بولات تاعاباي - الەمدەگى ەڭ كوپ اسىق جيناعان ءارى ۇلتتىق ويىندى ناسيحاتتاۋشى رەتىندە الەمدىك گيننەستىڭ رەكوردتار كىتابىنا ەنگەن قازاق. شقو-نىڭ تارباعاتاي اۋدانىنداعى ىرعىزباي اۋليە مۇراجايىنىڭ ديرەكتورى.
اۆتور الىپ اسىقتى قۇراستىرۋعا التى اي ۋاقىت جۇمساعان. الدىمەن ەلۋ مىڭ اسىقتى جۋىپ كەپتىرۋگە ەكى اي, ودان سىم تەمىرمەن كونسترۋكتور ءمۇسىنىن توقۋعا تاعى ەكى اي كەتتى. اۆتور الىپ اسىعىن الداعى كۇندەرى جۇمىس ساپارىمەن وسكەمەنگە بارعالى وتىرعان ەلباسىعا سىيعا تارتۋدى كوزدەپ وتىر.
ء«وزىمنىڭ جانە وتباسىمنىڭ اتىمنان ەلباسىعا سىيعا تارتامىن دەپ شەشتىم. الىپ اسىقتى سالتاناتتى تۇردە تابىستاعان سوڭ استاناعا جەتكىزىلەدى. ازىرگە ونىڭ ناقتى قاي جەرگە ورناتىلاتى بەلگىسىز. تەك جابىق عيماراتتىڭ ىشىنە قويىلسا يگى. سونداي-اق اسىقتىڭ جانىندا سۋرەتكە تۇسەتىن الاڭ مەن اسىق وينايتىن شاعىن بولسا دا الاڭقاي بولسا دەگەن تىلەگىم بار», - دەيدى ب.تاعاباي.
ونىڭ ايتۋىنشا, ەلىمىزگە كەلگەن شەتەلدىك تۋريستەرگە قازاقتىڭ ۇلتتىق قۇندىلىقتارىن پاش ەتەتىن وسىنداي دۇنيەلەر كوپ بولۋ كەرەك.
«الداعى ءۇش ايدا ءدۇيىم جۇرتتىڭ نازارى استاناعا اۋادى. بۇل قازاقتى الەمگە تانىتۋدىڭ ءبىر جولى. يميدجدىك دۇنيە دەپ اتاۋعا دا بولادى. الىپ اسىعىم ەكسپو-عا كەلگەن قوناقتاردىڭ كوزايىمىنا اينالادى دەپ سەنەمىن», - دەدى الىپ اسىقتىڭاۆتورى.
ايتا كەتەيىك, ب.تاعابايدىڭ اسىق جيناپ باستاعانىنا 16 جىل بولعان. بۇگىندە ونىڭ قورجىنىندا 100 مىڭعا جۋىق اسىق بار. ونىڭ 50 مىڭىنان ەلورداعا كەلگەلى وتىرعان الىپ اسىق قۇراستىرىلدى. بۇل دەگەنىمىز 25مىڭ قويمەن پارا-پار.
