تاياۋدا اتالعان وقۋ ورنىنىڭ ۇيىمداستىرۋىمەن شاعىن فۋتبولدان شەتەل ستۋدەنتتەرى اراسىنداعى ءداستۇرلى «الەم چەمپيوناتى» وتكەن ەدى. مىنە, وسى تۋرنيردە قازاق جاستارىنان قۇرالعان كوماندا جوعارى دەڭگەيدە ونەر كورسەتىپ, جارىستىڭ جەڭىمپازى اتاندى.
بيىل بۇل چەمپيوناتقا 15 مەملەكەتتىڭ جاستارىنان قۇرالعان كوماندالار قاتىستى. ولاردىڭ قاتارىندا وزبەكستان, تاجىكستان, ۆەتنام, كۋبا, انگولا, ساۋد ارابياسى, ءۇندىستان, قىتاي, قازاقستان جانە باسقا دا ەلدەردىڭ جاستارى بولعان. ايتا كەتەتىن جايت, اۋەلدە بۇل چەمپيوناتتى 2008 جىلى قازاق جاستارى ۇيىمداستىرعان ەكەن. كەيىن بۇل تۋرنير ءداستۇرلى تۇردە وتە باستاعان. ال قازاق جاستارىنان قۇرالعان ۋنيۆەرسيتەت كومانداسى بولسا, جىل سايىن وسى جارىستا ۇزدىك شىعاپ وتىرادى ەكەن.
ۋنيۆەرسيتەتتىڭ حالىقارالىق ىنتىماقتاستىق باسقارماسى ءبولىمىنىڭ جەتەكشىسى, چەمپيوناتتى ۇيىمداستىرۋشى سوليندجون ۋرۋنوۆتىڭ ايتۋىنشا, قازاق جاستارىنىڭ سپورتقا دەگەن ىنتاسى زور كورىنەدى: ولار قانداي جارىس بولسىن كوزدەرى وتشا جانىپ, قۇلشىنا كىرىسەدى ەكەن. ء«بىزدىڭ ۋنيۆەرسيتەتتىڭ قابىرعاسىندا وسىنداي كوماندا بارىن ماقتان ەتەمىز. ىلعي دا جەڭىسپەن ورالاتىن اقجولتاي كوماندا», – دەيدى سوليندجون ۋرۋنوۆ مىرزا.
جالپى, ۋفا مەملەكەتتىك مۇناي تەحنيكالىق ۋنيۆەرسيتەتىنىڭ قازاق جاستارىنان قۇرالعان كومانداسى باسقا دا ءىرى جارىستاردا جۇلدە الىپ جۇرگەن ۇجىم ەكەن. مىسالى, ولار جاقىندا ماسكەۋ قالاسىندا شاعىن فۋتبولدان جوعارى وقۋ ورىندارى اراسىندا وتكەن جارىستان جەڭىمپاز بولىپ ورالعان. كوماندا كوشباسشىلارىنىڭ ءبىرى بيسۇلتان تەرەكباەۆ سۇرمەرگەن شابۋىلشى اتانىپ جۇرگەن جالىندى جاس. ءوزى اتىراۋ قالاسىنىڭ تۋماسى, اتالعان ۋنيۆەرسيتەتتىڭ 2-كۋرسىندا وقيدى. «بالا كەزىمنەن فۋتبولعا اۋەس ەدىم. ونىڭ ۇستىنە اكەم وسى سپورتقا دەگەنگە ىنتامدى بايقاپ, فۋتبول ۇيىرمەسىنە بەردى. مەكتەپ بىتىرگەنشە فۋتبولدى تاستامادىم. ۋفا ۋنيۆەرسيتەتىنە اعامنىڭ شاقىرتۋىمەن كەلگەن ەدىم. كوماندامىزداعى ويىنشىلار تۇگەلدەي قازاق جىگىتتەرى. ءبىزدى جەڭىستەرگە جەتكىزىپ جۇرگەن كۇش – بىرلىگىمىز, ۇيىمشىلدىعىمىز. جالعىز سپورتتا عانا ەمەس, وقۋدا دا الدامىز», – دەيدى العاداي جاس.
جاپونيا مەملەكەتىن قازىرگى دەڭگەيگە جەتكىزگەن كەزىندە الەمنىڭ ءار قيىرىنا ءبىلىم قۋىپ كەتكەن جاستارى ەكەنىن تاريحتان بىلەمىز. وسى تۇرعىدان العاندا, جات جەردە بىرلىگىنەن اجىراماي, ءبىلىمىن جەتىلدىرىپ, سپورتتا شىمىرلانىپ جۇرگەن قازاق جاستارىنا دا ارتىلار سەنىم زور.
ەرزات ەرماعامبەتوۆ,
م. اقمۋللا اتىنداعى باشقۇرت مەملەكەتتىك مەداگوگيكالىق ۋنيۆەرسيتەتىنىڭ ماگيسترانتى
رەسەي, ۋفا قالاسى
