وڭتۇستىكقازاقستاندىق دەلەگاتسيا ەڭ الدىمەن كۇن كوزىنەن قۋات الاتىن «بۋرنوە سولار-1» ستانتسياسىندا بولدى. جوباعا سالىنعان جالپى ينۆەستيتسيا قۇنى 122 ملن. اقش دوللارىن قۇرايدى. ورتالىق ازياداعى ەڭ ءىرى ستانتسيا قۇرىلىسىن «سامۇرىق-قازىنا ينۆەست» جشس-ءى بريتاندىق UG Energy Limited كومپانياسىمەن بىرگە جۇرگىزگەن, دەپ حابارلايدى وقو اكىمدىگىنىڭ رەسمي سايتى.
ساپار بارىسىندا تۇستىك وڭىردەن بارعان قوناقتار تاراز قالاسىنان 12 شاقىرىم قاشىقتىقتا ورنالاسقان ايشا ءبيبى كەسەنەسىنە ايالدادى. بۇل تاريحي ورىن ورتاعاسىرلىق ساۋلەت ەسكەرتكىشتەرىنىڭ ءبىرى. ءبىزدىڭ كۇنگە كيەلىم ورىننىڭ تەك باتىس بولشەگى ساقتالعان. كەسەنە 60 ءتۇرلى ويۋ-ورنەكتەرى بار ەپيگرافيكالىق بەلدەۋمەن جاسالعان.
جانسەيىت قانسەيىت ۇلى باستاعان ءبىر توپ دەپۋتاتتار بۇدان بولەك «قاراحان» كەسەنەسى مەن «كەڭەسحان قاجى» مەشىتىندە بولدى. ال «قازاق حاندىعىنا 550 جىل» مونۋمەنتى ماڭىندا اۋليەاتا ءوڭىرىنىڭ زيالىلىرىمەن تىلدەستى. كونە شاھار تورىندە كەرەي مەن جانىبەك حاننىڭ بەينەلەرى مەنمۇڭدالاپ تۇر.
جۇمىس ساپارى بارىسىندا دەلەگاتسيا مۇشەلەرى «تاراز-ارەنا» سپورت كەشەنىندە بولدى. وليمپيادالىق جەتكىنشەكتەردى دايارلايتىن «اتلەتيك» وقۋ-جاتتىعۋ كەشەنىنىڭ جۇمىسىمەن دە تانىستى. بىرەگەي سپورت كەشەندەرى سالاۋاتتى ءومىر سالتىن ناسيحاتتاۋ جانە ءار ءتۇرلى جاستاعى تۇرعىنداردى اۋەسقوي جانە كاسىپقوي سپورت تۇرلەرىمەن اينالىسۋعا جاپپاي جۇمىلدىرۋ ماقساتىندا سوعىلعان.
سونداي-اق, وڭتۇستىكتەن كەلگەن دەلەگاتسيا مينەرالدى تىڭايتقىشتار وندىرەتىن «كازفوسفات» جشس-ءنىڭ جۇمىسىمەن تانىستى. كاسىپورىن ءوز جۇمىسىن مينەرالدى تىڭايتقىشتاردى, سارى فوسفور مەن ونىڭ تۋىندى ونىمدەرىن وتكەرۋ نارىعىن قايتا قالپىنا كەلتىرۋدەن باستاعان. سەرىكتەستىك تاعامدىق ورتوفوسفور قىشقىلى, باياۋ گيدراتتالۋشى ناتري ءۇشپوليفوسفاتى سياقتى جاڭا ءونىم تۇرلەرىن شىعارادى. ءونىمنىڭ 95 پايىزىن شەت ەلگە ەكسپورتتايدى.
ساپار بارىسىندا وبلىس اكىمى جانسەيىت تۇيمەباەۆ جاڭادان اشىلعان جامبىل جاباەۆ اتىنداعى «رۋحانيات» رۋحاني دامىتۋ ورتالىعىندا بولدى. ورتالىقتىڭ ءبىرىنشى قاباتىندا ورنالاسقان ەكسپوزيتسيامەن تانىستى. «بۇل ورتالىق جامبىل وبلىسىنىڭ تانىمال قايراتكەرلەرىنىڭ تاريحىن, جۇرگەن جولدارىن زەرتتەي وتىرىپ, رۋحاني دامۋدى كوزدەيدى. اۋليەاتا جەرىنە جاساعان ساپارىن رۋحاني ورتالىقتا قورىتىندىلاعان ايماق باسشىسى ۇلى جىبەك ساۋدا جولىندا سوزىلعان كونە شاھار كۇن ساناپ كوركەيىپ كەلە جاتقانىن اتاپ ءوتتى. مۇنان سوڭ, رۋحاني ورتالىقتاعى ەستەلىك كىتاپشاعا قولجازباسىن قالدىردى.
