باسپانانىڭ ءبىر شارشى مەترى 100 مىڭ تەڭگەدەن اسپايدى. ۇلەسكەرلەر ونىڭ بەكىتىلگەن ەسكيزدەرىن ءوز قالاۋلارىمەن تاڭداي الادى.
پەتروپاۆل قالاسىنىڭ اكىمى مارات تاسماعانبەتوۆتىڭ ايتۋىنشا, اۋقىمدى جوبانى جەرگىلىكتى قۇرىلىس كومپانيالارى بىرىڭعاي ارحيتەكتۋرالىق ۇلگىدە سالىپ بەرەدى. نەگىزىنەن وتاندىق ماتەريالدار پايدالانىلادى. ءۇش جىلعا دەيىن ساپا كەپىلدىگى بەرىلەدى. كەيىن باسپانالاردى ورتالىقتاندىرىلعان جىلۋمەن قامتۋ ماسەلەسى قاراستىرىلاتىن بولادى.
«سولنەچنىي» كەنتىنە ينجەنەرلىك-كوممۋنيكاتسيالىق ينفراقۇرىلىمدار تارتۋ ءۇشىن ەل قازىناسىنان 1 ميلليارد 200 ميلليون تەڭگە بولىنگەن. بۇل قاراجات ەسەبىنەن جاڭا سالىناتىن ۇيلەردىڭ ىشىنە سۋ, ەلەكتر جەلىلەرى تارتىلىپ, اۆتوموبيل جولدارى توسەلەدى. ءۇيدى ۇلەسكەرلەردىڭ وزدەرى دە سالۋعا بولادى.
جەر ۇيلەر «قازاقستاننىڭ تۇرعىن ءۇي قۇرىلىس جيناق بانكى» ارقىلى ساتىپ الىنادى. بۇل جەردە كليەنتتىڭ تولەم قابىلەتى الدىمەن ەسكەرىلەدى.
«جەر ءۇيدى ساتىپ الۋ ءۇشىن زاەمشىنىڭ شوتىندا قاجەتتى سومانىڭ 30 پايىزى بولۋى ءتيىس.قالعان سومانى بانكتەن ارزان نەسيە تۇرىندە قارىزعا الۋىنا بولادى. سونداي-اق, جالاقى از بولعان جاعدايدا جاقىن ادامداردان كەپىلگەرلەردى تارتۋ جايى دا قاراستىرىلعان», دەيدى بانكتىڭ سقوف بويىنشا ديرەكتورى رايحان ءابدىراحمانوۆا.
بولاشاقتا «سولنەچنىي» شاعىن اۋدانىندا بارلىعى 2094 جەر ۋچاسكەسىنە جەكە تۇرعىن ءۇي سالۋ جوسپارلانىپ, 500 ادامنان ءوتىنىش قابىلدانعان.
ءومىر ەسقالي,
«ەگەمەن قازاقستان»
