دانيا قۇراماسى ءبىزدىڭ كوماندانى تىماقپەن ۇرىپ الدى دەپ ايتۋعا اۋىز بارمايدى. ءبىرىنشى تايمدا قازاق ەلىنىڭ قۇراماسى وزىنەن شەبەرلىك دەڭگەيى الدەقايدا جوعارى ۇجىمعا قارسى تەڭ دارەجەدە ونەر كورسەتتى. دەگەنمەن, قوناقتاردىڭ شابۋىلى ءجيى ءارى قاۋىپتىرەك بولدى. سونىڭ ايعاعىنداي, ماتچتىڭ 27-مينۋتىندا دات شابۋىلشىسى نيكولاي يورگەنسون ەسەپ اشتى. ءبىزدىڭ فۋتبولشىلاردىڭ ەسەپتى تەڭەستىرەر بىرنەشە مۇمكىندىگى بولعان. بىراق, شابۋىلدى تۇيىندەيتىن شەشۋشى ساتكە كەلگەندە ويىنشىلارىمىزدىڭ ويلاعانى ىسكە اسپاي-اق قويدى.
ءبىرىنشى تايمنىڭ بىتۋىنە ەكى مينۋتتاي ۋاقىت قالعاندا قۇراماداعى كوشباسشى ويىنشىلاردىڭ ءبىرى باۋىرجان يسلامحان دورەكى ويىنى ءۇشىن الاڭنان قۋىلدى. ماقتاپ جۇرگەن كاپيتانىمىز اۋەدە بولعان دوپ ءۇشىن تالاستا دات ويىنشىسى ۆيلليام كۆيستىڭ جاعىنان شىنتاعىمەن ۇرعان ەدى.
كاپيتانى قۋىلىپ, ادام سانى كەمىپ قالعاننان كەيىن قازاقستان قۇراماسىنىڭ ويىنىنان ءمان كەتتى. بۇل ازداي-اق, كەزدەسۋدىڭ 50-مينۋتىندا قورعاۋشىلارىمىز ءوز ايىپ الاڭىندا يۋسسۋف پوۋلسەنگە قارسى ءتارتىپ بۇزىپ, تورەشى ءبىزدىڭ قاقپاعا 11 مەترلىك ايىپ دوبىن بەلگىلەدى. كريستيان ەريكسەن پەنالتيدەن ءمۇلت كەتپەدى. رەسەيلىك تورەشى ۆلاديسلاۆ بەزبورودوۆقا ارتار وكپە جوق. شەشىمىنىڭ ءبارى دە داۋ تۋدىرمايتىنداي ادىلەتتى بولعان ەدى.
نەگىزى, دانيا فۋتبولشىلارىنىڭ ءبىزدىڭ قاقپاعا دوپتى قارشا بوراتارلىق تالاي مۇمكىندىگى بولدى. بىراق ءابۇيىر بولعاندا, سوققىلاردىڭ كوبى قاقپادان قيىس كەتىپ جاتتى, كەيبىرىنە قاقپاشىمىز لوريا توسقاۋىل قويا ءبىلدى.
ەكى دوپ ەنگىزىپ, كوڭىلدەرى جايلانعان سوڭ قوناقتار ءسال بوساڭسىپ, سىلبىرلىق تانىتقان ءساتتىڭ بىرىندە يسلامبەك قۋات قارسى قاقپادان ساڭىلاۋ تاۋىپ, جاۋاپ گول سوققان بولاتىن. بىراق بۇل قۋانىش ۇزاققا بارمادى. الاڭعا ويىنشى الماستىرىپ شىققان كاسپەر دولبەرگ ويىننىڭ 81-مينۋتىندا ەسەپتەگى ەكى گول ايىرماشىلىقتى قايتا قالپىنا كەلتىردى.
جالپى, بۇل ويىندا ءبىزدىڭ لوريا قورعاعان قاقپا تورىندا التى بىردەي دوپ تۋلاعان بولاتىن. الايدا, ونىڭ ۇشەۋىن تورەشى ويىننان تىس سوعىلدى دەپ ساناماي تاستادى.
وبالى نەشىك, ءبىزدىڭ فۋتبولشىلار ويىنشى سانىنىڭ ازدىعىنا قاراماستان, نامىسقا تىرىسىپ, ازۋ كورسەتىپ باقتى. بىراق تا, دەڭگەيى جوعارى قارسىلاستىڭ الدىندا قاجىر-قايرات ءھام تەحنيكالىق تۇرعىدا ءوزىنىڭ السىزدىگىن امالسىز مويىندادى. سونىمەن, رەسەيلىك مامان الەكساندر بوروديۋك باپتاعان قازاقستان قۇراماسى قاتارىنان ءۇش ويىندا جەڭىلىستىڭ اششى ءدامىن تاتتى.
ەندى, قازاق ەلىنىڭ فۋتبولشىلارى ىرىكتەۋ تۋرنيرىندەگى كەلەسى ويىندى 1 قىركۇيەك كۇنى چەرنوگوريا كومانداسىمەن ءوز الاڭىندا وتكىزەدى. اتالعان قارسىلاسپەن ارادا وتكەن ءبىرىنشى كەزدەسۋدە ءبىزدىڭ فۋتبولشىلار 0:5 ەسەبىمەن ويسىراي ۇتىلعان بولاتىن.
قازاقستان – دانيا – 1:3 (0:1)
نيكولاي يورگەنسەن, 27 (0:1). كريستيان ەريكسەن, 50 پەنالتي (0:2). يسلامبەك قۋات, 76 (1:2). كاسپەر دولبەرگ, 81 (1:3).
قايرات ءابىلدينوۆ,
«ەگەمەن قازاقستان»
