ء«سىزدىڭ «ەگەمەن قازاقستان» گازەتىندە شىققان ء«شۇي قازاعىنىڭ» ءتىلى نەمەسە اتاجۇرتقا ايتار ناز» ماقالاسىنا قاتىستى دەپۋتاتتىق ساۋالىڭىزدى قاراپ, مىنانى حابارلايمىن.
بۇگىنگى تاڭدا مەملەكەتتىك ورگاندار شەتەلدە تۇراتىن قازاق دياسپوراسى وكىلدەرىنە مادەني جانە رۋحاني قولداۋ كورسەتۋ جۇمىستارىن جۇرگىزۋدە.
اتاپ ايتساق, جىل سايىن الەمنىڭ جيىرمادان استام ەلىندە تۇراتىن شەتەلدىك قانداستارىمىزدىڭ, ورالمانداردىڭ, قازاق زيالى قاۋىم وكىلدەرىنىڭ جانە شاكىرتتەر قاۋىمىنىڭ قاتىسۋىمەن حالىقارالىق ونەر فەستيۆالى وتكىزىلەدى. فەستيۆال اياسىندا كورمەلەر مەن اقىندار ايتىسى ۇيىمداستىرىلادى. سونىمەن قاتار, دۇنيەجۇزى قازاقتارىنىڭ قاۋىمداستىعى ارقىلى جىبەرىلەتىن «تۋعان ءتىل» الماناعى باسىپ شىعارىلادى. بۇعان قوسا, شەتەلدەگى قازاق دياسپوراسىنىڭ تۇرمىسى تۋرالى الەۋمەتتىك جانە تالدامالىق زەرتتەۋلەر جۇرگىزىلىپ تۇرادى.
«ماڭگىلىك ەل» جالپىۇلتتىق پاتريوتتىق يدەياسى اياسىندا جىل سايىن قازاقتاردىڭ «كىشى» قۇرىلتايى وتەدى, ونىڭ ماقساتى – ەۋروپا ەلدەرى مەن تۇركيا, اقش, قحر جانە موڭعوليا ەلدەرىندە تۇراتىن قازاقتارمەن بايلانىستى نىعايتۋ, سونىمەن بىرگە, ولارعا انا ءتىلىن زەرتتەۋگە جانە مادەنيەتىن ساقتاۋعا ادىستەمەلىك جانە ۇيىمداستىرۋشىلىق قولداۋ كورسەتۋ. قۇرىلتاي شەڭبەرىندە قازاق ءتىلىن مەڭگەرۋى بويىنشا دوڭگەلەك ۇستەلدەر, عىلىمي تاجىريبەلىك كونفەرەنتسيالار جانە ءارتۇرلى بايقاۋلار وتكىزىلەدى. ۇستىمىزدەگى جىلدىڭ 22-25 ماۋسىمى كۇندەرى استانا قالاسىندا دۇنيەجۇزى قازاقتارىنىڭ V قۇرىلتايىن وتكىزۋ جوسپارلانىپ وتىرعانىن اتاپ وتكەن ءجون, وندا قازاق دياسپوراسىنىڭ ماڭىزدى ماسەلەلەرى تالقىلاناتىن بولادى.
رەسەي مەكتەپتەرىنىڭ قازاقستاندىق وقۋلىقتار مەن وقۋ ادىستەمەلىك كەشەندەردى قولدانۋىنا قاتىستى وسى ءبىلىم ۇيىمدارى جىل سايىن رەسەي فەدەراتسياسىنا ءبىلىم جانە عىلىم, سىرتقى ىستەر مينيسترلىكتەرى ارقىلى جىبەرىلەتىن بارلىق قاجەتتى وقۋ - ادىستەمەلىك ادەبيەتپەن قامتاماسىز ەتىلگەنىن حابارلايمىز.
وسىعان وراي, قازىرگى ۋاقىتتا ءبىلىم جانە عىلىم مينيسترلىگى, باسقا مۇددەلى مەملەكەتتىك ورگاندارمەن بىرلەسە وتىرىپ, رەسەي فەدەراتسياسى ءبىلىم باسقارماسى تاراپىنان وسى وقۋلىقتار مەن وقۋ-ادىستەمەلىك كەشەننىڭ زاڭعا سايكەستىگىن تانۋ تۋرالى جۇمىستار جۇرگىزۋدە. اتاپ ايتساق, قازاقستاندىق وقۋلىقتار مەن وقۋ-ادىستەمەلىك قۇرالداردىڭ رەسەي ءبىلىم بەرۋ ستاندارتىنا سايكەستىگىنە ساراپتاما جاساۋ (ساعاتتىق جىكتەمە, ماتەريال مازمۇنى بويىنشا), ولاردى رەسەي ستاندارتىنا بەيىمدەۋ مۇمكىندىگى, ءارتۇرلى ۇيىمداستىرۋشىلىق راسىمدەردى قارجىلاندىرۋ ءتارتىبى, كوزدەرى ماسەلەلەرى پىسىقتالۋدا.
سونداي-اق ءبىلىم جانە عىلىم, مادەنيەت جانە سپورت, سىرتقى ىستەر مينيسترلىكتەرى مەن باسقا دا مۇددەلى مەملەكەتتىك ورگاندارعا اتالعان ماسەلە بويىنشا رەسەي فەدەراتسياسىنداعى ۋاكىلەتتى مەملەكەتتىك ورگاندارمەن كەلىسسوزدەر جۇرگىزۋ جانە ءتيىستى ەكىجاقتى حالىقارالىق شارت نەمەسە كەلىسىم جاساۋ قاجەتتىگى تۋرالى ماسەلەنى پىسىقتاۋ جونىندە تاپسىرما بەرىلدى».
