بارەكەلدى! بەلگىلى بياتلونشى دياس كەنەشەۆ ۆانكۋۆەردە وتەتىن اق وليمپيادانىڭ اشىلۋ سالتاناتىندا قازاق ەلى تۋىن ۇستاۋ قۇرمەتىنە يە بولدى.
جيىرما ءتورت جاستاعى ول بۇرناعى جىلى وتكەن بياتلوننان جازعى الەم چەمپيوناتىنىڭ جەڭىمپازى جانە كۇمىس پەن قولا جۇلدەنىڭ يەگەرى. ەل كۋبوگى مەن چەمپيوناتتارىنىڭ دا بىرنەشە دۇركىن جەڭىمپازى مەن جۇلدەگەرى بولىپ تابىلادى. دەمەك, دياس – ەل تۋىن سەنىپ تاپسىرۋعا لايىقتى ازامات. تۋ ۇستاۋ – ءار سپورتشىنىڭ ارمانى. اق وليمپيادانىڭ سوڭعى ون جىلدىعىنا كوز جۇگىرتسەك, قازاقستان تۋىن 1994 جىلى سەرىپپەدەن شاڭعىمەن سەكىرۋدىڭ شەبەرى قايرات بيكەنوۆ ۇستاپتى. 1998 جىلى ەل بايراعىن وليمپيادا چەمپيونى, سونداي-اق وليمپيا ويىندارىنىڭ ءتورت رەت كۇمىس جانە ەكى رەت قولا مەدالىنىڭ يەگەرى, ءتورت دۇركىن الەم چەمپيونى, بۇرىنعى كسرو-نىڭ بىرنەشە دۇركىن چەمپيونى بولعان شاڭعىشى ۆلاديمير سميرنوۆ الىپ ءجۇردى. وسى ارادا ۆ.سميرنوۆتىڭ قازاق ەلىنە اق وليمپيادانىڭ التىنىن اپەرگەن جالعىز سپورتشى ەكەنىن ايتا كەتەيىك. 2002 جىلى بۇل مارتەبەگە كونكيشى راديك بيكچەنتاەۆ, ال 2006 جىلى حوككەيشى الەكساندر كورەشكوۆ يە بولدى. ءبىر قىزىعى, تۋ ۇستاۋ قۇرمەتى كەيبىر سپورتشىلارعا ارمان بولسا, ەندى ءبىر اتاقتى سپورتشىلار ودان ءوز وتىنىشتەرىمەن باس تارتاتىن جاعدايلار دا جوق ەمەس. سوڭعىلارى ءوز شەشىمدەرىن وليمپيادانىڭ اشىلۋى مەن جابىلۋى كەزىندەگى ۇزاققا سوزىلاتىن سالتاناتتا ساعاتتاپ تۇرۋ مەن ءجۇرىپ وتەتىن جولدىڭ جۇيكەگە سالماق تۇسىرەر قاشىقتىعىمەن تۇسىندىرگىسى كەلەدى. ويتكەنى, بۇل سول كۇنى نەمەسە ەرتەسىنە سىنعا تۇسەم دەپ وتىرعان سپورتشىنىڭ كوڭىل-كۇيى مەن بابىنا كەرى اسەر ەتۋى مۇمكىن. بىزدىڭشە, سپورتشىنىڭ الدىندا قانداي اۋىر سىن كۇتىپ تۇرسا دا تۋ ۇستاۋ قۇرمەتىنەن باس تارتۋعا بولمايتىن سياقتى. ويتكەنى, كەڭەس وكىمەتىنىڭ تۇسىندا بۇل قۇرمەت قازاقستاندىق سپورتشىلاردىڭ ءۇش ۇيىقتاسا دا تۇسىنە كىرمەيتىن ارمان بولاتىن. سيدنەي وليمپياداسىندا جامبىل وڭىرىنەن شىققان تالانتتى بوكسشى ەرماحان ىبىرايىموۆ قازاقتىڭ تۇڭعىش پرەزيدەنتى نۇرسۇلتان نازارباەۆ سەنىپ تاپسىرعان ەل تۋىن جوعارى كوتەرىپ شىقتى. سول جولى ول ەلباسىنا بەرگەن ۋادەسىندە تۇرىپ, وليمپيادا چەمپيونى اتاندى. ەلدىڭ يەسى بولسا, تۋدىڭ كيەسى بار. مىسالى, رەسەيدىڭ اتاقتى بالۋانى, الەمنىڭ بىرنەشە دۇركىن چەمپيونى, سەۋل (1988 ج.), بارسەلونا (1992 ج.) جانە اتلانتا (1996 ج.) وليمپيادالارىنىڭ چەمپيونى الەكساندر كارەلين ءوزىنىڭ سيدنەي وليمپياداسىنداعى كۇمىس مەدالدى قاناعات تۇتقان “ساتسىزدىگىنىڭ” ءبىر سەبەبىن تۋ ۇستاپ شىقپاۋىنان كورەدى ەكەن. ويتكەنى, ول مۇنىڭ الدىنداعى ەكى وليمپيادا سالتاناتى كەزىندە الەم جۇرتشىلىعىنا رەسەي سپورتشىلارىنىڭ مىزعىماس تۋ ۇستاۋشىسى رەتىندە تانىلعان بولاتىن. سپورتشىلاردىڭ كوبىسىنىڭ قۇدايعا قۇلشىلىق جاساپ, ىرىمعا سەنەتىنىن ەسكەرسەك, تۋ ۇستاۋ سياقتى ەكىنىڭ ءبىرىنىڭ قولى جەتە بەرمەيتىن باقىتتى باسقا تەبۋگە بولمايتىن سياقتى. سوندىقتان قازاقستاننىڭ تۋى سەنىپ تاپسىرىلعان سپورت شەبەرى دياس كەنەشەۆ پەن سول قاسيەتتى كوك بايراقتىڭ استىندا جارىس جولى مەن مۇز ايدىنىنا شىعاتىن قازاقستاندىق مۇزبالاقتارعا تەك ساتتىلىك تىلەيىك. كوسەمالى ساتتىباي ۇلى.
