كونگرەستى اشقان «اتامەكەن» ۇكپ ىسكەر ايەلدەر كەڭەسىنىڭ ءتورايىمى ءلاززات رامازانوۆا ەلىمىزدىڭ قازىرگى دامۋىندا بەلسەندى قىز-كەلىنشەكتەردىڭ ورنى بارعان سايىن ماڭىزدى بولا تۇسكەندىگىن اتاپ كورسەتتى.
«بۇگىندە ەلىمىزدىڭ ىشكى جالپى ءونىمىن قالىپتاستىرۋداعى ايەلدەر قاۋىمىنىڭ ۇلەسى 40 پايىزعا دەيىن جەتىپ وتىر. ءاربىر وڭىردە ىسكەر ايەلدەر كەڭەسى قۇرىلىپ, جۇمىس ىستەۋدە. بۇگىنگى كونگرەسكە قاتىسىپ وتىرعان ىسكەر ايەلدەر, اسىرەسە ەلىمىزدىڭ ءار ايماعىنان كەلگەن قىز-كەلىنشەكتەر ەر ادامدارمەن بىردەي جۇمىس اتقارىپ, بيزنەستەگى ءوز ورىندارىن ايقىنداي ءبىلدى. سونىڭ ىشىندە وبلىستارداعى ىسكەر ايەلدەر كەڭەسى ورتالىق پەن شالعاي ايماقتاردىڭ اراسىن بايلانىستىرۋشى بۋىن رەتىندە ارەكەت ەتىپ كەلەدى. بۇگىندە بيزنەس-لەدي اتاۋى قوعام تاراپىنان قىزىعۋشىلىق تۋدىراتىنداي زور مارتەبەگە يە بولۋدا. ەلىمىزدىڭ ىنتالى قىز-كەلىنشەكتەرىن وسى قاتاردان كورىنۋگە شاقىرامىن», دەدى ءلاززات كەرىمقۇلقىزى.
كونگرەسكە «اتامەكەن» ۇكپ تورالقا توراعاسى تيمۋر ق ۇلىباەۆ قاتىسىپ قۇتتىقتاۋ ءسوز سويلەدى. ول ايەلدەر قاۋىمىنىڭ ەلىمىزدەگى كاسىپكەرلىك سالانىڭ قالىپتاسىپ, دامۋىنا ۇلكەن ۇلەس قوسىپ كەلە جاتقاندىعىن اتاپ ءوتتى.
«اتامەكەن» ۇكپ باسقارما توراعاسىنىڭ ورىنباسارى يۋليا ياكۋپباەۆا «قىزمەت كورسەتۋ سالاسىنداعى ءمجا جوباسى ماڭىزى» تۋرالى بايانداما جاساپ, جان-جاقتى اڭگىمەلەپ بەردى.
كونگرەستە العاشقىلار قاتارىندا سويلەگەن وڭتۇستىك قازاقستان وڭىرلىك ىسكەر ايەلدەر كەڭەسىنىڭ ءتورايىمى, «اسىل ارمان» جشس ديرەكتورى الما ارحاباەۆا بيزنەس قۇرۋدىڭ ەرەكشەلىكتەرىن ايتىپ, ىسكەر نارىقتاعى ومىرشەڭدىك قاعيداتتارىن ءتىزدى. «باسقارۋشىلىق – بۇل ونەر. ۋاقىتتى باسقارۋ – بولاشاقتى باسقارۋ دەگەنىمىز بيزنەستى باسقارۋ, اقپاراتقا يە بولۋ. باسقا ادامداردىڭ ۋاقىتىن باعالاۋ, كومانداعا دۇرىس ادامداردى تاڭداي ءبىلۋ, وتباسى مەن جۇمىس اراسىندا تەڭگەرىمدى ۇستاي ءبىلۋ وتە ماڭىزدى. قوعامدا ايەل ىسكەر بولسا, مانساپ قۋسا, وتباسىن قۇرا المايدى نەمەسە باسقا ءىستى قۇربان ەتۋ كەرەك دەگەن پىكىر بار. مەن بۇل پىكىرمەن كەلىسپەيمىن. بۇعان ءوز ءومىرىم مەن تاجىريبەمدى مىسال رەتىندە كەلتىرە الامىن. مەنىڭ بەس بالام بار. مەن ولاردىڭ بولاشاعى ءۇشىن بيزنەسكە ارالاستىم», دەدى الما ارحاباەۆا.
ونىڭ ايتۋىنشا, ىسكەرلىكتە نەگىزگى ءتورت قاعيدا بار. ءبىرىنشىسى – ۋاقىت. ۋاقىتتى دۇرىس جۇمساي ءبىلۋدىڭ بيزنەستەگى ماڭىز زور. ەكىنشىسى – قارجى. اقشاسىز ەكونوميكانى قالىپتاستىرۋ, جەكە بيزنەستى قۇرۋ مۇمكىن ەمەس. ءۇشىنشىسى – ءومىر ەنەرگياسى. مۇندا دەنساۋلىق پەن پسيحولوگيالىق جاعدايدى ۇمىتپاعان ءجون. ءتورتىنشىسى – تەڭگەرىم, بارىنە دە تەڭگەرىم ساقتاعان ابزال.
باسقوسۋدا شىعىس قازاقستان وبلىسىنداعى ىسكەر ايەلدەردىڭ وڭىرلىك كەڭەسىنىڭ جەتەكشىسى ەلەنا بەرەزينسكايا-ابيلوۆا وزدەرىنىڭ از ۋاقىتتا جيناعان مول تاجىريبەلەرىن ورتاعا سالدى.
«شىعىس قازاقستان وبلىسىنداعى ىسكەر ايەلدەردىڭ وڭىرلىك كەڭەسى 2015 جىلى قۇرىلدى. سوعان قاراماستان وبلىستىڭ بيزنەس سالاسىنداعى قۇرىلىمدارىمەن ىسكەرلىك بايلانىسىمىزدى جاقسارتا وتىرىپ, كوپتەگەن جۇمىستار تىندىردىق. بۇگىندە اۋداندىق دەڭگەيدەگى 15 كەڭەسىمىز جۇمىس ىستەيدى. كاسىپكەرلىكپەن شۇعىلدانعىسى كەلەتىن جاستارعا كومەك كورسەتىپ, تاجىريبەمىزبەن ءبولىسۋدى ءوزىمىزدىڭ باستى پارىزىمىزدىڭ ءبىرى دەپ بىلەمىز. ءبىز ءوزىمىزدى ايەلدەردىڭ كاسىپكەرلىك بەلسەندىلىگىن جۇزەگە اسىراتىن الاڭ رەتىندە قۇردىق», دەدى ول.
«IDFashhion» حالىقارالىق تەلەارناسىنىڭ باس پروديۋسەرى ۆاسيلي كليمچۋك بيزنەس قۇرۋداعى مەديا مۇمكىندىكتەردى ايتتى. تەلەارنانىڭ باستى ميسسياسى – قازاقستاندىق ديزاينەرلەرگە ءوز قازانىندا عانا قايناماي, حالىقارالىق كەڭىستىكتەن ءوز ورىندارىن الۋىنا كومەك كورسەتۋ. ء«بىز ولارعا ءسان الەمىنىڭ ۇلكەن نارىعىنا, فەشن كەڭىستىگىنە جول اشامىز. ۇلكەن ساۋدا الاڭىنا, سونىمەن قاتار كيىمدەردى كوپ مولشەردە ساتۋعا مۇمكىندىك بەرەتىن بايلانىستارعا شىعۋعا كومەكتەسەمىز. «IDFashhion» حالىقارالىق تەلەارناسى – بۇل جاڭا مۇمكىندىكتەر, جاڭا تانىستار, جاڭا دەڭگەي», دەدى تەلەارنا وكىلى.
كونگرەسس بارىسىندا سونداي-اق, قازاقستان پرەزيدەنتى جانىنداعى وتباسى جانە ايەلدەر ىستەرى جونىندەگى ۇلتتىق كوميسسياسى ءتورايىمىنىڭ ورىنباسارى ءلاززات سۇلەيمەن, «قازگيۋ» ۋنيۆەرسيتەتى» اق باسقارما توراعاسىنىڭ ورىنباسارى نادەجدا كوروبكو, جامبىل وبلىسى جاستار كاسىپكەرلىگى كەڭەسى ورتالىعىنىڭ ديرەكتورى اينۇر زاۋىربەكوۆا, ماڭعىستاۋ وبلىسى وڭىرلىك ىسكەر ايەلدەر كەڭەسىنىڭ ءتورايىمى ساۋلە ساليحوۆا ءسوز الىپ, ىسكەر ايەلدەردىڭ بۇگىنگى اياق الىسى جايلى ءوز ويلارىن ورتاعا سالدى.
بۇگىندە مەملەكەتتىك ورگانداردا, شاعىن جانە ورتا بيزنەس سالاسىندا ىسكەر ايەلدەر ۇلەسى ارتىپ كەلەدى. جالپى ايەلدەر قاۋىمىنىڭ وتاندىق بيزنەس ورتاداعى بەلسەندىلىگى شامامەن 50 پايىزعا جۋىقتاسا, ەلىمىزدىڭ ىشكى جالپى ءونىمىن قالىپتاستىرۋداعى قوسىپ وتىرعان ۇلەستەرى 40 پايىزعا جەتىپ وتىر. قازاقستانداعى ايەلدەر كاسىپكەرلىگىنىڭ باسىم بولىگى قىزمەت كورسەتۋ سالاسىنا باعىتتالعان, سەرۆيستىك قىزمەت كورسەتۋدىڭ 63 پايىزى ايەلدەرگە تيەسىلى, اۋىل شارۋاشىلىعىنداعى كاسىپتىڭ 53 پايىزىن نازىك جاندىلار باسقارۋدا.
ەلىمىزدىڭ شاعىن جانە ورتا كاسىپتى 697 355 ايەل دوڭگەلەتىپ وتىر. كاسىپكەرلىك سالاسىنا قارجىلاي ەمەس قولداۋ كورسەتۋ بويىنشا «اتامەكەن» ۇلتتىق كاسىپكەرلەر پالاتاسى كاسىپكەر ايەلدەرگە 17 666 سەرۆيستىك قىزمەت كورسەتسە, 45 501 اقپاراتتىق قولداۋ بىلدىرگەن.
شارا بارىسىندا ەل دامۋىنا سۇبەلى ۇلەس قوسقان ىسكەر ايەلدەر «اتامەكەن» ۇكپ ىسكەر ايەلدەرى كەڭەسى اتىنان ماراپاتقا يە بولدى.
سۇڭعات ءالىپباي,
«ەگەمەن قازاقستان»
