كوكتەم كەلىپ, كۇن جىلىنا باسى تولاتىن باقباقتى ۇلبىرەتىپ ءسان رەتىندە تاعۋعا دا بولادى ەكەن. استانالىق ناتاليا پونومارەۆانىڭ تۇمسا تابيعاتتى سىيدىرعان كىشكەنتاي اشەكەيلەرىنە قاراپ تۇرىپ كوكتەم قايتا تۋعانداي اسەردە قالدىق. القا گۇلدەر تۇقىمداسىنا جاتاتىن ۋلى يتجيدەك تە ءمولدىر شىنىنىڭ ىشىنە موماقان قالىپتا سىيىپ كەتىپتى. ودان بولەك بىتەۋگۇل, راۋشان مەن ءارتۇرلى باقشا گۇلدەرى دە سىرعا مەن ساقينا بولىپ شىعا كەلگەن.
– رەسەيلىك شەبەرلەردىڭ زەرگەرلىك شايىردان جاسالعان بۇيىمدارىن ينتەرنەتتەن كورىپ, قاتتى قىزىقتىم. وتباسىمىزبەن وسى سالاعا اۋەستەنىپ كەتتىك. تابيعات اياسىنا شىعا قالساق بولدى, ەرەكشە شوپتەر مەن گۇلدەردى جيناپ جۇرەتىن بولدىق, – دەگەن شەبەر بۇيىمدارىن نەگىزىنەن قالالىق جارمەڭكەلەرگە شىعارۋ ارقىلى ساتاتىنىن ايتتى. مۇنداي اشەكەيلەردى جاساۋ ءۇشىن ەپوكسيدتى شايىردى بەلگىلى ءبىر فورماعا كەلتىرىپ, قۇيۋ ارقىلى جاسالادى. ساپالى جاسالعان بۇيىم بىرنەشە جىلعا دەيىن ساقتالادى.
جارمەڭكەگە ارنايى كەلگەن بۇۇ-نىڭ «ەكسپو-2017» باس كوميسسارى جيحان سۇلتانوعلى قولدانبالى ونەر شەبەرلەرىنىڭ جەتىستىكتەرى مەن مۇمكىندىكتەرى تۋراسىندا ايتا كەلىپ, ونەردىڭ بارشاعا ورتاق ەكەنىن جەتكىزدى.
– ءوز ەلدەرىڭىزدىڭ تاريحى مەن سۇلۋلىعىن تۇستەر الۋاندىعى مەن شىعارماشىلىقتارىڭىز ارقىلى پاش ەتەسىزدەر. شىن مانىسىندە ونەر – ورتاق, ونى جاس تا, كارى دە تۇسىنەدى, – دەيدى جيحان سۇلتانوعلى. باس كوميسسار كوپشىلىكتى جارمەڭكەگە قاتىسۋعا شاقىرىپ, شەبەرلەردىڭ ىسىنە ساتتىلىك تىلەدى.
قىزىلوردالىق ايسۇلۋ سادىقوۆانىڭ ادامدار مەن جانۋارلاردى, تابيعات ەلەمەنتتەرىن بەينەلەيتىن ويىنشىقتار جاساپ كەلە جاتقانىنا 12 جىلدان اسقان. ونىڭ قولىنان شىققان «بايدىڭ قىزى» اتتى قۋىرشاقتىڭ پوشىمىنان ومىردەن قيىندىق كورمەگەن ەركەتوتاي قىزدىڭ دۇڭك ەتپە مىنەزى بىردەن بايقالادى. ونىڭ ايتۋىنشا, كەيىپكەر بەينەسىن جاساۋدا كوبىنە قازاق حالقىنىڭ اڭىز-اڭگىمەلەرىنە, قيال-عاجايىپ ەرتەگىلەرىنە جۇگىنەدى.
– اكەم اعاشتان ءتۇيىن تۇيەتىن شەبەر. ۇل بالا جوق بولعاندىقتان, كىشكەنتايىمنان اكەمە كومەكتەسىپ ءجۇرىپ, قىر-سىرىنا قانىعىپ ءوستىم. كورمەگە قاتىسىپ جۇرگەندە كيىزدەن ويىنشىقتار جاساۋعا بولاتىنىن كورىپ, وسى سالاعا ويىسا باستادىم. قازىر تۇركىستان قالاسىنان قولونەر بۇيىمدارى دۇكەنىن اشىپ جاتىرمىن, – دەگەن ايسۇلۋ قۋىرشاق جاساۋدىڭ قيىن ەمەستىگىن ايتادى.
ايا ءومىرتاي,
«ەگەمەن قازاقستان»
سۋرەتتى تۇسىرگەن
ەرلان وماروۆ,
«ەگەمەن قازاقستان»
