بۇگىندە نازارباەۆ زياتكەرلىك مەكتەپتەرىنىڭ تورتەۋى اتالعان حالىقارالىق كەڭەستىڭ قۇرامىنا كىرەدى. بەدەلدى مارتەبە قازاقستاندىق مەكتەپتەردىڭ حالىقارالىق جوعارى ساناتتى ستاندارتقا سايكەس كەلەتىندىگىن كورسەتىپ وتىر. جالپى, اككرەديتاتسيادان ءوتۋ ۇدەرىسى ۇزاق ءارى اۋقىمدى جۇمىس جۇرگىزۋدى تالاپ ەتەدى. ايتالىق, ارنايى باقىلاۋ كوميسسياسى اككرەديتاتسيادان وتۋگە نيەت بىلدىرگەن مەكتەپتە تىكەلەي باقىلاۋ جۇرگىزەدى. ءساۋىر ايىندا حالىقارالىق مەكتەپتەر كەڭەسىنىڭ انگليا, گەرمانيا, رەسەي, ازەربايجان, يوردانيا, اقش جانە باسقا دا مەملەكەتتەردىڭ وكىلدەرىنەن قۇرالعان توبى سەمەي مەن وسكەمەن قالالارىندا جۇمىس ىستەدى. ولار مەكتەپتىڭ باسقارۋ جۇيەسىن, مۇعالىمدەردىڭ كاسىبي ءبىلىم بەرۋ ماشىعىن, مەكتەپتىڭ كۇندەلىكتى تىنىس-تىرشىلىگىن زەردەلەپ, وز باعالارىن بەردى. سەمەي جانە وسكەمەن قالالارىنىڭ مەكتەپتەرى «ومىرلىك قۇندىلىقتار», «وقىتۋ جانە ۇيرەتۋ», «باسقارۋ جانە كوشباسشىلىق», «كاسىبي قۇرام جانە تەحنيكالىق مامان», «قولجەتىمدى ءبىلىم», «وپەراتسيالىق جۇيە», سونداي-اق شەت تىلدەردى ءبىلۋ سىندى ساناتتاردىڭ بارلىعىنان سۇرىنبەي ءوتىپ, جوعارى تالاپتارعا سايكەس كەلەتىندىكتەرىن دالەلدەدى. «نازارباەۆ زياتكەرلىك مەكتەپتەرىندە ىنتالى وقۋشىلار وقيدى. بىلىمگە دەگەن تالپىنىستارىنا تامسانىپ وتىرمىز» دەدى حالىقارالىق ساراپشىلار كەڭەسىنىڭ جەتەكشىسى دەۆيد دجونسون.
زياتكەرلىك مەكتەپتەردىڭ جاڭا مارتەبەسى پەداگوگيكالىق ۇجىم مەن وقۋشىلار ءۇشىن جاڭا مۇمكىندىكتەرگە جول اشادى. سوندىقتان الداعى جىلداردا نازارباەۆ زياتكەرلىك مەكتەپتەرىنىڭ بارلىعىن اككرەديتاتسيادان وتكىزۋ جوسپارلانىپ وتىر. قازاقستاندىق مەكتەپتەردىڭ تاڭداۋلى ءبىلىم بەرۋ ۇيىمىنا مۇشە بولۋى وتاندىق ءبىلىم بەرۋ جۇيەسى ءۇشىن ايتۋلى وقيعا دەۋگە بولادى. سەبەبى ءبىلىم سالاسىنداعى سونى جاڭالىقتار مەن جوعارى ستاندارتتاردى ءودان ارى ىلگەرىلەتۋ ءۇشىن قۇرىلعان بۇل كەڭەس الەمدەگى تانىمال ۇيىمداردىڭ ءبىرى. كلۋبقا الەمنىڭ كوپتەگەن ەلدەرىنىڭ ۇزدىك مەكتەپتەرى مەن ءبىلىم بەرۋ كەشەندەرى قابىلدانعان. سونىمەن قاتار ۇيىم الەمنىڭ ۇزدىك 50 ۋنيۆەرسيتەتىمەن ىنتىماقتاستىق ورناتىپ وتىر. بۇل ۋنيۆەرسيتەتتەر اككرەديتتەلگەن مەكتەپ تۇلەكتەرىن وقىتۋعا مۇددەلى.
