سالتاناتتى راسىمگە قاتىسقان وبلىس اكىمىنىڭ ءبىرىنشى ورىنباسارى عۇمار دۇيسەمباەۆ: «جاس وتاۋ» باعدارلاماسى بويىنشا 2015 جىلى 90 پاتەرلى ءۇي پايدالانۋعا بەرىلگەن ەدى. ەندى ەكىنشى ءۇيدىڭ قونىستانۋشىلارى قۋانىشقا كەنەلىپ وتىر. بۇل – ەلباسىنىڭ حالىققا, سونىڭ ىشىندە جاستارعا دەگەن قامقورلىعىنىڭ كورىنىسى, ەلدىڭ الەۋمەتتىك جاعدايىن, تۇرمىسىن جاقسارتۋعا باعىتتالعان ساياساتىنىڭ جەمىسى», دەدى.
وبلىستىق جاستار ساياساتى ماسەلەلەرى باسقارماسىنىڭ باسشىسى جاسۇلان بيسەمبيەۆتىڭ ايتۋىنشا, «جاس وتاۋ» باعدارلاماسى بويىنشا 29-عا تولماعان, وتباسىندا مۇگەدەك جان بار, سپورتتا, ونەردە, باسقا دا سالالاردا جەتىستىكتەرگە جەتىپ جۇرگەن جاستار, سونداي-اق, بيۋدجەتتىك مەكەمە مەن مەملەكەتتىك ورگاندار قىزمەتكەرلەرى, اسكەري قىزمەتشىلەر باسپانالى بولا الادى. تۇرعىن ءۇي زاەمدارىن رەسىمدەگەندە جالاقىلارىنىڭ مولشەرلەرى جەتپەي قالعان جاس وتباسىلارعا اتا-انالارى كەپىلدىك بەرگەن.
«جاس وتاۋ» ۇيلەرىنىڭ قۇرىلىسىن «اق قاينار» جشس جۇرگىزگەن. العاشقى قونىستارىنا قول جەتكىزگەندەر قاتارىندا قاراباليندەر وتباسى دا بار. شاڭىراق يەسى ايدوس – جۋرناليست, ال جۇبايى مۇعالىم. قوعام ومىرىنە بەلسەندى ارالاسىپ جۇرگەن جاستار باسپانالى بولعاندارىنا ايرىقشا قۋانىشتى.
قازىر وڭىرلىك باعدارلاما شەڭبەرىندە 100 پاتەرلى تۇرعىن ءۇي سالىنىپ جاتىر. ول جىل اياعىنا دەيىن پايدالانۋعا بەرىلەدى. سونىمەن قاتار, «قولجەتىمدى باسپانا-2020» باعدارلاماسى اياسىندا جاس وتباسىلارعا 30 پاتەردى تاپسىرۋ جوسپاردا بار.
اتىراۋ
