پاۆيلوندا رەسەيدىڭ ەنەرگەتيكالىق الەۋەتى, اتوم سالاسىندا جەتكەن جەتىستىكتەرى, گيدروەنەرگەتيكاداعى تىڭ سەرپىلىسى كورسەتىلەدى.
«مۇنداي اۋقىمدى پاۆيلوندى تانىستىرىپ تۇرعانىما قۋانىشتىمىن جانە بولاشاقتىڭ ەنەرگياسىن كورسەتۋدە رەسەيلىك پاۆيلوننىڭ الدىڭعى ورىنداردان كورىنەرىنە سەنىمدىمىن. بارلىق كەلۋشىلەر ءتۇرلى تەڭىزدەردىڭ اراسىندا, سولتۇستىك تەڭىز جولى بويىندا ورنالاسقان رەسەيدىڭ ءوز تابيعي ارتىقشىلىقتارىن قولدانا وتىرىپ, بولاشاق ەنەرگيانىڭ يننوۆاتسيالىق دامۋىنا قادام باسۋىن كورە الادى», - دەدى رەسەي فەدەراتسياسىنىڭ قازاقستانداعى توتەنشە جانە وكىلەتتى ەلشىسى ميحايل بوچارنيكوۆ پاۆيلوننىڭ اشىلۋ راسىمىندە.
ءبىر قىزىعى, پاۆيلوننىڭ اشىلۋ سالتاناتىندا ادەتتەگىدەي لەنتا قيۋ ءراسىمى بولمادى. پاۆيلوننىڭ باس كوميسسارى گەورگي كالامانوۆ پەن «ەكسپو-2017» حالىقارالىق مامانداندىرىلعان كورمەسىنىڭ كوميسسارى ءراپىل جوشىباەۆ جانە رەسەي فەدەراتسياسىنىڭ قازاقستانداعى ەلشىسى ميحايل بوچارنيكوۆ سۇيىق ازوتپەن مۇز بوپ قاتىرىلعان لەنتانى بالعامەن جاردى.
پاۆيلونعا كىرگەن كورمە قوناقتارى ماڭگىلىك مۇزدى مەكەن - اركتيكاعا تاپ بولعانداي اسەر الادى. عيماراتتىڭ قابىرعالارى توڭ باسقان مۇز تۇرىندە جابدىقتالعان جانە ونداعى ساۋلەلەر اركتيكا تابيعاتىنا عانا ءتان سولتۇستىك شۇعىلا قۇبىلىسىن بەينەلەيدى.
ەكسپوزيتسيانىڭ باستى جاڭالىعى - اركتيكادان, عالامشاردىڭ «ەڭ توبەسىنەن» جەتكىزىلگەن مۇز سەڭى بولدى. قالىڭدىعى 4 مەتردى قۇرايتىن مۇز سەڭى ەكى جىلدا تۇزىلگەن جانە ارنايى كونتەينەرلەر ارقىلى استاناعا جەتكىزىلگەن.
ء«بىز «ەكسپو-2017» «بولاشاقتىڭ ەنەرگياسى» تاقىرىبىن رەسەي اركتيكاسى بىرەگەي ايماعى ارقىلى كورسەتەمىز. ءدال وسى ايماقتا رەسەيدىڭ بالامالى ەنەرگەتيكاسىن دامىتۋدىڭ بولاشاعى زور. بۇدان بولەك, اركتيكادا پايدالى قازبالار دا كوپ», - دەدى رەسەيلىك سەكتسيانىڭ باس كوميسسارى گەورگي كالامانوۆ.
سونداي-اق, رەسەي پاۆيلونى ەكولوگيا جىلىنا قولداۋ ءبىلدىرۋ ماقساتىندا, وسىمدىكتەر مەن جانۋارلار الەمىن قورعاۋعا قاتىستى ارنايى ەكسپوزيتسيا ۇسىنادى. كەلۋشىلەر «اركتيكانىڭ تابيعي الەمى», «اركتيكانىڭ سۋ استىنداعى الەمى. قايراڭ», «اركتيكانىڭ وسىمدىكتەر مەن جانۋارلار الەمى, «مۇزدار» سىندى ديناميكالىق ۆيدەو-ينستالياتسيالاردى تاماشالايدى جانە جانۋارلاردىڭ سيرەپ كەتكەن تۇرلەرىن ساقتاۋ تۋرالى مالىمەتتەرمەن تانىسا الادى.
2017 جىلدىڭ 8 قىركۇيەگىندە ەكسپو-داعى رەسەي كۇنى اتالىپ وتەدى.
