كوميتەت توراعاسى سەرگەي پلوتنيكوۆ سەناتتا «قازاقستان رەسپۋبليكاسىنداعى بيولوگيالىق ارالۋاندىقتى ساقتاۋدى زاڭنامالىق قامتاماسىز ەتۋدىڭ وزەكتى ماسەلەلەرى» تاقىرىبى بويىنشا پارلامەنتتىك تىڭداۋ وتكەنى, وسىمدىكتەر مەن جانۋارلار دۇنيەسى ماسەلەلەرى بويىنشا زاڭناماعا تۇزەتۋلەر قابىلدانعانى تۋرالى حاباردار ەتتى. بۇل زاڭعا سايكەس, 2019 جىلعى 1 قاڭتاردان باستاپ ورمان شارۋاشىلىعى مەن ەرەكشە قورعالاتىن تابيعي اۋماقتار قىزمەتكەرلەرىنىڭ ەڭبەكاقىلارى 25 پايىزعا كوتەرىلەتىن بولادى.
سەناتورلار «جاسىل» ەكونوميكاعا كوشۋ جاعدايىندا ەلىمىزدىڭ تابيعي بايلىقتارىنىڭ ماڭىزدى بولىگى رەتىندە وسىمدىكتەر مەن جانۋارلار دۇنيەسىن باسقارۋ سالاسىندا ءتيىمدى ساياسات قالىپتاستىرۋ قاجەتتىگى تۋىندادى دەپ سانايدى. ەكونوميكانىڭ باسىم سالالارىن دامىتۋ تۇرعىسىندا ەكونوميكالىق, الەۋمەتتىك جانە ەكولوگيالىق قۇندىلىقتاردى ەسكەرە وتىرىپ, حالىقارالىق تاجىريبە نەگىزىندە ولاردى باسقارۋدىڭ تىڭ تاسىلدەرىن قاراستىرۋ قاجەت.
شارا بارىسىندا پارلامەنتتىك تىڭداۋ ۇسىنىمدارىن ىسكە اسىرۋ, بيولوگيالىق الۋاندىقتى ساقتاۋ, ورمان ونەركاسىبىن, ايماقتاعى اڭشىلىق شارۋاشىلىقتاردى دامىتۋ ماسەلەلەرى تالقىلاندى.
سەناتورلار ساپار بارىسىندا «شىعىس-ءسۇت» جشس نىساندارىندا بولدى. بۇل ءوندىرىس ورنى ونەركاسىپتىڭ وڭدەۋ سالالارىن يننوۆاتسيالىق دامىتۋدىڭ مەملەكەتتىك باعدارلاماسى اياسىندا جۇمىس ىستەيدى.
ازامات قاسىم,
«ەگەمەن قازاقستان»
شىعىس قازاقستان وبلىسى
