى اموناسرونىڭ رولدەرى بار.
ايدانىڭ ءرولىن قازاقستاننىڭ ەڭبەك سىڭىرگەن قايراتكەرى جۇپار عابدۋللينا, امنەريستى قازاقستاننىڭ ەڭبەك سىڭىرگەن قايراتكەرى دينا حامزينا جانە رادامەستى بولگاريالىق تەنور كامەن چانەۆ وينادى. سونداي-اق, ەگيپەت پاتشاسىن – بولات ەسىمحانوۆ, ابىز ءرامفيستى – ارمەنيانىڭ حالىق ءارتىسى بارسەگ تۋمانيان, ايدانىڭ اكەسى, ەفيوپيالىق پاتشانى تالعات مۇساباەۆ سومدادى.
– بۇل مەرەكەلىك سپەكتاكل ەكسپو-2017 ءىس-شارالار تىزىمىنە ەنگىزىلگەن. اشىق اسپان استىنداعى وپەرا – ءبىز ءۇشىن ايتارلىقتاي جاڭا جانر. ءبىزدىڭ نەگىزگى ماقساتىمىز – جاستاردى ونەرگە باۋلۋ, اسقاق ونەردى ناسيحاتتاۋ. ساحنالىق بۇيىمدار زامانىمىزدىڭ ايگىلى ستسەنوگرافى جانە رەجيسسەر فرانكو دزەففريرەلليدىڭ ۇلگىسى بويىنشا جاسالدى, دەيدى ۇيىمداستىرۋشىلار.
ايتا كەتەيىك, وپەرانىڭ قويۋشى رەجيسسەرى ءارى ستسەنوگرافى – فرانكو دزەففيرەللي (يتاليا), كوستيۋمدەر بويىنشا سۋرەتشى – ماۋريتسيو ميللەنوتتي (يتاليا) جانە ديريجەرى – قازاقستاننىڭ ەڭبەك سىڭىرگەن قايراتكەرى ابزال مۇحيتدينوۆ.
ايگۇل سەيىلوۆا,
«ەگەمەن قازاقستان»
سۋرەتتى تۇسىرگەن
ەرلان وماروۆ,
«ەگەمەن قازاقستان»
