استانا ەكونوميكالىق فورۋمى (اەف) – ەكونوميكالىق مىندەتتەردى تالقىلاپ, شەشىم قابىلدايتىن ەۋرازياداعى تۇڭعىش ۇنقاتىسۋ الاڭى. اەف- ءتىڭ ماقساتى الەمدىك ساراپشىلار قاۋىمداستىعىن جاھاندىق ەكونوميكانىڭ ەڭ وزەكتى دەگەن ماسەلەلەرى بويىنشا ناقتى شەشىم شىعارۋعا جۇمىلدىرۋ بولىپ تابىلادى. فورۋمدا ءىرى شارتتار مەن كەلىسىمدەرگە قول قويىلادى. فورۋم جۇمىسىنىڭ باستى قورىتىندىسى – الەم ساراپشىلارىنا جاھاندىق ەكونوميكانىڭ دامۋ باعىتتارى ءۇشىن ناقتى كەڭەس بەرۋ. بيىلعى اەف-2017-ءنىڭ مىنبەرلەرىندە الەمدىك ەكونوميكانىڭ اعىمداعى دامۋ ەرەكشەلىكتەرى, تۇراقتى ەكونوميكالىق ءوسىمنىڭ جاڭا مودەلدەرى, جاھاندىق ارىپتەستىكتى نىعايتۋ, الەمدىك ساۋدا مەن ينفراقۇرىلىمدى دامىتۋ, «جاسىل ەكونوميكا» بولاشاعى جانە ونى جاڭعىرتۋدىڭ يننوۆاتسيالىق الەۋەتى اتتى كەشەندى تاقىرىپتار تالقىلانادى. ەكونوميكالىق فورۋم استاناداعى ەكسپو-2017 حالىقارالىق مامانداندىرىلعان كورمەسىنىڭ شەڭبەرىندە وتكىزىلەتىندىكتەن «بولاشاقتىڭ ەنەرگياسى» تاقىرىبى بويىنشا جيناقتالعان جاڭا تەحنولوگيالار مەن يننوۆاتسيالار دا الەمدىك ەكونوميكانىڭ قايماعىن قالقىعان عالىمدار مەن ەكونوميستەردىڭ تالقىسىنا تۇسپەك.
بيىلعى جىلى فورۋم جۇمىسىندا ەڭ جوعارى تيىمدىلىك پەن مازمۇنعا باسىمدىق بەرىلىپ وتىر. تالقىلاناتىن ماسەلەلەر سانى قىسقارتىلىپ, نەگىزگى تاقىرىپتارعا باسا نازار اۋدارىلادى. ماسەلەن, 2012 جىلى V-اەف كۇن ءتارتىبى بويىنشا 70 سەسسيا وتكىزىلگەن بولسا, اەف-2017-ءنىڭ اياسىندا 36 سەسسيا وتكىزىلەتىن بولادى. سەسسيا جۇمىستارى نەگىزگى ءۇش باعىت – تۇراقتى ەكونوميكالىق ءوسىم, الەمدىك ساۋدا جانە ينفراقۇرىلىم, يننوۆاتسيا جانە «جاسىل ەكونوميكا» بويىنشا جۇرگىزىلەدى. «تۇراقتى ەكونوميكالىق ءوسىم» تاقىرىبى بويىنشا 13 پانەلدىك سەسسيا, 1 دوڭگەلەك ۇستەل جانە 1 ۆوركشوپ وتكىزىلۋ كوزدەلىنۋدە. بۇل تاقىرىپتاعى نەگىزگى شارالاردى «برەتتون-ۆۋدستى جاڭارتۋ جونىندەگى كوميتەت», بۇكىلالەمدىك بانك, ازيا دامۋ بانكى, «سامۇرىق-قازىنا» ۇاق» اق, «دامۋ» قورى جانە باسقا دا بەدەلدى ۇيىمدار جۇرگىزەتىن بولادى.
فورۋم اياسىندا «الەمدىك ساۋدا جانە ينفراقۇرىلىم» تاقىرىبى بويىنشا 6 پانەلدىك سەسسيا وتكىزۋ مەجەلەنۋدە. بۇل سەسسيالاردى «قازاقستان تەمىر جولى» ۇك» اق, The Boston Consulting Group, «بايتەرەك» ۇاق» اق, بۇۇ-نىڭ ەۋروپالىق ەكونوميكالىق كوميسسياسى, بواو ازيالىق فورۋمى حاتشىلىعى جانە باسقا حالىقارالىق ۇيىم-
دار مەن كومپانيالار ۇيىمداستىراتىن بولادى. «يننوۆاتسيا جانە «جاسىل ەكونوميكا» تاقىرىبى بويىنشا 4 پانەلدىك سەسسيا جانە 3 دوڭگەلەك ۇستەل وتكىزۋگە دە الەمگە تانىمال حالىقارالىق ۇيىمدار جۇمىلدىرىلىپ وتىر.
استانا ەكونوميكالىق فورۋمىنىڭ ەلباسى نۇرسۇلتان نازارباەۆتىڭ باستاماسىمەن جانە تىكەلەي قاتىسۋىمەن وتكىزىلىپ كەلە جاتقانى بەلگىلى. وسىعان بايلانىستى الەمدىك ءىرى ەكونوميكالىق فورۋمدا مەملەكەت باسشىسىنىڭ تىكەلەي قاتىسۋىمەن وتەتىن ءداستۇرلى پلەنارلىق وتىرىس 16 ماۋسىمدا ەلورداداعى «قازاقستان» ورتالىق كونتسەرت زالىندا وتكىزىلەدى. فورۋمنىڭ پىكىر الىسۋ الاڭدارىندا الەمدىك دەڭگەيدەگى ساياساتكەرلەر, نوبەل سىيلىعىنىڭ لاۋرەاتتارى, بەلگىلى ەكونوميستەر بۇگىنگى جاھاندىق ەكونوميكانى دامىتۋ ماقساتىن
داعى كەلەلى ويلارىن ورتاعا سالادى.
جوعارىدا اتاپ كورسەتكەنىمىزدەي, ح استانا ەكونوميكالىق فورۋمىنا قۇرامىندا الەمدىك دەڭگەيدەگى ساياساتكەرلەردى, Fortune Global – 500 تىزىمىنە كىرەتىن كومپانيالاردىڭ باسشىلارىن, نوبەل سىيلىعىنىڭ لاۋرەاتتارىن توپتاستىرعان 3000-نان استام دەلەگات قاتىسادى. ولاردىڭ قاتارىندا «JPMorgan Chase» توراعاسى دجەيكوب فرەنكەل, بۇۇ باس اسسامبلەياسىنىڭ توراعاسى پيتەر تومسون, بۇكىلالەمدىك بانك توراعاسى دجيم ەن كيم, Goldman Sachs توراعاسى جوزە ماانۋەل بارروزۋ, وڭتۇستىك كورەيا جاھاندىق ەكونوميكا ينستيتۋتىنىڭ پرەزيدەنتى يل ساكونگ, قحر بۇكىلالەمدىك ەكونوميكا جونىندەگى ورتالىقتىڭ ديرەكتورى داۆيد داوكۋي لي, نوبەل سىيلىعىنىڭ لاۋرەتتارى راە كۆون چۋنگ, سۆياتوسلاۆ تيماشەۆ جانە باسقالاردى اتاۋعا بولادى.
استانا ەكونوميكالىق فورۋمىنىڭ باستى ناتيجەسى – الەمدىك ەكونوميكانى ساۋىقتىرۋ جانە ونى ودان ءارى دامىتۋدىڭ جولدارى تۋرالى G-20 ەلدەرىنە ارنالعان اشىق حات ءداس ءتۇرى بويىنشا G-8 جانە G-20 ۇيىمداستىرۋ القالارىنا, حالىقارالىق ۆاليۋتا قورىنا, دۇنيەجۇزىلىك بانككە, بۇۇ جانە ەكونوميكالىق ىنتىماقتاستىق جانە دامۋ ۇيىمىنا فورۋمنىڭ كۇن تارتىبىندە تالقىلانعان ماسەلەلەر بويىنشا قابىلدانعان ۇسىنىستاردى جولداۋ بولىپ تابىلادى. استانا فورۋمىنىڭ اياسىندا قابىلدانعان وسىنداي جاھاندىق شەشىمدەردىڭ الەم ەكونوميكاسىن تۇراقتى دامۋدىڭ داڭعىل جولىنا تۇسىرەتىن بالاماسىز باستاما بولۋى دا ابدەن مۇمكىن. وعان الەمنىڭ بەلگىلى عالىمدارى مەن ساياسي تۇلعالارىنىڭ استانا ەكونوميكالىق فورۋمىنىڭ جۇمىسىنا جاھاندىق دەڭگەيدەگى داۆوس, سانكت-پەتەربۋرگ جانە بواو ازيالىق ەكونوميكالىق فورۋمدارى دارەجەسىندە بەرگەن باعالارى دالەل بولماق.
جىلقىباي جاعىپار ۇلى,
«ەگەمەن قازاقستان»
