بالا بىتكەندى مۋلتفيلممەن الداندىرۋعا بولادى دەگەن اتا-انالاردىڭ قاتەلەسەتىنىن وسى كاۋسار قىز دالەلدەپ بەردى. ەس بىلگەننەن سپورتتىق جارىستاردى قىزىعا تاماشالاعان كىشكەنتاي كورەرمەن, اسىرەسە, سوچيدە وتكەن قىسقى وليمپيادا كەزىندە «كوكجاشىكتىڭ» الدىنان ءجيى تابىلعان. سودان كەيىن ەل قورجىنىنا جالعىز جۇلدەنى سالعان دەنيس تەندى تەلەديداردان كورسە قۋانىشىن جاسىرماعان. قىزىنىڭ بويىنداعى وسى ءبىر ەرەكشەلىكتى, مانەرلەپ سىرعاناۋعا دەگەن قىزىعۋشىلىعىن اڭعارعان اناسى جانبوتا اتابەكوۆا قىسقى سپورت مەكتەبىنە ەرتىپ بارادى. ءسويتىپ, كاۋسار №8 قىسقى سپورت مەكتەبىندە تاجىريبەلى جاتتىقتىرۋشى مارينا شەۆچۋكتان مۇز ۇستىندەگى ونەردى ۇيرەنە باستايدى. جاتتىقتىرۋشىسىمەن تەز ءتىل تابىسىپ, مانەرلەپ سىرعاناۋدىڭ ءارى ونەر, ءارى سپورت ەكەنىن ەرتە ۇعىنعان ول تاباندىلىعىنىڭ ارقاسىندا ەلىمىزدە وتكەن بىرىنشىلىكتەردە جۇلدەلى ورىنداردان كورىندى. ناتيجەسىندە, حالىقارالىق جارىسقا قاتىسۋعا مۇمكىندىك الدى. «قىزىمنىڭ رەسەيدە وتەتىن حالىقارالىق جارىسقا باراتىنىن ەستىگەندە قاتتى قۋاندىم. ماسكەۋگە بارعانىمىزدا رەسەيدە سپورتقا قاتتى كوڭىل بولىنەتىنىن اڭعاردىق. الەمدىك ستاندارتقا ساي سپورت كەشەنىندە دۇنيەنىڭ تۇكپىر-تۇكپىرىنەن كەلگەن سپورتشىلارعا قاراپ, جارىستا كاۋسارعا قيىن بولاتىن شىعار دەپ توپشىلادىم. ولاردىڭ وسالى جوق, بارلىعى تەك جەڭىسكە جەتەمىز دەپ كەلەدى ەمەس پە؟ كاۋسار مۇز ايدىنىنا شىققاندا جۇرەگىم دۇرسىلدەپ, قاتتى تولقىدىم. دەگەنمەن, قىزىم ايدىندا ءوزىن ەركىن ۇستاپ, سەكۋندتار وتكەن سايىن مەنىڭ كۇدىگىمدى سەيىلتىپ, سەنىمىمدى نىعايتا بەردى. مىڭ بۇرالا بي بيلەپ, كورەرمەندەردى ءتانتى ەتتى. ەڭ جوعارى ۇپاي جينادى. وسىلايشا ول تۋرنير جەڭىمپازى اتاندى. ونىڭ جاتتىقتىرۋشىسى مارينا شەۆچۋككە جانە وقۋشىلارعا جاعداي جاساپ وتىرعان مەكتەپ ديرەكتورى باقىتجان زيابەكوۆكە العىس ايتقىم كەلەدى», دەيدى كاۋساردىڭ اناسى.
كاۋساردىڭ جەڭىسكە جەتۋىنە بيگە قۇمارلىعى دا سەپتىگىن تيگىزگەنى انىق. ول قالاداعى ونەر مەكتەبىندەگى بي ۇيىرمەسىنە قاتىسادى ەكەن. ياعني, وقۋمەن قاتار سپورتقا دا, بي ۇيىرمەسىنە دە بارۋعا ۋاقىت تاۋىپ ءجۇر. «مۇز ايدىنىندا ونەر كورسەتكەن قارسىلاستارىما قاراپ, «مەنەن اسىپ بارا جاتقان ەشتەڭەسى جوق ەكەن عوي», دەپ ويلادىم. سودان كەيىن ءوز-وزىمە دەگەن سەنىمدىلىك پايدا بولىپ, ويىمداعىنى جۇزەگە اسىرا الدىم», دەيدى كاۋسار.
توعىز جاسىندا حالىقارالىق تۋرنيردە توپ جارعان كاۋسار ىبىرايقىزى بولاشاقتا قىسقى وليمپيادا جۇلدەگەرى نەمەسە جەڭىمپازى بولۋدى ارماندايدى. جانە وسى ماقساتتا ۋاقىتىنىڭ كوبىن سپورت پەن ونەرگە ارنايتىنىن دا ايتتى.
شىمكەنت
