تەڭىز جاعاسىنداعى ساحنادا مەرەكە باستالماستان بۇرىن-اق پاتريوتتىق باعىتتاعى ساز ويناپ, جۇرتشىلىقتىڭ كوڭىلىن اسەرلى كۇيگە بولەدى. رامىزدەر الاڭىنان بايكەرلەردىڭ ءجۇرىپ وتۋىمەن باستالعان فورۋم تەڭىز جاعاسىندا جالعاستى. فورۋمعا بايكەرلەر مەن ۆەلوسيپەدشىلەر توپتارى, جاس بەلسەندىلەر مەن اقتاۋ گارنيزونىنىڭ اسكەري قىزمەتكەرلەرى, ەتنومادەني بىرلەستىك وكىلدەرى, جالپى ءبىلىم بەرەتىن مەكەمەلەر وقۋشىلارى مەن مۇعالىمدەرى, ستۋدەنتتەر, دەنساۋلىق ساقتاۋ سالاسى قىزمەتكەرلەرى, سپورتشىلار, كاسىپورىندار جۇمىسشىلارى, مەملەكەتتىك قىزمەتكەرلەر مەن ساياسي پارتيالار بەلسەندىلەرى, قوعامدىق ۇيىمدار وكىلدەرىنەن قۇرالعان 4 مىڭنان استام ادام قاتىستى.
شارا «تۋىم – نامىسىم, ۇرانىم – بىرلىك, رامىزدەرىم – ماقتانىشىم» اتتى تەاترلاندىرىلعان پرولوگپەن باستالدى. اسكەريلەر قۇرمەتپەن رامىزدەردى, ياعني تۋ مەن ەلتاڭبانى الىپ ءوتتى. تەڭىز جاعاسىنداعى مىڭداعان ادام ءانۇراندى اۋەلەتە شىرقاسا, ونەرپازدار مەن اسكەريلەر «قازاقستان» فلەش-موبىن وتكىزدى.
26 جىل بۇرىن ءبىز ەگەمەندىككە قول جەتكىزىپ, دۇنيەجۇزىنە تاۋەلسىزدىگىمىزدى پاش ەتتىك. بۇل – اتا-بابالارىمىزدىڭ ارمانى, ەلىمىزدىڭ كوپتەن كۇتكەن ءۇمىتى اقتالىپ, ازاتتىقتىڭ تۋىن جەلبىرەتكەن قاسيەتتى كۇن. تاۋەلسىزدىكتىڭ اق تاڭىن العاش رەت ەلباسىنىڭ جارلىعىمەن بەكىتكەن مەملەكەتىمىزدىڭ بەتكە ۇستار بەدەلدى بەينەسى – رامىزدەرىمىزبەن قارسى الدىق. تۋعان جەرگە دەگەن وتانشىلدىق يدەياسىن قالىپتاستىرىپ, بىرلىگىمىز بەن ىنتىماعىمىزدى نىعايتاتىن مەملەكەتتىك رامىزدەردىڭ مەرەيلى مەرەكەسىن جىل سايىن اتاپ ءوتۋ داستۇرگە اينالدى. مەملەكەت باسشىسى نۇرسۇلتان ءابىش ۇلى نازارباەۆ «مەملەكەتتىك رامىزدەر – حالقىمىزدىڭ رۋحىن, ۇلتتىق سالت-ساناسىن, قاھارماندىعى مەن دانالىعىن, بولاشاققا ءۇمىتىن, ارمان-تىلەگىن جەتكىزەتىن ەرەكشە قۇندى بەلگىلەر», دەگەن بولاتىن.
وتان – ىستىق ۇيا, قاسيەتتى مەكەن. سوندىقتان دا ونى قاستەرلەپ, ءاربىر قازاقستاندىق ماقتان ەتەدى. ويتكەنى, ەلتاڭبامىز, تۋىمىز, ءانۇرانىمىز – قازاق ەلىنىڭ بولمىسىن, بۇگىنى مەن ەرتەڭىن ساباقتاستىرىپ, ەلدىڭ ەڭسەسىن كوتەرەتىن ەلدىگىمىزدىڭ ەڭ باستى ابىرويى.
ءبىز بۇگىندە تاۋەلسىزدىگىمىزدى تۇعىرىنا قوندىرىپ, قازاقستان مەملەكەتىن قۇرىپ الەمدەگى باقىتتى حالىقتاردىڭ ءبىرى بولدىق. زور ەڭبەكپەن, ماڭداي تەرمەن كەلگەن بايلىعىمىزدى قولدان شىعارىپ الماي, ۇرپاقتان ۇرپاققا تابىستاۋ – ءبىزدىڭ ادال پارىزىمىز, دەدى ماڭعىستاۋ وبلىسىنىڭ اكىمى ە.توعجانوۆ.
ماڭعىستاۋلىقتاردى مەرەكەمەن ماڭعىستاۋ وبلىسىنىڭ «قۇرمەتتى ازاماتى» ق.ەرەجەپوۆ, مەديتسينا عىلىمدارىنىڭ دوكتورى, پروفەسسور, قازاقستاننىڭ ەڭبەك ەرى س.اقشولاقوۆ قۇتتىقتاپ, ەلدىڭ اماندىعىنا, زامانىنىڭ تىنىشتىعىنا, تاۋەلسىزدىكتىڭ بەرىكتىگى مەن ۇرپاقتىڭ باقىتتى بولۋىنا تىلەكتەرىن ارنادى.
فورۋمدا ءوز قىزمەتتەرىندە ازاماتتىق ەرلىك كورسەتكەن تۇلعالارعا وبلىس اكىمىنىڭ العىس حاتتارى مەن استانا قالاسىندا وتەتىن ەكسپو-2017 حالىقارالىق كورمەسىنىڭ بيلەتى تابىستالدى. مۇنداي سىي-سياپات ءار سالا بويىنشا ىرىكتەلگەن 22 ادامعا بۇيىردى.
كوك تەڭىز جاعاسىن ادەمى كورىنىس پەن اسەرلى ساتكە بولەگەن شارا ماڭعىستاۋلىقتاردىڭ مەملەكەتتىك رامىزدەرگە دەگەن ىقىلاسىن تانىتا ءتۇستى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
سۋرەتتى تۇسىرگەن سەرىك مايەمەروۆ
